قازاق جۇرتى ەسەپتى جىلدى ەكشەپ، ەسكى – قۇسقىسىن قاعىپ سىلكىپ جاتقاندا ورىس ەلى «رەسەي فەدەراتسياسىنىڭ جاڭا اسكەري دوكتريناسىن» قابىلدادى. رەسەي پرەزيدەنتى ۆلاديمير پۋتين جاڭا رەداكتسيادا جازىلعان ەلدىڭ باس اسكەري قۇجاتىن كوپكە سوزباي-اق بەكىتتى. 
جالپى، كورشى ەلدىڭ ىشكى شارۋاسى عوي دەپ قويا سالاتىن-اق اقپارات بۇل. بىراق، قاڭتاردىڭ ءبىرىنشى جۇلدىزىنان باستاپ ەڭ جاقىن ەكونوميكالىق وداقتاسىمىز بولىپ تابىلاتىن رەسەيگە قاتىستى قانداي دا ءبىر حابارعا بەي-جاي قاراۋعا بولمايدى. بۇل تەك ەلدىك مۇددەنى قورعاۋ تۇرعىسىنان العانداعى ۇلتتىق قاۋىپسىزدىك ماسەلەسى عانا ەمەس، دامۋ ءۇردىسى تالابىنان قاراعانداعى باسەكەگە قابىلەتتىلىك تالابى بولىپ وتىر. مۇنىڭ سىرتىندا وتاندىق اقپارات كەڭىستىگىندەگى ورىس ەلىنە دەگەن تاۋەلدىلىكتىڭ تۋى جەلبىرەپ تۇرعاندا تىپتەن ويلاندىراتىن-اق جايت…

ءجا، سونىمەن جاڭا رەداكتسيادا جازىلعان رەسەيدىڭ باس اسكەري قۇجاتىندا نە قامتىلعان؟ باستان-اياق وقىعان ساراپشىلاردىڭ پىكىرىنشە، رەسەي الەم ساناساتىن اسكەري دەرجاۆا بولىپ تابىلادى. جالپى دۇنيەلىك ءتارتىپتىڭ وزگەرۋى رەسەيدىڭ دە اسكەري ۇستانىمدارىن قايتا قاراۋعا ءماجبۇر ەتكەن. بۇل دوكترينادا ىشكى جانە سىرتقى قاتەرلەردەن قورعاۋ مەن الدىن-الۋ جولدارى قارالادى. ءتىپتى، اسكەري قۇجاتتىڭ قابىلدانۋىن تەزدەتۋگە «اسكەري قاۋىپ-قاتەرلەردىڭ رەسەي فەدەراتسياسىنىڭ ىشكى سفەراسى مەن اقپارات كەڭىستىگىنە ويىسۋ تەندەنتسياسى بايقالعانى» قامشى بولعان. بۇل ورىس مەملەكەتىنىڭ ىشكى قاۋىپتەن ساقتانۋ جولدارىن ايشىقتاپ بەرەتىن باعىت بولماقشى. مىسالعا، ىشكى قاۋىپ رەتىندە سىرتقى كۇشتەر تاراپىنان «پاتريوتتىق، رۋحاني، تاريحي داستۇرلەردى بۇزۋ ماقساتىندا حالىققا، اسىرەسە جاستارعا اقپاراتتىق تۇرعىدا اسەر ەتۋگە تىرىسۋ» تەندەنتسياسى بايقالعانى ايتىلعان جانە ودان قورعانۋ جولدارى قاراستىرىلعان.

ال، سىرتتان تونەتىن نەگىزگى قاۋىپ-قاتەرگە ناتو-نىڭ قۇرىلىمدىق قۋاتىنىڭ ارتۋى، وسى وداققا حالىقارالىق قۇقىقتى بۇزا وتىرىپ، ەرەكشە جاھاندىق فۋنكتسيالاردىڭ بەرىلۋى، سولتۇستىك اسكەري اليانس ينفراقۇرىلىمىنىڭ رەسەي شەكاراسىنا جاقىنداۋى، كورشى ەلدەر اۋماعىندا شەتەلدىك اسكەري كونتينگەنتتەر مەن زىمىرانعا قارسى قورعانىس جۇيەسىنىڭ ورنالاسۋى جاتقىزىلعان. سونداي-اق الەمدىك دەرجاۆالاردا رەسەيدىڭ جانە ونىڭ وداقتاستارىنىڭ ىشكى ىسىنە ارالاسۋ مەن تەرريتوريالارىن تارتىپ الۋ نيەتى پايدا بولىپ وتىرعانى دا مەملەكەتتىڭ اسكەري ۇستانىمدارىنا ساق بولۋ كەرەكتىگىن تۋىعىزعان.

ايتپاقشى، بۇعان دەيىن بيىك مىنبەرلەردەن ايتىلىپ جۇرگەن ۆلاديمير ءپۋتيننىڭ ەسكەرتپە ءسوزى رەسمي زاڭ تۇرعىسىنان بەكىدى. ەندى رەسەي جاڭا اسكەري دوكتريناسى بويىنشا «ەل اۋماعىنان تىس ايماقتاردا تۇرىپ جاتقان ازاماتتاردى (سىرت مەملەكەتتەردە ءومىر ءسۇرىپ وتىرعان ورىستاردى دەپ قابىلداۋعا بولادى – اباي.kz ) قورعاۋ ءۇشىن اسكەري قارۋلى كۇشىن قولدانا الادى...»

اباي.kz