1997 جىلى ءبىرىنشى كۋرستى ءبىتىرىپ، "جاس الاشقا" پراكتيكاعا باردىق. "قۇلاساڭ ناردان قۇلا" دەپ، بىردەن رەسپۋبليكالىق گازەتكە تارتىپپىز...  جانىمدا بايداليەۆا گۇلنارا دەگەن كۋرستاسىم بار. ءبىز بارعاندا گازەتتىڭ باس رەداكتورى تورەحان دانيار ەكەن دە، ورىنباسارى قاسىم ءازىمحان ەكەن. ارتىنشا نۇرتورە اعا كەلدى. داۋرەن قۋات، روزا قاراەۆا، تالعات ەشەنۇلى، ابىلاي سابدالين، عالىمجان مەلدەش، گۇلنار جۇمابايقىزى، ءساليما ىسقاقوۆا، گۋلزات نۇرمولداقىزى، ايگۇل حالىقوۆا سياقتى جۋرناليستەر ىستەيدى ول كەزدە. جولداسبەك دۋانابايدان تاپسىرما الىپ، ءبىر باتون نان مەن ءبىر "فانتانى" ساتىپ الىپ، ەكەۋمىز الدىمەن تاماقتانىپ الۋ ءۇشىن گوركي پاركىنە باردىق. كوك ءشوپتىڭ ۇستىنە وتىرا قالىپ، باتوندى سوعىپ الىپ، "سايرانعا" تارتتىق. "سايرانعا بار دا سايراندا" دەگەن تاقىرىپپەن ەڭ العاشقى اقپاراتىم 1997 جىلدىڭ ءدال 28 ماۋسىمىندا جارىق كورگەنىن ەشقاشان ۇمىتپايتىن شىعارمىن. تۋرا سول كۇنگى گازەتتىڭ توبەسىندە ء"تورتىنشى بيلىك، تورگە شىق!" دەگەن شاپكا بولعانى دا ەسىمدە. سودان كەيىن ءتورت جىل قاتارىنان "جاس الاشتان" تاجىريبەدەن وتتىك، روزا اپاي، ساكەن اعا، داۋرەن اعالاردىڭ تاپسىرماسىمەن جىل بويىنا دا ماتەريال جازىپ جۇردىك، ودان كەيىن وسى گازەتتە جۇمىس ىستەپ، ۇلكەن مەكتەپتەن ءوتۋ باقىتى دا بۇيىردى. تالاي ماقالامىز شىقتى. بىراق، سول العاشقى ماتەريالىم ىستىق! 

كاسىبي مەرەكە قارساڭىندا "جاسوركەندىك", "جاسالاشتىق", "تۇركىستاندىق" بارشا ارىپتەستەرىمدى قۇتتىقتاپ، دەندەرىنە ساۋلىق، ءۇي-ىشتەرىنە اماندىق تىلەگىم كەلەدى.

جۋرناليستيكانىڭ ارقاسىندا دوس-قۇربى تاپتىم، اعا-اپكە تاپتىم. ەل كوردىم، جەر كوردىم. ەڭ العاش 17 جاسىمدا جۋرناليست رەتىندە (ستۋدەنت رەتىندە ەمەس) ۇلكەن سەنىم ارتقان كاكەن حامزين اعايىما العىسىم شەكسىز! ەرىنبەي شيماي-شاتپاعىمىزدى قاراپ، ءجون سىلتەگەن، جول كورسەتكەن روزا اپايىم مەن ساكەن سىبانباي، داۋرەن قۋات اعايلارىما دا العىس ايتامىن. ءار كەزدەرى تاجىريبەمنىڭ جوقتىعىنا قاراماي، سەنىم ارتقان نۇرتورە ءجۇسىپ، ءشامشيدين پاتتەەۆ، جۇسىپبەك قورعاسبەك، داۋرەن ءابدىحاميتوۆ، مەرەكە قۇلكەنوۆ سياقتى ازاماتتارعا ريزاشىلىعىم زور. سونداي-اق، ۇنەمى قولداۋ ءبىلدىرىپ جۇرەتىن، قيىن كۇندەرى تەك مورالدىق جاعىنان ەمەس، ماتەريالدىق جاعىنان دا كومەگىن اياماعان سەيىتقازى ماتاەۆقا العىسىم زور. جالپى، العىس ايتاتىن ادامىم كوپ ەكەن. بارشاڭىزدى  كاسىبي مەرەكەمەن قۇتتىقتايمىن، دوستار! بار بولايىق، امان بولايىق!

(جۇلدىز ءابدىلدانىڭ www.facebook.com جەكە پاراقشاسىنان الىندى)