سەيسەنبى, 26 مامىر 2020
COVID-19 قازاقستاندا. جۇقتىرعاندار — 8531. جازىلعاندار — 4515. قايتىس بولعاندار — 35
قوعام 3106 0 پىكىر 17 ماۋسىم, 2014 ساعات 16:10

سوت «اڭىز ادامدى» 50 ميلليونعا جىعا ما؟

ەرتەڭ الماتى قالاسى، المالى اۋدانىنىڭ №2 سوتىندا «اڭىز ادام» جۋرنالىنا قاتىستى ەكىنشى سوت وتىرىسى وتەدى.

ءساۋىر ايىندا «اڭىز ادام» جۋرنالىنىڭ №8 سانىندا شىققان گيتلەرگە قاتىستى ماتەريال ءوزىمىز تۇگىلى كورشى رەسەيدى دە «شۋ ەتكىزدى». رەسەيدەن ەلىمىزگە ەدەل-جەدەل نوتا جەتىپ، باق سالاسى گۋىلدەپ كەتىپ ەدى، اتاپ ايتساق REGNUM «نوۆوستي» اقپاراتتىق اگەنتتىگىنىڭ اتى بەلگىسىز اۆتورى «اڭىز ادام» جۋرنالىن قارالاپ، «بۇل جۋرنال گيتلەردىڭ 125 جىلدىعىنىڭ قۇرمەتىنە باسىلدى، باسىلىم فاشيستىك يدەولوگيانى اقتاۋعا ارنالعان» دەپ كىنا تاققان بولاتىن. سودان سوڭ «ەكىنشى دۇنيە جۇزىلىك سوعىستىڭ ەڭ باستى قىلمىسكەرىنىڭ» 125 جىلدىعى تۋرالى مۇلدە ويلانباعان، ادولف گيتلەر تۋرلى جازۋ ارقىلى قوعامدىق قاۋىپسىزدىكتى تۋ ەتكەن جارىلقاپ قالىبايدى ءوزىمىزدىڭ قۇزىرلى ورگاندار سوتقا سۇيرەي جونەلدى. ماسەلەنى «ماي شاممەن قاراعان» ولار، قازاق ءتىلدى باسىلىمداردى وركەندەتۋدە مەنەدجەرلىك ىسكەرلىگىمەن دارا تۇرعان جۋرناليست ءھام «اڭىز ادام»، «جۇلدىزدار وتباسى» جۋرنالدارىنىڭ باس رەداكتورى جارىلقاپ قالىبايعا «باسىلىمداعى تەحنيكالىق قاتەلىكتەرى» ءۇشىن اكىمشىلىك سوتتا 200 اەك ايىپپۇل سالعان بولاتىن.

بۇل ارادا اۋعان سوعىسىنىڭ ارداگەرلەرى جيىلىپ، «28 پانفيلوۆشىلار» ساياباعىندا نارازىلىق رەتىندە جۋرنالدى وقىماستان ورتەگەنى ءوز الدىنا، جاسى 83 پەن 90-نىڭ اراسىنداعى 10 ارداگەر باسىلىمنىڭ «بۇقارالىق ناسيحاتىنا» الاڭداپ،  «تاپتالعان» مورالدىق قۇقىقتارىنىڭ  وتەمى رەتىندە   ءار قايسىسى 5 ميلليون تەڭگەدەن 50 ميلليون تالاپ ەتىپ، نوتاريۋس ارقىلى جارىلقاپ قالىبايدىڭ ۇستىنەن شاعىم ءتۇسىرىپ تە ۇلگەرگەن ەدى.

سوتتىڭ العاشقى وتىرىسىندا-اق قارتتار ۇيىندە تۇراتىن ارداگەرلەردىڭ جۋرنالدى مۇلدە وقىماعانى، ءتىپتى جۋرنالدى تانىمايتىنى بەلگىلى بولدى. ەرتەڭ بولاتىن سوت وتىرىسى الدىندا «اڭىز ادامنىڭ» باس رەداكتورى جارىلقاپ قالىبايعا قوڭىراۋ شالىپ، «دايىندىعىن» سۇراعان ەدىك:

«وزدەرىڭىز بىلەتىندەي، الدىڭعى جولى سوتتىڭ ءبىرىنشى وتىرىسى وتكەن بولاتىن. وندا ماعان ايىپتى ەمەس ەكەنىڭىز تۋرالى دالەل جيناپ كەلىڭىز دەپ شىعارىپ سالدى. مەن جۋرنالدا بارلىق دالەل جازىلعانى تۋرالى ايتتىم. كەرەك ەتسە، بۇكىل قازاق ينتەلليگەنتسياسىنىڭ داۋعا قالعان ماتەريالعا قاتىستى پىكىرى دە بار، ولار «اڭىز ادام» جۋرنالىنىڭ داۋعا قالعان 8-سانىن ءۇتىر-نۇكتەسىنە دەيىن قالدىرماي وقىدىق،  ەشقانداي دا گيتلەردى دارىپتەۋ نەمەسە فاشيزمدى ناسيحاتتاۋ جوق دەپ پىكىرلەرىن ءبىلدىردى. ال جۋرنالدى مۇلدە وقىماعان، ءتىپتى قازاقشا ساۋاتى جوق ون ارداگەر مەنى نوتاريۋس ارقىلى «سوتقا بەرىپتى». مەن بۇكىل قازاق ينتەلليگەنتسياسىنا ەمەس، جۋرنالمەن تانىس ەمەس ون ارداگەرگە سەنىپ، اقتى قارا دەپ وتىرعان سوتقا تاڭ قالامىن! ولار ەرتەڭ مەنى قارالاۋى مۇمكىن، مەن اپەللياتسيا بەرۋگە ءماجبۇر بولام، ولار مەنى سولاي تيتىقتاتقىسى كەلەتىن شىعار. الايدا گيتلەردى جەڭگەن قازاق، گيتلەردىڭ اتىنان جەڭىلە مە»، - دەيدى «اڭىز» جۋرنال «اڭىز ادامنىڭ» باس رەداكتورى.

قازاق باسىلىمىنىڭ قاتارى بىرەۋگە سيرەپ قالا ما دەپ، ىشتەن تىنعان قالىڭ وقىرماننىڭ كۇپتى كوڭىلى ەرتەڭگى سوتتىڭ ادىلدىگىنەن ءۇمىت كۇتەدى.

 

نۇرتاي نۇرعالي

 

Abai.kz

0 پىكىر