«ەلدەستىرمەك - ەلشىدەن» دەگەن. رەسەي فەدەراتسياسىنا مارات ءتاجين ەلشى بولىپ بارعالى ەكى ەل اراسىنداعى ساياسي-ەكونوميكالىق قارىم-قاتىناس مادەني بايلانىستارمەن جالعاسىن تابۋدا. اسىرەسە، اقىن-جازۋشىلاردىڭ اراسىندا بولعان بۇرىنعى دوستىق راۋىشتەگى جۇزدەسۋلەر، شىعارماشىلىق دەڭگەيدەگى ارىپتەستىك قايتادان جاندانا باستادى. رۋحانيات الەمىندە تابىسۋ – تاراپتاردىڭ ورتاسىنداعى تابىستىڭ ۇلكەنىنە ەسەپ. ارينە، ساياسات تۋرالى اڭگىمە بولەك. مىسالى،  15 جەلتوقساندا ماسكەۋدەگى «لوتتە» قوناقۇيىندە قازاقستان رەسپۋبليكاسىنىڭ تاۋەلسىزدىك كۇنىنە وراي وتكەن سالتاناتتى قابىلداۋدا مارات ءتاجين مىرزا «2014 جىل ەكى ەلدىڭ قارىم-قاتىناسى بىرقاتار ولقىلىقتى وقيعالارعا تولى بولدى» دەدى. بىراق، ەلشى الگى ولقىلىقتاردىڭ اتىن اتاپ، ءتۇسىن تۇستەگەن جوق.  بۇل تۋراسىندا رەداكتسيامىزعا قازاقستاننىڭ رەسەيدەگى ەلشىلىگىنىڭ ءباسپاسوز قىزمەتى حابارلادى.

رەسەيدەگى قازاقستان ەلشىلىگى ازىرلەگەن رەسمي كەشكە رەسەي پرەزيدەنتى اكىمشىلىگىنىڭ جانە ۇكىمەتىنىڭ وكىلدەرى، مەملەكەتتىك دۋما جانە فەدەراتسيا كەڭەسىنىڭ دەپۋتاتتارى، ماسكەۋدە تىركەلگەن شەت ەلدىك ديپلوماتيالىق وكىلدىكتەر مەن حالىقارالىق ۇيىمداردىڭ باسشىلارى، عىلىم جانە مادەنيەت قايراتكەرلەرى، جەرگىلىكتى باق باسشىلارى، رەسەيلىك تىلشىلەر، قازاق دياسپوراسى قاتىستى.

ءسوز باستاعان قازاقستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى مارات ءتاجين قازاقستان تاۋەلسىزدىكتى العاننان بەرى ەلىمىز ءبىراز زامان قيىندىقتارىنان ءوتىپ، ساياسي تۇراقتىلىعىمەن، بەلسەندى ەكونوميكالىق دامۋمەن جانە بەدەلدى سىرتقى ساياساتپەن بەلگىلى بولعان مەملەكەت رەتىندە تولىعىمەن قالىپتاسىپ ۇلگىردى.

«كەلەسى جىلدان باستاپ ەلباسى نۇرسۇلتان نازارباەۆ ءوز جولداۋىندا جاريالاعانداي ەكونوميكالىق مودەرنيزاتسيانىڭ جاڭا كەزەڭى باستالادى، - دەدى ەلشى. – «نۇرلى جول» دەپ اتالعان جاڭا ەكونوميكالىق ساياسات ورتا مەرزىمدە ەلىمىزدىڭ قارقىندى دامۋىنا جاڭا مۇمكىندىكتەر بەرەدى».

مارات ءتاجيننىڭ ايتۋىنشا، رەسەيمەن دوستىق قارىم-قاتىناس ەلىمىزدىڭ سىرتقى ساياساتىنىڭ باستى باسىمدىعى بولىپ قالۋدا. قازاقستان ديپلوماتى ەكى ەل اراسىنداعى ىنتىماقستىق ارقاشاندا دوستىق پەن وداقتاستىق باعىتىمەن دامي بەرەتىنىنە نىق سەنىم ءبىلدىردى.

«2014 جىل بىرقاتار ولقىلىقتى وقيعالارعا تولى بولدى، - دەدى ەلشى. – 2015 جىلعى 1 قاڭتاردان باستاپ ەكونوميكالىق دامۋ، پراگماتيزم، ەرىكتىلىك جانە تەڭ قۇقىقتىق قاعيداتتارىنا سۇيەنگەن ەۋرازيا ەكونوميكالىق وداعى جۇمىس ىستەي باستايدى».

رف ستاتس-سەكرەتارى – سىرتقى ىستەر ءمينيسترىنىڭ ورىنباسارى گريگوري كاراسين بارلىق قازاقستاندىقتاردى تاۋەلسىزدىك كۇنىمەن قۇتتىقتاپ، ەلىمىزدىڭ دامۋىنا جوعارى باعا بەردى جانە 2014 جىلى قازاقستاندىق-رەسەيلىك   قارىم-قاتىناستاردىڭ اسا جەمىستى بولعانىن ايتىپ ءوتتى.

«وتكەن جىلدار ىشىندە قازاقستان الەۋمەتتىك-ەكونوميكالىق دامۋىندا ماڭىزدى تابىستارعا قول جەتكىزدى، ايماقتاعى جانە الەمدەگى بەدەلىن ارتتىردى. ونىڭ سىرتقى ساياسي باعىتى حالىقارالىق قوعامداستىق الدىندا ۇلكەن قۇرمەتكە يە بولۋدا. رەسەيلىك-قازاقستاندىق قاتىناستار ستراتەگيالىق سەرىكتەستىك پەن وداقتاستىق باعىتىمەن دامىپ كەلەدى. ەكىجاقتى قاتىناستارىمىز - ءوزارا تۇسىنۋشىلىكپەن، تاراپتار مۇددەلەرىن ءوزارا قۇرمەتتەۋمەن، ىقپالداستىقتىڭ بارلىق باعىتتارى بويىنشا تىعىز ىنتىماقتاستىقپەن، ساياسي سۇحباتتىڭ جوعارى قارقىندىلىعى جانە ناتيجەلى بولۋىمەن ەرەكشەلەنۋدە»، - دەدى گ.كاراسين.

ونىڭ پىكىرى بويىنشا، ەكى ەل اراسىنداعى قارىم-قاتىناستاردى نىعايتۋ ەۋرازيا وڭىرىندەگى قاۋىپسىزدىكتى ساقتاۋدىڭ باسىم فاكتورلارىنىڭ ءبىرى بولىپ تابىلادى.

سالتاناتتى ءىس-شارا بارىسىندا «قازاقستاننىڭ جاڭا كورىنىستەرى» اتتى فوتوكورمە ۇسىنىلدى جانە ەتنو-ەراتو ۇلتتىق كيىم كورمەcى ۇيىمداستىرىلدى.

قوناقتار قازاقتىڭ ۇلتتىق داستۇرلەرىمەن تانىسىپ، «ا-ستۋديو» توبىنىڭ جانە «گولوس» شوۋ باعدارلاماسىنىڭ قاتىسۋشىسى ديانا شاراپوۆانىڭ بەلگىلى اندەرىن تاماشالادى جانە تومەندەگىدەي جىلى لەبىزدەرىن ءبىلدىردى.

رەسەيلىك يۋموريست، ءانشى جانە تەلەجۇرگىزۋشى ۆلاديمير ۆينوكۋر:

-         مەن ءۇشىن قازاقستان ەرەكشە جاقىن ەل. 1970-ءشى جىلداردان باستاپ سىزدەردىڭ رەسپۋبليكالارىڭىزعا گاسترولمەن جيە بارىپ تۇرامىن. از ۋاقىتتا قازىرگى زامانعا ساي جاڭا ەلوردالارىڭىزدىڭ - استانا قالاسىنىڭ بوي كوتەرگەنىنە جانە ەلدەرىڭىزدىڭ قارقىندى دامىپ كەلە جاتقاندىعىنا شىن قۋانىشتىمىن.  

بۇرىنعى كەڭەس وداعىنىڭ قاھارمانى رۋسلان اۋشەۆ:

-         قازاقستان – مەنىن ەكىنشى وتانىم، سەبەبى كوكشەتاۋ وبلىسىندا دۇنيەگە كەلگەن ەدىم. جىلدار بويى قازاقستان دامۋدىڭ جوعارى كورسەتكىشتەرىن كورسەتۋدە.

ەلدەرىڭىزدىڭ تابىستارىنا وتە ريزامىن جانە قازاقستان حالقىنا بارلىق جاقسىلىقتار تىلەگىم كەلەدى!

 ارمەن دجيگارحانيان:

-         بارلىق قازاقستاندىقتاردى وسى تاماشا مەرەكەمەن قۇتتىقتايمىن! ءوزىم قازاقستاندا جۇمىس بابىندا جانە كينو تۇسىرۋمەن بىرنەشە رەت بولدىم. سىزدەردىڭ ەلدەرىڭىزدى شىنايى سۇيەمىن! قۇداي ساقتاسىن، ەش نارسە ارامىزداعى دوستىقتى بۇزباسىن – بۇل ەڭ ماڭىزدىسى! ەل باسشىلارىڭىز نۇرسۇلتان نازارباەۆتى اسا قۇرمەتتەيمىن! 

رف حالىق ءارتىسى لەۆ پرىگۋنوۆ:

-         مەن الماتىدا تۋىپ ءوستىم جانە قازاقستانمەن ماقتانامىن! سىزدەرمەن وسى قۋانىشتى مەرەكەدە بىرگە بولعانىم ءۇشىن باقىتتىمىن! وتانىڭىزدى – قازاقستاندى جاقسى كورىڭىزدەر! قازاقستان حالقىنا دەنساۋلىق، باقىت جانە وركەندەۋدى تىلەيمىن!

Abai.kz