5 ءساۋىر كۇنى شىعىس قازاقستان وبلىسى ريددەر قالاسىندا جەر قىرتىسى وپىرىلىپ، بوروۆايا كوشەسىندە ورنالاسقان №5 ءۇي ءىزىم-قايىم بولعان(سۋرەتتە). باقىتقا جاراي، اپات كەزىندە ءۇش ادام سىرتقا شىعىپ ۇلگەرگەن.

شىعىس قازاقستان وبلىسى توتەنشە جاعدايلار دەپارتامەنتىنىڭ حابارلاۋىنشا، ريددەردە پايدا بولعان شۇڭقىردى بەتونمەن جابۋ جۇمىستارى جۇرگىزىلىپ جاتقان كورىنەدى.

كورسەتىلگەن مالىمەتتەرگە سۇيەنسەك، قاۋىپتى ايماقتا 12 ءۇي، 1 دۇكەن، 4 جەر تەلىمى ورنالاسقان. 25 ادام، ونىڭ ىشىندە 5 بالا «قازتسينك» جشس قوناق ءۇي كەشەنىنە ورنالاستىرىلىپتى.سونداي-اق، 480 ادام قاۋىپسىز جەرگە كوشىرىلدى.

ءسويتىپ، استى كەنىشكە تولعان ريددەر ايدىڭ-كۇننىڭ امانىندا "توزاققا" اينالىپ وتىر... قالاعان ۋاقىتىندا باسپاناڭمەن قوسىپ جۇتا سالادى. ويتكەنى، قۋىس جەردىڭ قاشان وپىرىلاتىنىن، قاي جەرى وپىرىلاتىنىن ءبىر اللا عانا بىلەدى. 

اباي-اقپارات