تەرمە

جاتتى "جانىم" دەگەنمەن
جاردان ارتىق بولار ما.
جالبىر شۋدا جاس تايلاق
ناردان ارتىق بولار ما.
جازدا جاۋعان اق بۇرشاق
قاردان ارتىق بولار ما.
ابىرويمەن اتاعىڭ
اردان ارتىق بولار ما.

بۇرالىپ بۇرىمى ورىلگەن
ارۋدان سۇلۋ جان بار ما.
كەرالا ءتوسى كەرىلگەن
مارالدان كوركەم اڭ بار ما.
قاراشانىڭ قورعانى
قاسيەت بولار حانداردا.
ءبىر جىعىلىپ، ءبىر تۇرىپ،
جەتپەي مە پەندە ارمانعا...

الىس جولعا جۇرمەگەن
اتانعا اۋىر ارتادى.
ارعىماققا مىنبەگەن
ايىلىن قاتتى تارتادى.
التى اي قىستا ارىي ما
اسقار تاۋدىڭ ارقارى.
قايراتىڭ تولىپ كەتە مە
قايراعانمەن بالتانى.

جينالماسا مەشىتكە
جاماعاتتان نە پايدا.
حاراممەنەن مال تاپساڭ
قاناعاتتان نە پايدا.
ساۋاپتى ءىسىڭ بولماسا
سالاۋاتتان نە پايدا.
الاش تاتۋ بولماسا
اماناتتان نە پايدا.
التىن ەردى سالعانمەن
شابان اتتان نە پايدا.

جاناشىردى جامانداپ

جاقىندى قايدان تاباسىڭ.

جىرلاعاندى تىڭداماي

اقىندى قايدان تاباسىڭ.

ابىزعا قۇلاق سالماساڭ

اقىلدى قايدان تاباسىڭ.

ورماننىڭ ءىشى بۇتاق دەپ

وتىندى قايدان تاباسىڭ

مۇراگەرسىز داۋلەتتىڭ

بوق بولۋى وپ –وڭاي.

جارىم قۇرساق جارلىنىڭ

توق بولۋى وپ-وڭاي.

شالا جانعان وتىننىڭ

شوق بولۋى وپ-وڭاي.

باسىڭداعى ءمانسابىڭ

جوق بولۋى وپ-وڭاي.

جامان اتقا جال بىتسە

جۇگەن سالىپ مىنگىزبەس.

جاماندارعا مال بىتسە

جانىنا جاقىن جۇرگىزبەس.

جاساۋلى وردا قايدا بار؟

جاساۋىلى كىرگىزبەس.

جومارت بولسا جاقىنىڭ

جوق بولسا دا بىلگىزبەس

ەسىكتىڭ الدى ەمەن دەپ
ەتەكتەپ اكەپ جاقپاڭىز...
جاعالاۋمەن جۇرەم دەپ
جاردىڭ شەتىن باسپاڭىز.
قارابۇلت تونسە باسىنا
قاسىڭدا دوستان قاشپاڭىز.
اتاما داۋلەت ءبىتتى دەپ،
ادامدىقتان اسپاڭىز.

باي بالاسى ەكەن دەپ
بايلاۋسىزبەن دوس بولما.
توبىلعى قامشى الدىم دەپ
توبىرعا بارىپ باس بولما.
تورعىنمەن تورقا كيىنگەن
توپتى كورسەڭ جاسقانبا.
الىستان مەيمان كەلەر دەپ
اسىڭ بولسا اش بولما.

تورعىن تىستى تونىڭنىڭ
توزاتۇعىن كەز بولار.
ساتقىندار ور الدىڭنان
قازاتۇعىن كەز بولار.
الاماننان اتىڭ ءبىر
وزاتۇعىن كەز بولار.
اسقاقتاعان پەندەنىڭ
ازاتۇعىن كەزى بولار.

جوقتاۋشىسى بولماس دەپ
جەتىمدى كورسەڭ باسىنبا.
اجال كەلسەڭ قالماسسىڭ
ورانساڭدا اسىلعا.
التىننان ساراي سالدىم دەپ
اللادان بەزىپ تاسىنبا.
باقىت دەگەن ۇركەك قۇس
تۇرماس ماڭگى باسىڭدا.

سۇرىنگەن نەگە تۇرماسىن
قولتىعىنان دەمەسە.
باي بولمايتىن جىگىت جوق
داۋلەتىن ءتاڭىر تەڭەسە.
بي بولمايتىن جىگىت جوق
مىنگىزىپ تۇلپار جەبەسە.
بايدىڭ ءادىل بولعانى
جارلى اقىسىن جەمەسە.

ءومىردىڭ سوڭى نە دەسەڭ

قابىردى كور دە، سونى ءبىل.

ەر سەرىگى نە دەسەڭ

سابىردى كور دە، سونى ءبىل.

قايدا بارساڭ اعايىن

اشىلسىن الدىڭ جولىڭ گۇل.
جاراتقان ءوزىڭ جار بولىپ
نۇرىڭا ءبىزدى شومىلدىر.

جورعا جىر

تولعاۋ

اي، سەندە دە ءبىر مۇڭ بار
جارىعىڭ بۇلتتان وتپەيدى.
جۇلدىزداردا ءبىر ءمىن بار،
ساۋلەسىن جەرگە توكپەيدى.
قاراشادا كىربىڭ بار،
حانعا ءسوزى جەتپەيدى.
الاسادا ءبىر مۇڭ بار،
بيىكتىك بويىن شەكتەيدى....

توبەدە تورە بولماسا،
ءتور بولعانى نە كەرەك،
بەتەگەسى بولماسا،
بەل بولعانى نە كەرەك.
ازاتتىعى بولماسا،
ەل بولعانى نە كەرەك.
قاز، اققۋى قونباسا،
كول بولعانى نە كەرەك.

قارا سۋدىڭ بەتىندە
قالقىپ الار قايماق جوق.
حاس شەبەردىڭ قولىندا
ويۋ بار دا ويماق جوق.
قايمانا جۇرتتا ءبىر ءمىن بار،
اشۋ بار دا ايبات جوق،
ازاماتقا قاراسام
ايلا بار دا ايبات جوق...

جاماننان تۋعان جاقسى بار،
توپتا ءسوزدى باستاعان.
جاقسىدان تۋعان جامان بار
وشاقتان ويى اسپاعان.
ارۋدا دا ارۋ بار،
ەتەگىن جەل اشپاعان...
جاقسى جىگىت بەلگىسى
قاسىرەت،قايعى كورسەدە،
قايىسپاعان قاشپاعان.
سابازدىقتىڭ بەلگىسى
سابىرلى كول سەكىلدى،
ساباسىنان اسپاعان...

شىڭعا جالعىز شىقپاڭىز،
قۇزدىڭ شەتى جار بولار،
قاراشانىڭ بەلگىسى
قاپالاي جاۋعان قار بولار.
ادامدىقتىڭ بەلگىسى،
ۇياتپەنەن ار بولار.
سىڭسىعانى قۋرايدىڭ،
سىبىزعى كۇيى زار بولار.

التى ايشىلىق اسۋلار،
اتاننىڭ بەلىن تالدىرار.
جامان بولسا تۋعانىڭ،
جاقىنىن جۇرتتا قالدىرار.
ىسكەرلىكتىڭ بەلگىسى،
تاقىر جەردى تاۋ قىلار،
جاقسى ايەلدىڭ بەلگىسى،
جوقتىڭ نارسەنى بار قىلار.

التىن ايدار التى الاش
اللا بىزگە جار بولسىن.
جاعالاي قونساڭ جايلاۋىڭ،
جاعاسى قايىڭ، تال بولسىن.
جازيرالى قونىسىڭ،
جايىلعان تۇلىك مال بولسىن.
جەسەڭ اسىڭ الدىڭدا،
جايا مەنەن جال بولسىن.
ىشسەڭ سۋسىن قاندىرار،
قىمىزبەنەن بال بولسىن.
الدىڭنان اتقان تاڭ بولسىن،
ءبارى بىزدە بار بولسىن!!!
ءاۋمين!

 Abai.kz