كارىم ءماسىموۆ سەنبى كۇنى كيەۆتە وتكەن ۋكراينا پرەزيدەنتى پەترو پوروشەنكونى ۇلىقتاۋ راسىمىنە قازاقستاندىق دەلەگاتسيانى باسقارىپ باردى. يناۋگۋراتسيا شاراسىنان كەيىن قر ۇكىمەتىنىڭ باسشىسى كارىم ءماسىموۆ پەن مەملەكەتتىك توڭكەرىستەن كەيىن ۋكراينا پرەمەر-ءمينيسترى بولىپ تاعايىندالعان ارسەني ياتسەنيۋك كيەۆتە ارىپتەستىك كەزدەسۋ وتكىزدى. كەزدەسۋ بارىسىندا جاقىن ارادا ەكونوميكالىق ىنتىماقتاستىق جونىندە بىرىككەن مەملەكەتارالىق كوميسسيانىڭ كەزەكتى وتىرىسىن وتكىزۋ تۋرالى ءوزارا كەلىسىمگە كەلدى. قازاقپاراتتىڭ حابارلاۋىنشا بۇل تۋرالى ۋكراينالىق مينيسترلەر كابينەتىنىڭ ءباسپاسوز قىزمەتى حابارلاعان.
«ەكى ەلدىڭ مەملەكەت باسشىلارى جاقىن ارادا ەكونوميكالىق ىنتىماقتاستىق جونىندە بىرىككەن مەملەكەتارالىق قازاقستاندىق-ۋكرايندىق كوميسسيانىڭ كەزەكتى وتىرىسىن وتكىزۋ تۋرالى ءوزارا كەلىسىمگە كەلدى. بۇل شارادا بىرقاتار پەرسپەكتيۆالى ەكىجاقتى جوبالار، اتاپ ايتقاندا، عارىش سالاسىنداعى جوبالار بولاشاعى قاراستىرىلماق»، - دەلىنگەن حابارلامادا.

كەزدەسۋ بارىسىندا ياتسەنيۋك قازاقستان مەن ۋكراينانىڭ اراسىنداعى ساۋدا-ەكونوميكالىق بايلانىستاردىڭ ماڭىزدى ءرولىن اتاپ ءوتتى. ونىڭ ايتۋىنشا، ۋكراينا ءۇشىن قازاقستان نارىعى ماڭىزدى. سونداي-اق ول قازاقستاننىڭ ەۋرازيالىق ەكونوميكالىق وداققا مۇشە بولۋى سەبەپتى ەكىجاقتى ساۋدا-ساتتىقتىڭ ءوزارا ءتيىمدى جولدارىن تابۋ قاجەتتىگىن دە  باسا ايتقان.

اباي-اقپارات