قازىرگى تاڭدا ءبىزدىڭ قوستانايدا «دونباسس بالالارىن قۇتقارايىق!» دەگەن ۇران كوتەرىلىپ، ءبىراز جۇرت دۇرلىگىپ جاتىر. اسىرەسە، ءورىستىلدى ءباسپاسوزدىڭ قۇدايى بەرىپ قالدى. ولار جوعارىداعى ۇراندى الاۋلاتىپ تۋ قىلىپ ۇستاعان ەلەكتروندى فلەشموبقا الەم جۇرتشىلىعى كوز تىگىپ وتىر، مۇنى ءبارى قولداپ جاتىر دەپ اكەلدەرى ۇل تاپقانداي قۋانىپ جاتىر. سول ءباسپاسوزدىڭ تىلىمەن ايتساق، جاڭاعى سايتتارعا جەر شارىنىڭ بارلىق ادامزات قاۋىمى جانتالاسىپ قوسىلىپ جاتقانعا ۇقسايدى.

    مۇنداي باسپاسوزگە سەنەر بولساق، جاڭاعى اكتسياعا قوسىلۋدىڭ قيىندىعى جوق كورىنەدى. تەك «دونباسس بالالارىن قۇتقارايىق!» دەگەن ۇرانعا سۋرەت قوسىپ، ينتەرنەتتەگى ءوزىڭىزدىڭ الەۋمەتتىك جەلىڭىزگە ورنالاستىرساڭىز بولدى. ال مۇنداي سايتتار تولىپ جاتقان كورىنەدى.

     ماسەلەن، وسىنداي ساتتاردىڭ ءبىرى—http//vk.com/public72169780 الەۋمەتتىك جەلىسىندەگى جەلىككەندەردىڭ ءبىر توبى “حالايىق، بىرىگىەيىك تە، وسىعان قوسىلايىق. ونداعىلار ءبىزدىڭ باۋىرلار عوي» دەپ كوز جاسىن كولدەتىپ وتىرعانى بايقالادى. ال ەندىگى ءبىر http//Iikepic.ru/2014/save-donbass-children  سايتىندا دونباستاعى قولىنا قارۋ الىپ كۇرەسكەن سەپاراتيستەردىڭ بالالارىنا قانداي كومەك كورسەتۋ كەرەك ەكەندىگىن تاپتىشتەپ ءتۇسىندىرىپتى. نە دەگەن جاناشىرلىق دەسەڭىزشى. ءتىپتى ءبىر قىزىعى، مۇنداي اكتسياعا ءبىراز جۋرناليستەر دە بەل شەشە كىرىسىپ كەتىپتى.

    سوندا مۇنداي ارانداتۋشىلىقتىڭ ساسىق ءيسى شىعىپ تۇرعان اكتسيانى قالاي باعالايمىز؟ ءوزىمىز سەكىلدى كەشە عانا تاۋەلسىزدىك العان ەلدىڭ تۇتاستىعىنا قارسى قولىنا قارۋ الىپ قارسى شىققان تەرىس پيعىلدى سەپاراتيستەردىڭ قولتىعىنا سۋ بۇرىككەنىمىز بە بۇل؟ ۋكراين حالقى مۇنىمىزدى دۇشپاندىق دەپ باعالاماسىنا كىم كەپىلدىك بەرەدى؟

    ايتپاقشى، بۇل باستامامىز انا شىمكەنتتە دە جالعاسىپ تاپقان كورىنەدى. وندا دونباسسقا كومەك دەپ ءارتۇرلى ازىق-تۇلىك پەن ءدارى-دارمەك جينالىپ جاتقاندىعى تۋرالى  Mail.ru مەن Nur.kz سەكىلدى سايتتار قۋانا حابارلاپ جاتقاندىعىن وقىدىق. ءسىرا، بۇل باستامانىڭ بۇكىلحالىقتىق سيپات الىپ كەتەتىن ءتۇرى بار.

مۇراتبەك داۋرەنۇلى.

قوستاناي.

Abai.kz