قىتايدىڭ شىڭجاڭ وڭىرىندەگى ىلە، التاي، تارباعاتاي ايماقتارىن ءبىزدىڭ جۇرت «ارعى بەت» دەيدى. سول ارعى بەتتەن اتاجۇرتقا ورالعان قانداستارىمىزدىڭ قاتارى قالىڭ بۇگىندە. دەگەنمەن، بيىلعى جىل باسىندا كوشى-قون تۋرالى زاڭعا ەنگىزىلگەن وزگەرىستەر وتانىم دەپ كەلگەن تالاي «ورالماندى» ادام ايتسا سەنگىسىز قيىندىقتارعا تاپ قىلىپ وتىر. بۇل تۋرالى ايتۋىنداي ايتىپ، جازۋىنداي جازىپ كەلەمىز. مىنە، سول كەرى كەتكەن زاڭنىڭ العاشقى «ناتيجەسى» كورىنە باستادى.

تالدىقورعانداعى «الاش جۇرتى» قوعامدىق بىرلەستىگىنىڭ جەتەكشىسى انارحان ەرعازىنىڭ حابارلاۋىنشا، 100-گە جۋىق وتباسى اتتىڭ باسىن كەرى بۇرعان. ال تاعى دا كوشەمىز دەپ وتىرعانداردىڭ قاتارى بۇدان دا كوپ كورىنەدى. انارحاننىڭ ايتۋىنشا، مۇنىڭ ءبارى كوشى-قون تۋرالى زاڭعا ەنگىزىلگەن سوڭعى وزگەرىستەردىڭ كەسىرى. ايتالىق، ءوز كۇشىمەن كەلگەن اعايىن تۇراقتى تىركەۋگە تۇرا المايدى، ازاماتتىققا قۇجات وتكىزە المايدى، ىقتيار حات الا المايدى. ونىمەن قويماي وسى قۇجاتتاردىڭ ءبىر ۇشىن قىتاي كونسۋلىنا تىرەپ قويعان. ولارعا بارسا «قازاقستان وكىمەتى قازاققا ازاماتتىق بەرە مە، بەرمەي مە؟ وعان ءبىزدىڭ قاتىسىمىز جوق. قازاقستاننىڭ ىشكى ىسىنە ارالاسپايمىز» دەپ ات-تونىن الا قاشاتىن كورىنەدى.

ءسويتىپ، بار ۋاقىتىن كوشى-قون پوليتسياسىنىڭ ەسىگىن توزدىرۋمەن وتكىزگەن اعايىن ۆيزاسىنىڭ مەرىزمى اياقتالعان سوڭ «زاڭسىز كەلىمسەك» اتانىپ، كەرى قايتىپ جاتىر. وسى ماسەلەگە بايلانىستى الماتى وبلىستىق كوشى-قون ءبولىمىنىڭ قىزمەتكەرى قۇرمەتبەك سانسىزباي مىرزاعا حابارلاستىق. «ورالمانداردىڭ قۇجات ماسەلەسى تىكەلەي كوشى-قون زاڭىنا بايلانىستى. سوندىقتان قولدانىستاعى زاڭعا وزگەرىس ەنگىزىلگەنىن كۇتكەنىمىز ءجون. مەنىڭ بىلۋىمشە، بۇل ماسەلەنى ۇكىمەت باسشىسى كارىم ءماسىموۆ مىرزا تىكەلەي قاداعالاۋىندا ۇستاپ وتىر. جاقىندا جاقسى جاڭالىقتار بولىپ قالۋى مۇمكىن»، - دەيدى ول.

ايتپاقشى، بىلتىر موڭعولياعا كەرى كوشكەن 70 وتباسىنىڭ جايىن بىلگەن ەلباسى نۇرسۇلتان نازارباەۆ ءوزىنىڭ دۇنيەجۇزى قازاقتارىنىڭ قاۋىمداستىعىنداعى ورىنباسارى تالعات ماماشەۆقا شۇيلىككەن بولاتىن. كەيىن ەستىگەنىمىزدەي موڭعوليا پرەزيدەنتى تساحياگين ەلبەگدورج سول اعايىندارعا ازاماتتىق بەرىپ، ەلدەرىندە قالدىرىپتى.

ەستەرىڭىزدە بولسا، وسى ءساۋىر ايىندا قر ەڭبەك جانە حالىقتى الەۋمەتتiك قورعاۋ مينيسترi تامارا دۇيسەنوۆا كوشى-قون زاڭىنا وزگەرىستەر ەنگىزىلەتىنىن، ەلگە ورالعان اعايىنعا داڭعىل جول اشىلاتىنىن سۇيىنشىلەگەن. ودان بەرى دە 3 اي ۋاقىت ءوتتى. قانداستاردىڭ ءۇمىتى سۋ سەپكەندەي باسىلىپ بارادى. ال قازاقستاننىڭ الدىندا 2020 جىلى 20 ميلليونعا جەتەمىز دەگەن ۇلكەن ماقسات تۇر. مۇنداي جاعدايدا ول ماقسات كىمدەردىڭ ەسەبىنەن ورىندالادى، قالاي ورىندالادى؟.. ورىندالا ما؟ الدە قازاقستاننىڭ ەندىگى حالقى شەتەلدەردەن شەكتەۋسىز كەلىپ جۇمىس ىستەيتىن گاستاربايتەرلەر بولا ما؟

Abai.kz