قازاقستان پرەزيدەنتى رەسەي، قىتاي جانە باسقا ەلدەردىڭ باسشىلارىمەن دۋشانبەدە وتكەن كەلىسسوزدەر ناتيجەسىندە ەكونوميكالىق قارىم-قاتىناستى جاقسارتۋعا باعىتتالعان بىرقاتار ۋاعدالاستىقتارعا قول جەتكىزىلگەنىن ايتتى.  

«الەمدىك نارىقتا ءبىزدىڭ نەگىزگى شيكىزاتىمىز – مۇناي مەن گاز باعاسىنىڭ تومەندەۋى بايقالۋدا. مەتاللۋرگيالىق ونەركاسىپتە، مۇناي وندىرۋدە جانە كەيبىر ونىمدەردىڭ ەكسپورتىندا قۇلدىراۋ بار، سونداي-اق تاياۋ كورشىلەرىمىزبەن ارادا ساۋدا تومەندەگەن. مۇنىڭ ءبارى الەمدىك ەكونوميكالىق ۇدەرىستەردىڭ ىقپالىنا بايلانىستى. سوعان قاراماستان ءبىز ەكونوميكالىق كورسەتكىشتەردىڭ تومەندەۋىنە جول بەرمەي، بيىلعى جىلدى ءتيىستى دەڭگەيدە اياقتاۋعا ءتيىسپىز. كەلەسى جىلدىڭ بيۋدجەتىن قازاقستاننىڭ بارلىق قاجەتتىلىكتەرىن قامتاماسىز ەتە الاتىنداي ەتىپ ءتۇزۋىمىز كەرەك»، – دەدى مەملەكەت باسشىسى.

نۇرسۇلتان نازارباەۆ قانداي جاعدايدا بولسا دا، حالىقتىڭ الەۋمەتتىك احۋالى ناشارلاماۋى تيىستىگىنە نازار اۋداردى.

«مەملەكەتتىڭ زەينەتاقى، ەڭبەكاقى، سىياقى بويىنشا بارلىق تولەمدەرى ءبىز بەلگىلەگەن دەڭگەيدە قالۋى كەرەك. بۇل وڭاي مىندەت ەمەس، بىراق ول شەشىلۋى ءتيىس»، – دەدى قازاقستان پرەزيدەنتى.

سونىمەن قاتار، مەملەكەت باسشىسى ۇكىمەتتىڭ الەمدىك نارىقتاردىڭ ءتيىستى دامۋ باعىتتارىنا جانە ىقتيمال داعدارىس جاعدايلارىنا لايىقتالعان ءارتۇرلى ستسەناريلەرى بولعانى ءجون ەكەنىن ايتتى.   

ءوز كەزەگىندە ك.ءماسىموۆ جاعدايدىڭ ءتۇرلى ستسەناريدە ءوربۋىنىڭ الدىن الۋ ءۇشىن ۇكىمەتتە ۇلتتىق بانكپەن جانە وبلىس اكىمدەرىمەن بىرلەسكەن ارنايى جۇمىس توبى قۇرىلعانىن ايتتى.

«وسى جىلى بارلىق الەۋمەتتىك مىندەتتەر تولىقتاي ورىندالادى. 2015 جىلدىڭ بيۋدجەتى دە قالىپتى جۇزەگە اساتىنداي  بولىپ جاساقتالدى. ءسىزدىڭ تاپسىرماڭىزعا سايكەس، جاعدايعا ارەكەت ەتۋدىڭ ءتۇرلى ستسەناريلەرى ازىرلەنەتىن بولادى. ءسىزدى سىرتقى نارىقتا قانداي جاعداي بولسا دا، ەلىمىزدەگى احۋال ناشارلامايتىندىعىنا سەندىرگىم كەلەدى»، – دەدى پرەمەر-مينيستر. 

http://strategy2050.kz/