ماماندار تۇركى حالىقتارىنىڭ مۋزىكالىق ورتاق اسپاپتارىنا ۇقسايتىن قۇرالدى قوبىز دەپ باعامداپ وتىر.         

التايدان بەلگىلى ارحەولوگ، تاريح عىلىمدارىنىڭ دوكتورى زەينوللا ساماشەۆتىڭ جەتەكشىلىگىمەن جۇرگىزىلگەن ارحەولوگيالىق قازبا جۇمىستارى بارىسىندا شامامەن 40 جاستاعى ساربازدىڭ سۇيەگى تابىلدى.

جاۋىنگەردىڭ دەنەسىنىڭ قاسىنان سول ءداۋىردىڭ قارۋ-جاراعى اتاپ ايتقاندا، دۋلىعا، ساداق، ساداقتىڭ وعى، قورامساق، قىلىش سونىمەن قاتار، اتتىڭ سۇيەكتەرى مەن التىن جالاتىلعان ەر-تۇرمان، جۇگەن تابىلدى. سونداي-اق ساربازدىڭ قاسىنا قوبىزعا ۇقساس مۋزىكالىق اسپاپتىڭ قويىلۋى   ارحەولوگيالىق قازبا جۇمىسىنىڭ باستى جاڭالىعى بولىپ وتىر.

ەسكەرتكىش تۇركى اكادەمياسىنىڭ «باتىس تۇرىك قاعاناتىنىڭ مەملەكەتتىك قۇرىلىمى» اتتى عىلىمي زەرتتەۋ جوباسى نەگىزىندە قازىلعان. بۇعان دەيىن «بەرەل» قورىمىنان مول جادىگەر تاپقان بەلگىلى ارحەولوگ زەينوللا ساماشەۆ: «ارحەولوگ عالىمدارمەن بىرگە جۇرگىزىلگەن العاشقى ساراپتامالار ناتيجەسى جاۋىنگەردى شامامەن VII عاسىردا ءومىر سۇرگەن دەپ بولجاپ وتىر. ادام مەن اتتىڭ سۇيەگى وتە جاقسى ساقتالعان. بۇل سۇيەك — قاتارداعى ساربازدىكى ەمەس، جىراۋ نەمەسە قوعامدا جوعارى مارتەبە يە بولعان ادامدىكى بولۋى مۇمكىن»،-دەيدى.

ءبىر قىزىعى، ءدال وسى وڭىردەن بىلتىر اتالعان عالىمنىڭ ارحەولوگيالىق توبى ەكى كونە اسپاپ ءتۇرىن تاپقان بولاتىن.   

         تاريحي ولجانىڭ ناقتى ءداۋىرى تۇركى اكادەمياسى جانىندا جۇرگىزىلەتىن ارنايى ساراپتامالاردان كەيىن انىقتالادى.

تۇركى اكادەمياسىنىڭ ءباسپاسوز قىزمەتى