(وسىدان ءۇش اي بۇرىن دۇنيەدەن وزعان اقىن، سىنشى، تۇركىتانۋشى ءامىرحان بالقىبەكتىڭ ءارى كەرەمەت فۋتبول جانكۇيەرى دە بولعانىن بىرەۋ بىلەر، بىرەۋ بىلمەس. ءوزى كۋا بولا الماعان بيىلعى الەمدىك دوپ دوداسى جايىندا دوسىمنىڭ رۋحىنا سىر شەرتكىم كەلدى)

بيىلعى چەمپيونات ءتىپتى قىزىق بولىپ جاتىر، ابەكە.

قازىر باياعىداي ءبىر قاۋىم جورا-جولداس جيى­لىپ فۋتبول كورۋ، سونان سوڭ ونى تالقىلاۋ، العان اسەرلەرىڭمەن ءبولىسۋ دەگەن مۇلدە جوق. دابىرلاسىپ وتىرىپ كورىپ، داۋلاسىپ تارقايتىنداي جاستان ءوتىپ تە كەتكەن شىعارمىز. ءوزىڭ بىلەسىڭ، بۇگىندە القالى توپتىڭ ورنىن الەۋمەتتىك جەلى دەگەن ۇعىم باستى. «بىلەسىڭ» دەپپىن-اۋ، سەن جالپى الەۋمەتتىك جەلى دەيتىن جالماۋىزدى مۇلدە مويىنداماي-اق كەتكەن ەكەنسىڭ عوي، ايتپاقشى. فەيسبۋك تۇگىلىم، اگەنتتى دە اشقان جوقسىڭ. جانە دۇرىس ىستەپسىڭ. زامان اعىمىنا ىلەسپەك بولعان ءبىزدىڭ دە ودان تاپقانىمىز شامالى – بەس-ون لايكقا ءماز بولىپ، التىننان قىمبات ۋاقىتىمىزدى ءوز ەركىمىزبەن ۇرلاتىپ، ءجۇرىپ جاتىرمىز.

ايتپاعىم: قازىر جۇرت اسەرىن اۋىزبەن ەمەس، وسى الەۋمەتتىك جەلىدەگى جازباسىمەن جەتكىزۋگە كوشتى. ءتىپتى، «گو-و-ول!» دەگەن قۋانىشتى ايقايدىڭ كورشىڭنىڭ تەرەزەسىنەن ەمەس، كومپيۋتەردەن تۆيتتەردەن ەستيسىڭ. ياعني، وقيسىڭ. راحاتتانىپ وتىرىپ، فۋتبولدى اۋىزشا تالقىلاي الاتىن سۇحباتتاس تىپتەن قات. بارىنىڭ ءوزى… قولى تيمەي مە، قوشى كەلمەي مە – ايتەۋىر اڭگىمەلەسۋگە اۋەس ەمەس. ىرگەدەگى الىبەك جيەنىڭ جالپى دوپتىڭ دومالاق ەكەنىنەن حاباردار بول­عانىمەن، ول تۋرالى پىكىرلەسۋگە جوق-اق. باياعى ەكەۋمىز فۋتبول جايىندا اڭگىمە باستاعاندا-اق قاباعى كىرجيىپ، لاجى بولسا، تاقىرىپتى باسقا ارناعا اۋىستىرۋعا تىرىسۋشى ەدى عوي، ءالى سول.

ياعني، بۇل جاعىنان دا جوقتىعىڭ قاتتى ءبىلىنىپ جاتىر، ابەكە. سەن بولعاندا… سەن بولعاندا، بيىل برازيلياداعى دوپ نوسەرىنە سۇيسىنەر مە ەدىڭ. چەمپيوندىق اتاعىنان توپتىق كەزەڭدە-اق ايرىلىپ قالعان يسپان­دىقتاردىڭ شاراسىزدىعىنا نالىر ما ەدىڭ. «فۋتبولدىڭ ءتورت جىلدان بەرى دامىپ كەتكەنىن، ەلدىڭ ءبارىنىڭ سەندەرگە قارسى قالاي ويناۋ كەرەكتىگىن مەڭگەرىپ العانىن، ءسات سايىن ىلگەرىلەپ وتىرۋ كەرەك ەكەنىن ەندى ۇقتىڭ با، دون كيحوت… دون ۆيسەنتە!» دەپ باپكەرگە شۇيلىگەر مە ەدىڭ. «اعىلشىندار فۋتبولدى ويلاپ تاپقانىمەن، قالاي ويناۋدى وزدەرى ۇمىتىپ قالعان-اۋ دەيمىن…» دەپ جىميار ما ەدىڭ. «قۇرامىندا بورحەسى بار كوماندا جامان ويناۋشى ما ەدى!» دەپ كوستا-ريكانىڭ تابىسىنا ريزا بولار ما ەدىڭ. «اكۋتاگاۆانى وقىماعان عوي اتاڭا نالەتتەر!» دەپ، بىردە-ءبىر رەت جەڭە الماي، جەر بولىپ قايتقان جاپونداردى جازعىرار ما ەدىڭ. گەرمانيا – الجير ماتچى الدىندا بۇلاردىڭ 1982 جىلعى ويىنى قالاي وتكەنىن تاپتىشتەپ اڭگىمەلەپ بەرەر ەدىڭ. ەستە ساقتاۋ قابىلەتىڭ كۇشتى ەدى عوي. كەيدە ءوز ولەڭىڭنىڭ شۋماعىن ۇمىتىپ قالساڭ دا، اندرەي بالدىڭ برازيلياعا نەشىنشى مينۋتتا، نەشە مەتر جەردەن گول سوققانىن بىرەۋ تۇندە ءتۇرتىپ وياتىپ سۇراسا دا، ايتىپ بەرەر ەدىڭ…

ەلدىڭ ءبارى «ۆامپير مە، نەمەنە، بالە…» دەپ يت تەرىسىن باسىنا قاپتاپ جاتقان لۋيس سۋارەستى «ۇلىلاردىڭ قاتەلىكتەرى دە ەشكىمگە ۇقسامايدى!» دەپ اقتاپ الار ما ەدىڭ. ەسىمدە، ەكەۋمىز قايبىر جىلى مارادونا مەن زيكونى سالىستىرىپ، داۋلاسقانبىز. «زيكو جاسىل الاڭدا دا ناعىز ازامات ەدى، دوپ تەبۋدى قويعان سوڭ دا بەدەلدى مينيستر، تانىمال فۋتبول مامانى بولدى. ال مارادونا شە؟ قولمەن گول سوقتى، ءوز قاقپاسىنا كىرىپ بارا جاتقان دوپتى قولىمەن قايتاردى، ودان قالسا، فالكاونى ىشتەن تەۋىپ، الاڭنان قۋىلدى! فۋتبولدى قويعان سوڭ دا ونىڭ ءومىرى كىسى قىزىعارلىق ەمەس ەدى: ەسىرتكىمەن ۇستالدى، شەكتەن تىس سەمىرىپ كەتتى، جۋرناليستەرگە قارسى وق اتتى! راس، مارادونا – ۇلى فۋتبولشى، بىراق، زيكو – الەم چەمپيو­نى بولماسا دا، جاس سپورت­شىعا ۇلگى بولار-اق مىسال» دە­گەن مەنىڭ ۇزاق-سونار مونولوگىما «دارا تالانتتار شەكتەن شىقپاي جۇرە ال­مايدى!» دەپ، ءبىر-اق اۋىز سوزبەن جاۋاپ قايىرعان ەدىڭ. راس شىعار. سۋارەس تە – دارا تالانت قوي.

سەن بولعاندا، ۇنەمى جولى بولماي جۇرەتىن، بىراق، بيىل قارسىلاسىنىڭ ءبارىن جايراتىپ كەلە جات­قان گوللانديا ءۇشىن شىن قۋانار ما ەدىڭ. سەنىڭ ماكىشىڭ، مارقاڭ – مەنىڭ مارحابات جەڭەشەم دە ءوزىڭ بارداعى ادەتپەن ءالى فۋتبول كورىپ ءجۇر عوي، «بيىل التىندى وسى قىزعالداقتار ەلى الادى-اۋ…» دەپ ەدى چەمپيونات باستالماي تۇرىپ. ايت­قانى ءدال كەلەتىن سياقتى، قۇمالاقشى اپالارىمىزشا ايتقاندا، ايتەۋىر «قۇيىسقانى كوتەرىلىپ» تۇر.

سەن بولعاندا، گۇرىلدەگەن داۋسىڭ­مەن: «سول ەجەلگى ەلليندىكتەر// ۇلىنىڭ،// جاقسى ويى ءۇشىن بەرەدى ەكەن توي جاساپ!» – دەپ ولەڭ وقىپ الىپ، سول ەللادا جىگىتتەرىنىڭ كەزەكتى ەرلىگىنە ءتىپتى دە تاڭقالماس ەدىڭ، ولاردىڭ قايتپاس، قايسار بولمىس­تارى تۋرالى ەجەلگى گرەك ميف-اڭىزدارىنان مىسال كەلتىرىپ، «ميىمىزدى اشىتار» ما ەدىڭ. «مىنا كولۋمبيانىڭ ورلەۋىن-اي، ءا، مارقۇم گابريەل گارسيا ماركەستىڭ ارۋاعى ىرزا شىعار بۇلارعا!» دەپ، كۇلەر مە ەدىڭ. «مىقتى-ەي ءبارى!» دەپ، شىن مىقتىلاردى مويىنداي بىلەتىن بولمىسىڭمەن تۇيىندەر مە ەدىڭ ءار اڭگىمەنى.

«قازاق تا مىقتى عوي، بىراق! – دەر مە ەدىڭ سوسىن تەمەكىڭدى قيسىق تۇتىندەتە ويلانىپ. – ادەبيەت جاعىن ايتامىن دا».

ويىن ناتيجەلەرى 

1/8 فينال. فرانتسيا – نيگەريا – 2:0 (پوگبا، 79, يوبو، 90, اۆتوگول). گەرمانيا – الجير – 2:1, قوسىمشا ۋاقىتتا (شيۋررلە، 92, ءوزىل، 119 – دجابۋ، 120+1). ارگەنتينا – شۆەيتساريا – 1:0, قوس.ۋاقىتتا (دي ماريا، 118). بەلگيا – اقش – 2:1, قوس. ۋاقىتتا (دە بريۋينە، 93, لۋكاكۋ، 105 – گرين، 107)

شيرەك فينالدا مىنا كوماندالار كەزدەسەدى:

 04.07. فرانتسيا – گەرمانيا                21.50                     «قازاقستان»

              برازيليا – كولۋمبيا             01.50     «ەۋرازيا»

05.07. ارگەنتينا – بەلگيا                21.50     «ەۋرازيا»

             گوللانديا – كوستا-ريكا          01.50    «قازاقستان»

 ساكەن سىبانباي

"الماتى اقشامى"