قر ۇكىمەت باسشىسى كارىم ءماسىموۆتىڭ،

ۇقك باسشىسى نۇرتاي ابىقاەۆتىڭ،

سىرتقى ىستەر ءمينيسترى ەرلان ىدىرىسوۆتىڭ،

مەملەكەتتىك حاتشى ادىلبەك جاقسىبەكوۆتىڭ نازارىنا

 ەكى جىلدان بەرى توقىراپ قالعان «قازاق كوشىنە» ەلباسى نۇرسۇلتان نازارباەۆ قايتا قامشى سالدى. «اتاجۇرتىنا كەلەم دەگەن قازاققا بارلىق جاعدايدى جاساڭدار» دەپ مينيسترلەرىنە تاپسىرما بەردى مەملەكەت باسشىسى. دەگەنمەن وسى ىسكە ءدال قازىر بەل شەشىپ كىرىسكەن شەنەۋنىكتى كورمەدىك. كوشتىڭ باسى شەتەلدەگى قازاقتارعا ۆيزا بەرۋدەن باستالاتىنىن ەسكەرسەك، ونىڭ ءوزى قيامەت قايىم بولىپ تۇر. ايتالىق، مىنا تۇرعان قىتايداعى قازاقتار تۋىسشالۋ ۆيزاسىن الۋعا زار بولىپ ءجۇر...

 قازاقستاننىڭ ۇرىمجىدەگى ۆيزا بەرۋ قىزمەتى سوڭعى جىلدارعا دەيىن ناعىز بىلىق-شىلىقتىڭ ورتاسى بولىپ كەلگەن. وسىدان ءۇش جىل بۇرىن سول تارتىپسىزدىكتەردى قايىرجان سارسەباەۆ دەگەن ازامات دۇرىس جولعا سالىپ ەدى. قايىرجان مىرزا ۇزاق وتپەي قىزمەتىنەن كەتكەن. مۇمكىن ونىڭ «قازاق كوشىنە» داڭعىل جول اشقانى الدەكىمدەرگە ۇناماعان سىڭايلى. قازىر سول جاقسى ۇردىسكە قايتادان قارا كولەڭكە ءتۇستى.

بيىلعى جازدا قىتايدان اتاجۇرتىنا كەلگىسى كەلگەن اعايىننىڭ ۇرىمجىدەگى ۆيزالىق قىزمەتتەن ابدەن كوڭىلى قالدى. ول تۋرالى ءبىزدىڭ رەداكتسيامىزعا بىرنەشە ادام حابارلاسىپ، نازارىلىقتارىن ءبىلدىردى. ولاردىڭ ايتۋىنشا، ءۇش ايماقتى مەكەندەپ جاتقان قازاقتاردىڭ شالعايداعى ءۇرىمجى قالاسىنا قايتا-قايتا بارۋعا مۇمكىندىكتەرى جوق. تەك جازعى، قىسقى دەمالىستاردى پايدالانىپ، ۆيزا الىپ، قازاقستانعا العاشقى ساپارىن نەمەسە كەزەكتى قادامىن جاساعىسى كەلەدى. سول نيەتپەن الىپ ۇشىپ ءۇرىمجى قالاسىنا جەتكەن قانداستارىمىز قازاقستاننىڭ ۆيزالىق قىزمەتىنە بارعاندا، كوڭىلدەرى سۋ سەپكەندەي باسىلعان. سويتسەك، ءبارىنىڭ ەستيتىنى «ۆيزا كەزەگىڭىز قازان نەمەسە قاراشا ايىندا» كەلەدى دەيتىن سۋىق ءسوز كورىنەدى.

ال سوندا ۆيزانى كىمدەر الىپ جاتىر دەسەك، ەرتە قامدانعان كەيىبر اعايىندار مەن وزگە ۇلت وكىلدەرىنىڭ قاراسى قالىڭ كورىنەدى. ونى مىنا ۆيدەودان كورە الاسىزدار.

قازاقستانعا ۆيزا سۇراپ كەزەكتە تۇرعانداردىڭ كوپ ساندىسى ۇيعىر ۇلتىنىڭ وكىلدەرى ەكەنى انىق. سوندا، ەلباسى كىمدى شاقىردى؟ قازاقستانعا كەلىپ جاتقاندار كىمدەر؟ قازاقتار نە ءۇشىن اتاجۇرتىنا جەتە الماي زار ەڭىرەپ ءجۇر؟ بۇل سۇراقتاردىڭ جاۋابىن ەڭ الدىمەن سول ۇرىمجىدەگى ۆيزالىق قىزمەتتە وتىرعان مىرزالاردان سۇراعانىمىز ءجون شىعار... ءتىپتى، سوڭعى كەزدەرى ۇلتىن «قازاق» دەپ وزگەرتىپ، ەش قيىندىقسىز قازاقستانعا كەلىپ جاتقان «ۇيعىرلار» تۋرالى دا اقپاراتتار جەلدەي ەسۋدە.

ەستۋىمىزشە، سوڭعى بىرەر جىلدا ۆيزا بەرۋ قىزمەتىنىڭ تىزگىنىن ۇستاعان ەرلان يبرايم قازىر ۋاقىتشا دەمالىستا ما، الدە قىزمەتىنەن بوسادى ما؟ ايتەۋىر، باۋىرجان ەسىمدى قىزمەتكەر مەن ىرىمبەك دەيتىن ازاماتتىڭ ەسىمى ءجيى اتالۋدا.

نەدە بولسا، مىنا ۆيدەو كوڭىلگە كۇدىك ۇيالاتاتىنى ءسوزسىز. ءسىز نە دەيسىز؟

نۇرعالي نۇرتاي

Abai.kz