جۇمىستىڭ وڭايى جوق. قاي جۇمىس بولسا دا وزىندىگىمەن ەرەكشەلەنەدى. مىسالى، قۇرىلىسشىلار حالىقتىڭ باسپاناسىن، باسقا دا ونەركاسىپتىك، قوعامدىق، اكىمشىلىك، مادەني جانە ت.ت. عيماراتتاردى تۇرعىزادى. ولاردىڭ سول ۇيلەردە، عيماراتتاردا قولتاڭباسى، ماڭداي تەرى قالادى. ولار سونىسىمەن دە ماقتانادى. ءاربى ماماندىق يەسى دە وسىنداي ەرەكشەلىكتەرىمەن ماقتانا الادى. ويتكەنى، ولار وزدەرى ءۇشىن عانا ەڭبەك ەتپەيدى.، باسقالارعا دا قىزمەت ەتەدى، العىسىن الادى. بىراق، مەنىڭ ايتپاعىم بۇل ەمەس.

“جۇمىستىڭ ەڭ اۋىرى – جۇمىس ىزدەۋ” دەگەندى ەستۋشى ەدىم. بىراق، ودان دا اۋىرى بار ەكەن. جۇمىس ىستەۋ ءۇشىن ەڭ الدىمەن جۇمىسقا بارۋ كەرەك ەمەس پە؟ اركىمنىڭ ءۇيىنىڭ جانىندا دايىن تۇرعان جۇمىس بار دەيسىز بە؟ 

مەن قىزىلوردادان وتكەن جازدا كوشىپ كەلدىم. جۇمىس ىزدەۋ قيىن بولمادى. ءبىر كۇندە-اق ءوزىمنىڭ ماماندىعىما سايكەس جۇمىس تا تابىلا كەتتى. قينالماي جۇمىس تاپقانىما دا قۋاندىم. الماتىداي الىپ شاھاردا جۇمىس جەتەرلىك ەكەن .

بىراق، قيىنشىلىقتىڭ كوكەسىن جۇمىستان ەمەس، جۇمىسقا بارىپ قايتۋدان كوردىم. جۇمىس تاڭەرتەڭگى سەگىز جارىمدا باستالادى. العاشقى كۇنى ۋاقىتىمدى ارتىعىمەن ەسەپتەپ ۇيدەن شىقتىم. سوعان قاراماستان جۇمىسقا كەشىگىپ باردىم. كەشىكپەيىن دەسەم دە، كەشىگۋگە ءماجبۇر ەتتى. كەلەسى كۇننەن باستاپ جۇمىسقا ەكى ساعات بۇرىن شىعاتىن بولدىم. قوعامدىق كولىككە وتىرۋ دا مۇڭ بولدى. اۆتوبۋس ەسىگىنەن ءبىر اياعىمىزدىڭ ەنگەنىنە دە قۋاناتىن بولدىق. ويتكەنى، كەيبىر اۆتوبۋستار ايالدداماعا توقتاماي دا كەتەدى. ونداي كەزدە جەڭىل اۆتوكولىكتەرگە (تاكسي ەمەس) قول كوتەرەمىز. ولار دا جولى ءبىر باعىتتا بولسا 200-300 تەڭگەگە الا كەتەدى. ولارعا دا راحمەت. كەشىگۋگە بولمايدى. ەڭبەك ءتارتىبى سولاي.

جۇمىستان شارشاپ شىققاندا، ودان قايتۋ دا وڭايعا سوقپايدى. جۇمىسقا كەلگەندەگى جاعداي تاعى دا قايتالانادى.  اكىمدىككە، باسقا دا بيلىك ورىندارىنا رەنىش تە وسىندايدان تۋىندايدى. ولار دا بۇل جاعدايدى بىلمەي وتىرعان جوق. قولدارىنان كەلگەنىن ىستەپ-اق جاتىر. بىراق، ودان باسقا دا جاعدايدىڭ، اتاپ ايتقاندا، قوعامدىق كولىكتەگى ءتارتىپتىڭ اقساپ جاتقانىن كۇندە كورىپ جاتىرمىز. بۇل تۋرالى از ايتىلىپ تا، جازىلىپ جاتقان جوق. تاڭعى جانە كەشكى ۋاقىتتارداعى اۆتوبۋستاردىڭ قوزعالىس جيىلىگى (ينتەرۆالى) 7-10 مينۋت بولعانىمەن، كەيدە بۇل جيىلىكتىڭ 15-20 مينۋتقا، ءتىپتى ودان دا كوپ ۋاقىتقا سوزىلىپ كەتەتىنىنە ءجيى كۋا بولامىز. سوندىقتان دا ءتيىستى ورىندار وسىعان كوبىرەك كوڭىل بولسە ەكەن دەيمىز.

الماتىلىقتاردىڭ كوپشىلىگى جۇمىستان ەمەس، جۇمىسقا بارىپ كەلۋدەن شارشايدى. وتباسىنداعى اڭگىمەنىڭ ءبىر بولىگى وسى تۋرالى بولىپ كەلەدى. قالالىقتار اكىمدىكتەن بار مۇمكىندىكتى جاساۋدى، جاعدايدى تولىعىمەن تۇزەمەسە دە، ءبىرشاما رەتكە كەلتىرۋدى سۇرايدى. قالاي بولعاندا دا جۇمىس ىستەۋدەن ەمەس، جۇمىسقا بارىپ قايتۋدان شارشامايتىن بولايىقشى.  جۇمىس ىستەۋدەن شارشاعان ەشتەڭە ەمەس. ويتكەنى، شارشاپ جۇمىس ىستەۋدىڭ دە ءوز شاراپاتى بولادى. سوندىقتان اكىمدىكتەن “جۇمىسقا بارىپ قايتۋ شارشاۋىنان” قۇتقارسا دەيمىز. ويتكەنى، قازىر “جۇمىستىڭ ەڭ اۋىرى جۇمىسقا بارىپ قايتۋ” بولىپ تۇر. ءومىرىمىزدىڭ 3-4 ساعاتى جۇمىسقا بارىپ قايتۋعا كەتسە، ودان اۋىر نە نارسە بولماق؟

بەكمىرزا سىرىمبەتۇلى.

(اۆتوردىڭ اباي.kz پورتالىنىڭ پوشتاسىنا جولداعان حاتىنان)