«قازاقستان داۋىسى»: تالىمگەرلەر نە دەيدى؟

«قازاقستان داۋىسى» ۇلتتىق ءان جوباسىنىڭ قازىلارى مەن تالىمگەرلەرى شوۋدىڭ ەكىنشى ماۋسىمىندا وزگەرگەن جوق. ولار - تانىمال انشىلەر نۇرلان البان، مەدەۋ ارىنباەۆ، ءمادينا سادۋاقاسوۆا جانە الماس كىشكەنباەۆ. بۇل تۋرالى «قازاقستان» رەسپۋبليكالىق تەلەراديوكورپوراتسياسىنىڭ ءباسپاسوز حاتشىسى راۋان ەسقالي مالىمدەدى.

شوۋدىڭ تاعى ءبىر ەرەكشەلىگى - تالىمگەرلەر  ۇمىتكەرلەرگە سىن ايتىپ، ەسكەرتۋ جاسامايدى. ءوز قامقورلىعىنا العان توپتاعى انشىلەرمەن  جەڭىسكە جەتۋ جولىندا  تىعىز  بايلانىس ورناتىپ، جۇمىس ىستەيدى. كاسىبي شەبەرلىگىن شىڭداۋعا كومەكتەسەدى. تالىمگەرلەر  بۇل كەزەڭدە ءوز توبىندا ىشتەي ىرىكتەۋ وتكىزەدى. ەكى ءانشى ءبىر ءاندى قاتار ايتىپ ءوزارا سايىسقا تۇسەدى. جولى بولعان ۇمىتكەر كەلەسى كەزەڭگە وتەدى. جارتىلاي فينالدا ۇمىتكەرلەر تىكەلەي ەفيردە ونەر كورسەتەدى.  بۇل كەزەڭدە ۇمىتكەرلەردىڭ كەيبىرىن كورەرمەن سمس داۋىس بەرۋ ارقىلى  جوبادا قالدىرا الادى. بىرقاتارى تالىمگەردىڭ قالاۋى بويىنشا كەلەسى كەزەڭگە وتەدى. قالعان ونەرپازدار  ءوزارا  سايىسقا تۇسەدى. اقتىق سىندا ءار توپتان ءبىر ءبىر ۇمىتكەردەن ىرىكتەلىپ، باس جۇلدە ءۇشىن باق سىنايدى. ولاردىڭ بىرەۋى عانا «قازاقستان داۋىسى» يەسى اتانادى.

جاڭا ماۋسىم قارساڭىندا ءبىز «قازاقستان داۋىسى»  جوباسىنا تالىمگەر رەتىندە قانداي باعا بەرەسىز؟» جانە «جوبانىڭ جاڭا ماۋسىمىنان نە كۇتەسىز؟» دەگەن 2 سۇراق جولداعان ەدىك. ەندى سوعان نازار اۋدارساق.

نۇرلان البان

1. بۇل جوبانى مۋزىكانى جان-تانىمەن سۇيەتىن، مۋزىكالىق ساۋاتى بار، وسى باعىتتا جۇمىس ىستەي الاتىن، تاجىريبەسى مول ماماندار جاساپ جاتىر. سوندىقتان «قازاقستان داۋىسى» تەلەجوباسىنىڭ دەڭگەيى جوعارى. تەلەدۋماننىڭ ۇيىمداستىرىلۋى، شىعارماشىلىق توپتىڭ قاتىسۋشىلارعا جانە تالىمگەرلەرگە ىقىلاسى ەرەكشە. ءوزىم بۇل دۋماننىڭ باسى-قاسىندا جۇرگەننەن كەيىن سەنىممەن ايتا الامىن. ءدال وسىنداي باعدارلاما قازاق تەلەۆيزيا تاريحىندا بۇرىن-سوڭدى بولماعان.

2. وزدەرىڭىز بىلەسىزدەر، بىلتىر مەنىڭ توبىمدا ونەر كورسەتكەن شاحاريزات سەيداحمەت جەڭىسكە جەتىپ، ءۇمىتىمدى اقتادى. بيىل دا وسى مەجەدەن كورىنۋ ءۇشىن بۇرىنعىدان دا كوبىرەك ەڭبەك ەتۋىمە تۋرا كەلەدى. جاڭا ماۋسىمدا دا جاس دارىنداردان توپ جاساقتاپ، تاعى ءبىر تالانتتىڭ باعىن اشقىم كەلەدى.  

الماس كىشكەنباەۆ

1. شەتەلدە جاسالعان «داۋىس» اتتى تەلەجوبانى عالامتوردان كورگەنىمدە وسىنداي باعدارلاما قازاقستاندا دا دايىندالسا ەكەن دەپ ارمانداپ ەدىم. «قازاقستان داۋىسى» بىزدە تۇسىرىلەتىنىن ەستىگەنىمدە، سونىمەن قاتار، وعان تالىمگەر رەتىندە مەنى شاقىرعاندا قاتتى قۋاندىم. مۇنداي ساپالى، مۋزىكالىق ۇلكەن باعدارلاماعا قاتىسۋدىڭ ءوزى ءاربىر ءانشى ءۇشىن مارتەبە.

2. ءبىرىنشى ماۋسىم اياقتالعاننان كەيىن ارادا جارتى جىلدان استام ۋاقىت ءوتتى. وسى كەزەڭدە وتكەندى سارالاپ، وي قورىتۋعا مۇمكىندىك بولدى. مەنىڭ توبىمداعى انشىلەر ءبىرىنشى ورىننىڭ تۇعىرىنان كورىنبەگەنىمەن، دۇرىس تاڭداۋ جاساعانىما كوزىم جەتتى.  جاڭا ماۋسىمدا ناعىز دارىن يەسىن تاڭدايمىن نەمەسە ولار مەنى تاڭدايدى دەپ ۇمىتتەنەمىن. ەلىمىزدە جاس تالانتتار وتە كوپ. تەك سولاردىڭ بيىككە كوتەرىلىپ، ساحنادان ءوز ورنىن تابۋىنا سەپتىگىم ءتيىپ جاتسا، ميسسيامنىڭ ورىندالعانى دەپ بىلەمىن. تەلەدۋماننىڭ جاڭا ماۋسىمى بىلتىرعىدان دى قىزىعىراق، تارتىستى، كوڭىلدى وتەىنىنە سەنىمدىمىن.  

مادينا سادۋاقاسوۆا

1. بۇل الەمنىڭ ءار ەلىندە ءوتىپ جاتقان رەيتينگىسى جوعارى جوبا گوي! باعدارلامانىڭ ءبىزدىڭ ەلىمىزدە انشىگە دە، كورەرمەنگە دە قىزىق بولعانىن ءارى وسىنداي جوبانىڭ كەرەك ەكەنىن ءبىرىنشى  ماۋسىمدا بايكادىق! سوڭعى جىلدارى ەگەر كورىكتى كەلبەتى بولماسا، داۋىسى مىقتى انشىلەرگە سۇرانىس بولماي قالدى. ال وسى جوبا ناعىز تالانتتى تانىتۋعا مۇمكىندىك بەرەدى. سونداي دارىن يەلەرىن تاڭداپ الىپ، ولارمەن بىرگە جۇمىس ىستەۋ، داۋىستارىنا لايىقتى اندەردى سۇرىپتاي ءبىلۋ ۇلكەن جاۋاپكەرشىلىك جۇكتەيدى. بۇل تالىمگەرلەر ءۇشىن دە ۇلكەن سىناق. ال جوباعا مەن ەڭ جوعارى، «بەس» دەگەن باعا بەرەمىن.

2. جاڭا ماۋىسىمدا وسى جوباعا داۋىسى بىرىنەن ءبىرى وتكەن جاس تالانتتاردىڭ كەلگەنىن قالايمىن. وسى جولى مەنىڭ توبىمداعى انشىلەردىڭ ءبىرى «قازاقستان داۋىسى» اتانسا ەكەن دەپ تىلەيمىن. سول ءۇشىن مەن قولىمنان كەلگەنشە تىرىسىپ باعامىن.

مەدەۋ ارىنباەۆ

1. كوپتىڭ كوڭىلىنەن شىققان جوبانىڭ جالعاسىن تاپقانىنا قۋانىشتىمىن. بىلتىر ەلىمىز بويىنشا قانشاما جاس كەلىپ، ءان بايقاۋىندا باق سىناپ ەدى. جوبانىڭ بەدەلى ارتقانىن بايقاعان وزگە انشىلەر دە بيىل شەت قالماۋعا، كوزگە كورىنىپ، ءوز ءومىرىن وزگەرتۋگە تىرىساتىن شىعار. ءوز توبىنا مىقتىنىڭ مىقتىسىن الۋ ءۇشىن تالىمگەرلەر دە بارىن سالادى. وسىنداي  حالىقارالىق جوبا بىزگە كەرەك. ال ۇيىمداستىرىلۋ دەڭگەيىنە كەلەتىن بولساق، وزگە ەلدە ءوتىپ جاتقان «داۋىس» باعدارلامالارىنان ەش كەم ەمەس. ويتكەنى، جوباعا شاقىرىلعان دىبىس رەجيسسەرى، جارىق بەرۋشىلەر، وپەراتورلار، پروديۋسەرلەر، قويۋشى رەجيسسەر، بارلىعى دا كاسىبي ماماندار، قورىتا ايتقاندا، مىقتى كوماندا جاساقتالعان. سوندىقتان  جوبانىڭ ساپاسى، رەيتينگىسى جوعارى.   

2. ادەمى، اشىق داۋىس ءبىر عانا ادامنىڭ مەنشىگى ەمەس، ول حالىقتىڭ بايلىعى. كەڭ تىنىستى، جاعىمدى قازاقى ءۇن تىڭدارماننىڭ قۇلاعىنا جەتۋى ءتيىس. سوندىقتان قازاقتىڭ تالانتتى ۇل-قىزدارىن «قازاقستان داۋىسىنا» قاتىسۋعا شاقىرامىن. وسىنداي مۇمكىندىكتى جىبەرىپ الماڭىزدار. جوبانىڭ قىزىقتى ءوتۋى بىزدەرگە عانا ەمەس، جانكۇيەر قاۋىم، سىزدەرگە دە بايلانىستى. جاڭا ماۋسىمدا ەرەكشە ءۇنى، تاۋداي تالابى بار، قازاق ەستراداسىنىڭ بولاشاق جۇلدىزدارىن كورگىم كەلەدى. 

«قازاقستان» رەسپۋبليكالىق تەلەراديوكورپوراتسياسى «قازاقستان» ۇلتتىق تەلەارناسىن، «بالاپان»جانە «كAZsport» ارنالارىن، قازاق راديوسىن، «شالقار»، «استانا»، «Classic» راديولارى مەن ايماقتىق تەلەراديوكومپانيالاردى بىرىكتىرەدى. كورپوراتسيانىڭ رەسمي سايتى www.kaztrk.kz. كورپوراتسيانىڭ الەۋمەتتىك جەلىلەردەگى پاراقشالارى: facebook.com/Kaztrk.kz, twitter.com/kaztrk_kz, youtube.com/user/NTKKazakhstan