ۋكراينادان ءبىر توپ بالالار ۇرلانىپ، رەسەي تەرريتورياسىنا اكەتىلگەن.  بۇل تۋرالى ۋكراينانىڭ قازاقستانداعى ەلشىلىگىنە سىلتەمە جاساپ Tengrinews.kz حابارلادى. ناقتىراق ايتاتىن بولساق،  12 ماۋسىمدا دونەتسك وبلىسىنىڭ سنەجنوە قالاسىندا  ءبىر توپ قارۋلى «دنر» وكىلدەرى ۋكراينانىڭ 28 ازاماتىن ۇرلاپ كەتكەن. ولار دنەپروپەتروۆسك وبلىسىنا ەمدەلۋگە بارا  جاتقان بالالار ءۇيىنىڭ 25 جەتكىنشەگى جانە جەتەكشىلەرى. قارۋلى ادامدار بالالار مىنگەن اۆتوبۋستىڭ جۇرگىزۋشىسىن باعىتىن وزگەرتۋگە ماجبۇرلەپ، لۋگانسك وبلىسى ارقىلى رەسەيگە ءوتىپ كەتۋگە بەتتەگەن. ۋكراينا ەلشىسىنىڭ ايتۋىنشا، توعىز بالامەن قوسا ءبىر جەتەكشى شەكارادان ءتۇسىرىلىپ، قالعان 18 ادام رف تەرريتورياسىنا اكەتىلگەن. قازىرگى كۇندە ولار رەسەيدىڭ روستوۆ وبلىسىندا.

ۋكراينا ەلشىسى بۇل وقيعانى «اتالعان جاعداي رەسەي تاراپىنان جاسالعان بالالار قۇقىعى تۋرالى حالىقارالىق تالاپتاردىڭ اۋىر دارەجەدە بۇزىلۋى بولىپ سانالادى. بۇل بالالار قۇقىعى تۋرالى بۇۇ كونۆەنتسياسىنىڭ 11, 35 باپتارىنا قايشى. اتالعان جاعداي حالىقارالىق ادام ۇرلاۋ فاكتىسى رەتىندە اۋىر قىلمىس» دەپ ايىپتاپ وتىر.

رەسەي جاعىنىڭ ۋكراينا ازاماتتارىن  كەپىل ەتىپ، ساياسي ويىن ويناۋى الەمدىك قاۋىمداستىق الدىندا ءتيىستى جاۋابىن الۋى ءتيىس دەپ سانايتىن ۋكراينا ەلشىسى قازاقستاننىڭ سىرتقى ىستەر مينيسترلىگىنەن اتالعان ماسەلەگە ءۇن قاتۋدى سۇراعان.

بۇعان قوسا ءساۋىر ايىندا وزدەرىن تاۋەلسىز مەملەكەت دەپ جاريالاپ العان دونەتسك رەسپۋبليكاسى 12 ماۋسىمدا ۇكىمەت وتىرسىن وتكىزىپ، 2015 جىلى كەدەندىك وداققا قوسىلۋ ماسەلەسىن تالقىلاعان. بۇل تۋرالى دنر ۇكىمەتىنىڭ ۆيتسە-پرەمەر اندرەي پۋرگين مالىمدەگەن. ەگەر رەسەيدەن باسقا بىردە ءبىر ەل مويىنداماعان دنر كەدەندىك وداققا كىرۋگە ءوتىنىش بەرەتىن بولسا، كەدەندىك وداق ەلدەرى ءوتىنىشتى بىرگە قاراۋى ءتيىس.  كەشە عانا لۋگانسك رەسپۋبليكاسى تاۋەلسىزدىگىن مويىنداۋدى قازاقستاننان تالاپ ەتتى. جوعارىداعى جاعدايدىڭ ءبارى قازاقستاندى ۋكرايناعا قاتىستى رەسەيدىڭ قيتۇرقى ساياساتىنا ارالاسۋعا ماجبۇرلەيدى. ەكى ەلدىڭ اراسىنداعى شيەلەنىستى جاعدايعا ساياسي جاعىنان وقشاۋ جاتقان قازاقستان نەگە ارالاسۋى ءتيىس، ءبىز وسى جاعىن تۇسىنە المادىق.

نۇرعالي نۇرتاي

Abai.kz