استاناداعى ونەر ۇلتتىق ۋنيۆەرسيتەتى جانىنان ايتىسكەرلەرگە جوعارى ءبىلىم بەرەتىن 30 ورىندىق توپ اشىلدى.

الايدا بۇرىن-سوڭدى ونەر رەتىندە تانىلعان ايتىستى ەندى جوعارى بىلىكتى كاسىپكە اينالدىرۋ ءىسى قولعا الىنۋدا دەگەن قوعامدىق پىكىر الۋاندىعى ءورشىپ تۇر. شىنىندا دا، ايتىسكەرلەرگە كاسىپتىك جوعارى ءبىلىم بەرەتىندەي نەگىز بەن سۇرانىس بار ما؟ بولسا قانداي؟ جوعارى بىلىمگە قوياتىن عىلىمي-پراكتيكالىق نەگىز قانشالىقتى؟ دەگەن ساۋالدار جەتكىلىكتى تۋىنداۋدا.

ايتىس تاقىرىبىنا قاتىستى عىلىمي كانديداتتىق قورعاعاندار ساناۋلى، بىراق ايتىستانۋ عىلىمى قالىپتاسقان جوق دەۋشى ساراپشىلار بار. بۇرىنعى كلاسسيك ادەبيەتشىلەر مەن كەيبىر ادەبيەتتانۋشىلاردىڭ ماقالالارى مەن ءىشىنارا زەرتتەمەلەرى عانا بار، ولار تىڭعىلىقتى عىلىمي سالاعا اينالىپ، جوعارى ءبىلىم كوزى بولا قويعاندىعى راس. ەندەشە، ايتىسفاكتا جوعارى عىلىمي ءبىلىم رەتىندە نە وقىتىلماقشى؟ ازىرگە كازىرگى ايتىسقا قاتىستى كوركەم سىن دا قالىپتاستى دەۋگە بولماس، ونىڭ باعالاۋ كريتەريلەرى دە انىقتالماعان. بۇگىنگى ايتىس قارادۇرسىن كوزقاراسپەن سۋبەكتيتۆتى تۇردە باعالاناتىنى جاسىرىن ەمەس.

بۇل سالاعا قاتىستى ماسەلەلەر مەن ۇدەرىستەردى تالدايتىنداي كونفەرەنتسيا، سيمپوزيۋم سەكىلدى عىلىمي وتىرىستار مەن جيىندار وتكەنى ەسىمىزدە جوق... بۇل جاعىنان العاندا ايتىس ماسەلەسىنە قاتىستى   عىلىمي الەۋەت جوعارى ماماندارمەن قامتيتىنداي تۇزىلگەن جوق.

باسقا جاعىنان قاراساق، ايتىسقا ديپلومنىڭ كەرەگى قانشا؟ ولار ايتىستى قالايشا كاسىپ ەتپەك؟ ايتىستىق ديپلوم بىزگە كىمدى، نەنى بەرەدى؟ ايتىستانۋشىنى ما، ايتىسكەردى مە؟ ديپلومسىز ايتىسكەرلەردى نە ىستەيمىز، ايتىسقا جولاتپايتىن بولامىز با؟ بۇعان دەيىن ايتىسقا قاتىستى جاستارعا ورتالىق ۇيىمداستىرا الماي كەلىپ، ەندى ديپلومدى ايتىسپەن ايدى اسپانعا شىعارا الامىز با؟

قاراپ وتىرساق، ايتىس – قازاق ونەرىنە قاتىستى ەسترادادان كەيىنگى كوپ اقشا اينالاتىن سالا ەكەن. ءبارى دە وسىدان تۋىنداپ وتىرماسا جارار ەدى...

ءشارىپحان قايسار

Abai.kz