راحات اليەۆتى قاماۋدا ۇستاۋ مەرزىمى 20 ماۋسىمعا دەيىن ۇزارتىلادى. بۇل تۋرالى ارا باسىلىمىنا سىلتەمە جاساپ Tengrinews.kz جازدى. "جۇما كۇنى ۆەنانىڭ مەملەكەتتىك سوتى اۆستريانىڭ بۇرىنعى ەلشىسى راحات اليەۆتى قاماۋ مەرزىمىن جاريا ەتتى.  قاماۋ مەرزىمى 20 ماۋسىمعا دەيىن ۇزارتىلدى" دەپ جازىلعان اتالمىش باسىلىمدا.

قازاقستاننىڭ اۆسترياداعى ەكس-ەلشىسى راحات اليەۆ 5 ماۋسىم كۇنى ۆەنادا قۇقىق قورعاۋ ورگاندارىنا ءوز ەركىمەن بەرىلگەن بولاتىن. ونى تۇتقىنداۋعا مامىر ايىندا وردەر بەرىلگەن. اليەۆ سول سەبەپتى قۇزىرلى ورگانداردىڭ ىسىنە «كومەكتەسكىسى» كەلگەن. بىراق ول قازاقستانعا قايتارىلمايدى.

Daily Times گازەتىنە سۇحبات بەرگەن اليەۆتىڭ ادۆوكاتى مانفرەد انيتەر (Manfred Ainedter), ونىڭ قورعاۋىنداعى ادام ءوز ەركىمەن اۆسترياعا ورالىپ تەرگەۋگە كومەكتەسكىسى كەلەتىنىن ايتقان. راحات اليەۆ   5 ماۋسىم كۇنى كەشكى 23:00 شاماسىندا اۋەجايدا پوليتسيانى ءوزى كۇتىپ تۇرعان جەرىندە ۇستاعان.

ەسكە سالايىق، قازاقستان سوتى راحات اليەۆتى ەكى بانكيردىڭ (جولداس تەمىراليەۆ پەن ايبار حاسەنوۆ) ولىمىنە كىنالى دەپ تاپقان بولاتىن. بۇل ەكەۋى 2007 جىلى ۇرلانىپ كەتكەن، ولاردىڭ ءمايىتى 2011 جىلى تابىلدى. اليەۆكە ەلىمىزدە  40 جىلعا باس بوستاندىعىنان ايىرۋ جازاسىن بەرۋگە سىرتتاي ۇكىم شىعارىلدى. راحات اليەۆ ۇلتتىق قاۋىپسىزدىك كوميتەتىنىڭ باسشىسى، پرەزيدەنت كۇزەتىنىڭ باسشىسى سياقتى جوعارى لاۋازىمداردى اتقارعان. سونداي-اق پرەزيدەنت نۇرسۇلتان نازارباەۆتىڭ قىزى، پارلامەنت دەپۋتاتى داريعا نازارباەۆانىڭ بۇرىنعى كۇيەۋى.

اۆستريا اليەۆكە ءوز وتانىندا ءادىل سوت تورەلىگى قامتاماسىز ەتىلمەيدى دەگەن شامالاۋمەن ونى قازاقستانعا بەرۋدەن ەكى رەت باس تارتتى.  2011 جىلدىڭ شىلدەسىندە قۇقىق قورعاۋ ورگاندارى مالتاعا كەتىپ ۇلگەرگەن بۇرىنعى ەلشىگە قاتىستى وزىندىك تەرگەۋ باستادى.

اباي-اقپارات