بۇگىن استاناداعى «الاۋ» مۇز ايدىنىندا شەتەلدىك ديپلوماتيالىق كورپۋستار اراسىندا «ۇلى جىبەك جولى» اتتى ۇستەل تەننيسىنەن تۋرنير وتۋدە.

شارانى «استانا ديپلوماتيالىق كورپۋسىنا قىزمەت كورسەتۋ باسقارماسى» اق مەن قىتاي حالىق رەسپۋبليكاسىنىڭ قازاقستان رەسپۋبليكاسىنداعى ەلشىلىگى ۇيىمداستىرعان. ءتۋرنيردى اشقان قر سىرتقى ىستەر ءمينيسترى ەرلان ىدىرىسوۆ: «مەن بۇگىن بارلىقتارىڭىزدى وسىناۋ سپورتتىق شارادا كورگەنىمە قۋانىشتىمىن. قازاقستاندا سپورتقا ەرەكشە نازار اۋدارىلادى. ەلىمىزدە ءىرى سپورتتىق شارالار وتكىزىلىپ، زاماناۋي سپورت سارايلارى سالىنۋدا. وزدەرىڭىز بىلەسىزدەر، 2017 جىلى قىسقى ۋنيۆەرسيادا وتەدى، سونىمەن قاتار ءبىز 2022 جىلى قىسقى وليمپيادانى وتكىزۋگە ۇمىتكەرمىز. سپورت بارشا الەم حالىقتارىن جاقىنداستىرادى، سوندىقتان دا ءبىز بۇگىن وسىندا تاعى دا ءبىر دوستىق قارىم-قاتىناسىمىزدى نىعايتا ءتۇسۋ ءۇشىن جينالىپ وتىرمىز»، - دەپ ءسوز سويلەگەن.

«بۇل ءتۋرنيردىڭ ماقساتى - سالاۋاتتى ءومىر سالتىن ناسيحاتتاۋ، سونداي-اق استانادا قىزمەت ەتىپ جاتقان ديپلوماتيالىق كورپۋستاردىڭ دوستاسىپ، ءوزارا ءتىل تابىسۋى. قىستا ءبىز بارلىعىمىز بىرگە شاڭعى تەبەمىز، ال جازدا فۋتبول جانە باسقا دا سپورت تۇرلەرىمەن شۇعىلدانامىز. بۇگىن ۇستەل تەننيسىنەن تۋرنير وتكىزۋدى دۇرىس دەپ شەشتىك. بۇل سپورت ءتۇرى قىتايدا وتە جاقسى دامىعان. سىزدەردىڭ ەلدەرىڭىزدە دە تەننيسكە قىزىعۋشىلار وتە كوپ. سوندىقتان تۋرنير قىزىقتى بولىپ وتەدى دەپ ويلايمىن»، - دەپ اتاپ وتكەن ءوز كەزەگىندە قىتاي حالىق رەسپۋبليكاسىنىڭ قازاقستان رەسپۋبليكاسىنداعى ەلشىسى لە يۋيچەن.

قازاقستاندا اككرەديتتەلگەن 15 شاقتى شەتەلدىك ەلشىلىكتەردەن 20-دان استام كوماندا قاتىسقان تۋرنير اياسىندا شارانى اشۋ ءراسىمى رەتىندە قحر ەلشىسى لە يۋيچەنمەن ۇستەل تەننيسىن ويناعان ىدىرىسوۆ ەكى ۇپاي ارتىق جيناپ، قىتاي ەلشىسىن جەڭىپ كەتكەن.

اباي-اقپارات