وتكەن اپتادا بىرقاتار بۇقارالىق اقپارات قۇرالدارى «سابيليانوۆ سايلاۋشىلارىن سوتقا بەردى» دەپ شۋلادى.

داۋ-دامايدىڭ قاتتى ۋشىققانى سونشالىق، تارباعا­تاي­لىق تولەۋباي احمەتوۆ پەن جاناربەك بەكباەۆ الماتىداعى ۇلتتىق ءباسپاسوز كلۋبىنا جۋرناليستەردى جينادى. ولار وزدەرىنىڭ «مۇشكىل ءحالىن» اقپارات قۇرالدارى ارقىلى ايتقىسى كەلىپتى. وسى ءىستىڭ اق-قاراسىن بىلمەك بولىپ، ءبىز نۇرتاي ساليحۇلىنىڭ وزىمەن سۇحباتتاسقان ەدىك. ەكەۋارا اڭگىمەمىزدى قاز-قالپىندا بەرىپ وتىرمىز.

وتكەن اپتادا بىرقاتار بۇقارالىق اقپارات قۇرالدارى «سابيليانوۆ سايلاۋشىلارىن سوتقا بەردى» دەپ شۋلادى.

داۋ-دامايدىڭ قاتتى ۋشىققانى سونشالىق، تارباعا­تاي­لىق تولەۋباي احمەتوۆ پەن جاناربەك بەكباەۆ الماتىداعى ۇلتتىق ءباسپاسوز كلۋبىنا جۋرناليستەردى جينادى. ولار وزدەرىنىڭ «مۇشكىل ءحالىن» اقپارات قۇرالدارى ارقىلى ايتقىسى كەلىپتى. وسى ءىستىڭ اق-قاراسىن بىلمەك بولىپ، ءبىز نۇرتاي ساليحۇلىنىڭ وزىمەن سۇحباتتاسقان ەدىك. ەكەۋارا اڭگىمەمىزدى قاز-قالپىندا بەرىپ وتىرمىز.

جاس قازاق: نۇرتاي اعا، بۇل داۋدىڭ وتى نەدەن تۇتاندى؟
نۇرتاي سابيليانوۆ: وتكەن جىلدىڭ 15 قازانىندا «جاس الاش» گازەتىندە جۋرناليست ەرىك راحىمنىڭ «تارباعاتايلىقتار استانا جاققا ەمەس، وسكەمەن جاققا ەلەڭدەيدى...» دەگەن ماقالاسى جارىق كوردى. سول ماقالادا مەنىڭ ازاماتتىق ار-نامىسىما، ىسكەرلىك بەدەلىمە نۇقسان كەلتىرەتىن، شىندىققا ساي كەلمەيتىن ماعلۇماتتار جازىلعان. ماسەلەن، ەرىك راحىم ءوزىنىڭ ويىنان قۇراستىرىپ: «تارباعاتايلىقتاردىڭ ن.سابيليانوۆقا دەگەن وكپەسى قارا قازانداي»، «سابيليانوۆقا سايلاۋ كەزىندە عانا كەرەكپىز. ول تۇك ىستەگەن جوق»، «سابيليانوۆ دەپۋتات بولعالى بىزگە ات باسىن بۇرعان جوق» دەگەن ءسوز تىركەستەرىن كەلتىرگەن. بىراق... ول جەردە ەشكىمنىڭ اتى اتالىپ، فاميليالارى كورسەتىلمەگەن. مەن ءوز قۇقىمدى قورعاپ، زاڭعا سايكەس اتالعان گازەتتىڭ باس رەداكتورى ر.سارسەنبايعا تالاپ ارىز-حات جازىپ، الگى ماقالاداعى ماعان قاتىستى جالعان ماعلۇماتتاردى، جالا جابۋدى تەرىسكە شىعارۋدى تالاپ ەتتىم. باسىلىم ماعان جاۋاپ جازدى، بىراق تالاپ ارىز-حاتىمدى گازەتكە جاريالاعان جوق.
ءارى قاراي. 2009 جىلى 10 جەلتوقساندا مەنىڭ اتىما شقو اياگوز اۋدانى تارباعاتاي اۋىلىنىڭ (بىرەۋلەر اۋىلدى تارباعاتاي اۋدانى دەپ شاتاستىرىپ جاتىر. تارباعاتاي - بولەك اۋدان) تۇرعىندارىنان حات كەلدى. ول حاتتا: «تارباعاتاي اۋىلى ءسىزدىڭ نازارىڭىزدان تىس قالعانى وتىرىك ەمەس. ءسىز اۋىلعا 2007 جىلدىڭ جازىنان كەيىن ات باسىن بۇرعان جوقسىز... اۋىل حالقى وسىنشا قيىندىق كورىپ جاتقاندا ءبىزدىڭ نۇرتايىمىز قايدا دەگەن سۇراقتىڭ تۋعانى دا، ءبىزدىڭ سىزگە وكپەلەگەنىمىز دە راس. سۋ مەن جولدان قيىندىق كورىپ جاتقاندا ءسىز ءۇن قاتىپ، سۇراۋ سالساڭىز مۇنداي حالگە تۇسپەس ەدىك»، - دەپ جازىپ، ەرىك راحىمعا ريزاشىلىقتارىن ءبىلدىرىپتى.

بۇل حاتتىڭ ءبىر داناسىن گازەتكە جىبەرگەن. قوش دەلىك. سودان سوڭ، مەن دە تارباعاتاي اۋىلىنىڭ تۇرعىندارىنا حات جىبەرىپ، ولاردىڭ گازەتكە جازعاندارىنىڭ شىندىققا ساي كەلمەيتىنىن ايتتىم. ياعني «اۋىلداعى سۋ قۇبىرى، جول تۋرالى ءۇن قاتپادىڭىز»، «اۋىلعا ات باسىن بۇرمادىڭىز»، «اۋىل نازارىڭىزدان تىس قالدى» دەگەن سوزدەردىڭ جالعان ەكەندىگىن دالەلدەپ بەردىم.
ەندى سىزگە دە ايتايىن: مەن دەپۋتات بولعالى 2004-2009 جىلدار ارالىعىندا تارباعاتاي اۋىلدىق وكرۋگىندە 4 رەت حالىقپەن كەزدەستىم. ول اۋىلدىڭ ماسەلەسىن تولىق بىلەمىن. وعان دالەل - تارباعاتايلىقتار كوتەرگەن اۋىزسۋ، تاسجول، «حابار» ارناسىنىڭ كورسەتىلمەيتىنى، اۋىل مەكتەبىنە اۆتوكولىك بەرۋ جانە ت.ب. كوپتەگەن ماسەلەلەرگە وراي ۇكىمەتكە، جەرگىلىكتى اتقارۋشى جانە مەملەكەتتىك ورگاندارعا ساۋالدار، حاتتار جولدادىم. مىسالى، 2008 جىلدىڭ 8 قازانىندا سول كەزدەگى كولىك جانە كوممۋنيكاتسيا ءمينيسترى س.احمەتوۆكە مالكەلدى - اياگوز - تارباعاتاي ارالىعىنداعى تاسجولدى كۇردەلى جوندەۋدەن وتكىزۋگە رەسپۋبليكالىق بيۋدجەتتەن قارجى ءبولۋدى قاراستىرۋ تۋرالى دەپۋتاتتىق ساۋال جولدادىم. قۇزىرلى مينيستر سول جىلى 21 قازاندا وعان جاۋاپ بەرىپ، جوبالىق-سمەتالىق قۇجات بولماعاندىقتان، وسى تاسجولدى جوندەۋ ماسەلەسى الداعى جىلدارى قارالاتىنىن ايتىپ، جاۋاپ جازىپتى. ەكىنشىدەن، اياگوز اۋدانى تارباعاتاي اۋىلىنداعى سۋ قۇبىرىن جاڭارتۋعا رەسپۋبليكالىق بيۋدجەتتە 2010 جىلى - 81,2 ملن تەڭگە (2007-2008 ج.ج. بۇل ماقساتقا 93,1 ملن تەڭگە) بولىنگەن. ياعني قاراجات يگەرىلۋدە. اياگوز مەنىڭ تۋعان جەرىم بولعاندىقتان، ونداعى بارلىق ەلدى مەكەندەردىڭ حال-احۋالىن جاقسى بىلەمىن. اربىردەن سوڭ، مەن 2007 جىلدان بۇگىنگە دەيىن شىعىس قازاقستان وبلىسىنىڭ 8 اۋدانىندا، 120 ەلدى مەكەنىندە بولىپ، 150-گە جۋىق كەزدەسۋ وتكىزدىم. وسكەمەن، سەمەي، ريددەر قالالارىندا بولىپ، كەزدەسۋلەر وتكىزدىم. وسى ۋاقىت ارالىعىندا حالىقتان 2,5 مىڭداي حات كەلگەن ەكەن. بارىنە جاۋاپ بەردىم.
جاس قازاق: ءسىزدىڭ ايتۋىڭىزعا قاراعاندا، گازەتتەگى ماقالا دا، جازىلعان ارىز حات تا - سىزگە جاعىلعان كۇيە، جابىلعان جالا بولعانى ما؟
نۇرتاي سابيليانوۆ: ءيا! ەندى وسى سوزىمە ناقتى دالەلدەر كەلتىرەيىن. ءبىرىنشى دالەلىم - الگى باسىلىمعا مەنى قارالايتىن اتىشۋلى ماقالا شىققانعا دەيىن تارباعاتاي اۋىلىنىڭ تۇرعىندارى ماعان قاتىستى گازەتكە حات جازباعان. ولار تەك مەن تالاپ حات جولداعان سوڭ، گازەتكە وزدەرىنىڭ دومالاق ارىز-حاتتارىن جولداعان. بۇل ياعني تاپسىرىسپەن جازىلعان ء(يا، ءيا، بۇل حاتتى جاندايشاپ جالاقورلار بىرەۋلەردىڭ شوق كوسەۋىمەن ادەيى ۇيىمداستىرىپ وتىر) حاتتى باسىلىم دا، مەنىڭ ازاماتتىق ار-نامىسىمدى، ىسكەرلىك بەدەلىمدى تۇسىرگىسى كەلەتىن توپ تا «كوزىر» ەتىپ پايدالانىپ وتىر. قالايشا؟ بۇل - ناعىز ويىننىڭ كوكەسى! گازەتكە «ماقالانى تەرىسكە شىعار» دەسەم، «مىنە، اۋىل تۇرعىندارىنىڭ جازعان حاتى» دەپ كورسەتە قويادى. ال اۋىل تۇرعىندارىنا «جازعاندارىڭىز شىندىققا جاناسپايدى» دەسەم، گازەتتەگى ماقالانى كورسەتە قويادى. بۇل - ءبىر.
ەكىنشى دالەلىم - گازەتكە تارباعاتاي اۋىلىنىڭ 26 تۇرعىنىنان جولدانعان حاتقا كوپ ادامدار قول قويماعان. انىعىراق ايتساق، 9 ادام اۋىزسۋ دەگەننەن كەيىن حاتتى وقىماي قول قويعاندارىن، 4 ادام اق قاعازعا قول قويعاندارىن، 6 ادام تىپتەن قول قويماعانىن ايتىپ، تۇسىنىكتەمە بەردى. سونىمەن قاتار، ءبىر تاڭعالعانىم، الگى حاتقا جاسى 80-گە جاقىنداعان اپانىڭ (ت.احمەتوۆتىڭ شەشەسى بولىپ كەلەتىن ءباتيما سادۋاقاسوۆا دەگەن ازاماتشا قازاقشا حاتقا ارابشا قول قويىپتى) دا، كامەلەتكە جاسى تولماعان بالانىڭ دا، سول اۋىلدا تۇرمايتىن قىزدىڭ دا قولى سىرتىنان قويىلىپ كەتىپتى. مىنە، جالعان حات جازۋ دەگەن وسى! وسىدان-اق، بۇل حاتتىڭ ارتىندا ۇلكەن ءبىر توپتىڭ تۇرعانى ءبىلىنىپ تۇر. اۋىلدىڭ اتىن جامىلىپ، وزدەرىنىڭ جەكە مۇددەلەرىن كوزدەپ وتىرعانى كورىنىپ تۇر.
ءۇشىنشى دالەلىم - «جاس الاشقا» بىلتىر قازان ايىندا جاريالانعان ماقالادا اۋىلدىڭ ەكى تۇرعىنى، بىرەۋى - الماتىدا ءباسپاسوز جيىنىن وتكىزگەن ت.احمەتوۆ، ەكىنشىسى - ونىڭ قاسىنداعى ج.بەكباەۆ ءوز ويلارىن ايتىپ، تۇسىنىكتەمە بەرىپتى. بىراق ولاردىڭ سوزدەرىندە ماعان قاتىستى ەشقانداي ماعلۇمات ايتىلماعان. نەگە ولار سول تۇسىنىكتەمەلەرىندە مەنىڭ اتىمدى اتاپ، تىكەلەي دەپۋتاتتىق قىزمەتىمدى ءسوز قىلمادى؟.. سونىمەن قاتار، ءباسپاسوز ءماسليحاتىنا قاتىسقان اۋىل مۇعالىمى ج.بەكباەۆتىڭ بۇل حاتقا قاتىسى جوق. ول حاتقا قول قويماعان، ازاماتتىق ءىس بويىنشا جاۋاپكەر دە، تالاپكەر دە ەمەس. ايتا كەتەيىن، «نۇر وتان» پارتياسىنىڭ اتىنان دەپۋتات بولىپ سايلانعاننان كەيىن العاشقى كەزدەسۋىمدى اياگوز اۋدانىنداعى تارباعاتاي اۋىلىندا وتكىزگەنمىن. سول كەزدە، ياعني 2007 جىلدىڭ 3 جەلتوقسانىندا ت.احمەتوۆ ماعان حات جازىپ، العىسىن ءبىلدىردى. سول حاتىندا ماعان ريزاشىلىعىن بىلدىرە وتىرىپ: «ءسىز ءوز سوزىڭىزدە تۇراتىن ناعىز ازاماتسىز، ادامگەرشىلىك تانىتتىڭىز، كەزدەسۋىڭىز وتە جاقسى دەڭگەيدە ءوتتى. ءسىز سۇراقتارعا ءدال، دۇرىس جاۋاپ بەردىڭىز. سىزگە اللا دەنساۋلىق بەرسىن، اللانىڭ نۇرى جاۋىپ، جاقسى ىستەرىڭىزبەن حالىقتىڭ قۇرمەتىنە بولەنە بەرىڭىز»، - دەپ جازعان زەينەتكەر ت.احمەتوۆتىڭ ءبىر جىلدان كەيىن باسقاشا سايراپ شىعا كەلگەنىنە نە سەبەپ؟!. 
«ىنتىماقتى سىبىس بۇزادى، جىلقىنى ءمىنىس بۇزادى» دەيدى قازاق. مەنىڭ ويىمشا، كەيبىر ادامدار وسى گازەت ارقىلى اۋىل­دىقتاردىڭ اڭقاۋلىعىن پايدالانىپ، سۇتتەي ۇيىپ وتىرعان ەلدى ەكىگە جارىپ، بەرەكە-بىرلىگىن كەتىرگىسى كەلىپ وتىر. قوعامدىق پىكىر تۋدىرۋعا جانتالاسىپ جاتىر. وعان دالەلىم - جاناعى گازەت مەنىڭ تالاپ - حاتىمدى بيىلعى 5 مامىردا عانا جاريالادى. سۇحباتتى دا كەش الدى. ەڭ باسىندا ەكى تاراپتىڭ دا پىكىر-ۇستانىمدارىن تەڭ بەرۋى كەرەك ەدى. ويتپەدى. بۇل جاعداي بۇدان بىلاي قازاق جۋرناليستەرىنە ساباق بولۋى ءتيىس. ايتپەسە، دومالاق ارىزعا جاسى 80-گە جاقىنداعان اپا قول قويماس ەدى؟.. ارينە، بۇل - وتە ۇيات، وتە ماسقارا! ءبىر عانا ماسەلەنى اشىق ايتايىن. ىسكەرلىك بەدەلىمدى كۇيەلەگىسى كەلگەندەر مەنى جاقسى بىلەتىندەر. ەگەر دە ولار گازەتكە ەمەس، وزىمە حات جازىپ، وي-پىكىر، ۇسىنىس-وكپەلەرىن ايتسا، تۇسىنىستىكپەن قاراپ، ۇكىمەتكە ءۇن قاتار ەدىم. جەكە قابىلداۋىما دا كەلۋگە بولار ەدى. ويتكەنى، مەنى تاۋىپ الۋ قيىن ەمەس. «نۇر وتان» حدپ-نىڭ اياگوز اۋداندىق فيليالىندا مەكەنجايىم، تەلەفوندارىم جازۋلى تۇر. ماسەلەن، بىلتىرعى جازدا اياگوزدە 90 ادامدى جەكە قابىلدادىم.
جاس قازاق: ال وسى حاتتى كىم ۇيىمداستىردى دەپ ويلايسىز؟ كىمنەن كۇدىكتەنەسىز؟
نۇرتاي سابيليانوۆ: بۇل حاتتى ۇيىمداستىرىپ، ەڭ الدىمەن قول قويىپ، سوتتا جاۋاپكەر بولىپ جۇرگەن ادام - تولەۋتاي احمەتوۆ. تارباعاتاي اۋىلىنىڭ تۇرعىنى، كەزىندە 16 جىل اۋىل مەكتەبىندە ديرەكتور بولعان. قازىر - زەينەتكەر. جاسى 70-كە جاقىنداسا دا، بىزگە اقىلىن ايتىپ، جاستارعا ۇلگى-ونەگە كورسەتۋدىڭ ورنىنا بىرەۋلەردىڭ قولشوقپارى بولىپ، ەلدى دۇرلىكتىرىپ جۇرگەن سول. ونىڭ ارتىندا قارجىلاي قولداۋ جاساپ وتىرعان توپتىڭ بارى بەلگىلى.
جاس قازاق: ول قانداي توپ؟ ولاردى بىلەسىز بە؟
نۇرتاي سابيليانوۆ: جاقسى بىلەمىن. تەك... ءالىپتىڭ ارتىن باعىپ، سوتتىڭ شەشىمىن كۇتىپ وتىرمىن. ال سوتتا جاۋاپكەر رەتىندە 8 ادامدى كورسەتكەم. الايدا، قازىر ولاردىڭ ىشىنەن 4-ءۋى عانا سوتتا جاۋاپكەر. ولار: تولەۋباي احمەتوۆ، ونىڭ جۇبايى - كۇمىسبول بۇلانوۆا، احمەتوۆتىڭ باۋىرى - ەمىلباي قاليبەكوۆ جانە سەرىك فايزۋللين. العاشقى سوت وتىرىسىندا 8-ءنىڭ 3-ءۋى حاتقا وقىماي قول قويعاندارىن، ماعان ەشقانداي وكپە-رەنىشتەرى جوق ەكەنىن ايتتى، ال ءبىر ازامات ول اۋىلدا تۇرماعان ەكەن. مەن ولارعا دەگەن ءوز تالابىمنان باس تارتتىم. ەستەرىڭىزدە بولسا، الگى باسىلىمدا «سابيليانوۆ
سايلاۋشىلارىن سوتقا بەردى» دەگەن ماقالا جاريالاندى. ياعني، بۇل جەردە دەپۋتات ءوز سايلاۋشىلارىن سوتقا بەردى دەگەن ۇعىم تۋماۋى كەرەك. مەن بار بولعانى، ءوزىمنىڭ دەپۋتاتتىق قىزمەتىمدى، ىسكەرلىك بەدەلىمدى قورعاپ، ءبىر وتباسىنىڭ ءۇش ادامىنان جالا جاپقان حاتتارىن تەرىسكە شىعارۋدى تالاپ ەتىپ وتىرمىن. بىرەۋلەردىڭ ايداپ سالۋىمەن ماعان ءتىسىن باتىرىپ، تىرناق استىنان كىر ىزدەگەندە نە تابادى؟..
جاس قازاق: «ن.سابيليانوۆ ءوز سايلاۋشىلارىنان 3 ملن تەڭگە ءوندىرىپ بەرۋدى تالاپ ەتتى» دەگەن ءسوز راس پا؟
نۇرتاي سابيليانوۆ: بۇل - كەيبىر باق-تىڭ ويىنان شىعارىپ العان ءسوزى. سوتقا جازعان تالاپ ارىزىمدا نەگىزگى جاۋاپكەرلەردىڭ ارقايسىسىنان 500 مىڭ تەڭگە ءوندىرۋدى، ال ول قارجىنى اياگوز قالاسىنداعى بالالاردىڭ پسيحو-نەۆرولوگيالىق الەۋمەتتىك مەكەمەسىنە اۋدارۋدى سۇراعانمىن. ياعني اۋىل تۇرعىندارىنان وزىمە 1 تيىن دا تالاپ ەتىپ وتىرعان جوقپىن. ونى دۇرلىكتىرىپ، وتقا ماي قۇيىپ جاتقان جەكەلەگەن باق. ال ت.احمەتوۆ وسى ماعان قارسى وتكىزگەن ءباسپاسوز ءماسليحاتى ارقىلى سوتقا ىقپال ەتكىسى كەلەدى. «جامان ىسىنەن كورمەي، كىسىدەن كورەدى» دەگەندەي، ولار مەنەن ارقايسىسى 3 ملن تەڭگەدەن مورالدىق شىعىن ءوندىرىپ بەرۋدى سۇراپ وتىر.
نەگە دەيسىز عوي؟ بار-جوعى سوتقا ءوز اياقتارىمەن بار­عاندارى ءۇشىن عانا... بۇگىنگە دەيىن مەنىڭ قاتىسۋىممەن 29-30 ساۋىردە ەكى سوت وتىرىسى اشىق تۇردە ءوتتى. بىرەۋى - اياگوز اۋداندىق سوتىندا، ەكىنشىسى - كوشپەلى سوت وتىرىسى، اۋىل ادامدارىنىڭ قاتىسۋىمەن تارباعاتاي اۋىلىندا. ال 6 مامىرداعى سوتقا ولار كەلگەن جوق. مىنانى قاراڭىز، قارسى تاراپ ارىزىندا بىلاي جازادى: «تالاپ - ارىز بەرگەنىم ءۇشىن قان قىسىمىم كوتەرىلىپ، جۇرەك اۋرۋى پايدا بولدى. ءسويتىپ، مورالدىق شىعىن كەلدى» دەيدى. مىنە، سول شىعىندى 3 ملن تەڭگەگە باعالاپ وتىر. وسىدان-اق جازعىشتاردىڭ نەگە مۇددەلى ەكەنى كورىنىپ تۇر ەمەس پە؟!.
جاس قازاق: نۇرەكە، وسى ادامداردى كەشىرە الاسىز با؟
نۇرتاي سابيليانوۆ: ارينە. جاۋاپكەرلەر سوتقا كەلىپ، ءوز قاتەلەرىن مويىنداپ، شىندىقتى ايتا بىلسە - كەشىرەمىن! گازەتكە جازعان جالعان ماعلۇماتتاردى تەرىسكە شىعارسا بولدى... باسقا ەش تالابىم جوق. جالا جابۋ، حالىقتى دۇرلىكتىرۋدى بۇگىن توقتاتپاساق، ەرتەڭگى كۇنى ءار اۋىلدان، ءار رەداكتسياعا وسىنداي حاتتار كەلۋى مۇمكىن عوي... بۇل - بىزگە دە، قوعامعا دا جات نارسە. تەمىردى قىزعان كەزدە سوعىپ، وسى داۋدى ساياسيلاندىرۋعا جانۇشىرىپ جاتىر. ءتىپتى سوت پروتسەسىنە دە ساياسي رەڭك بەرۋدە. جالعىز ادام سوت شەشىمى شىقپاي جاتىپ، بايبالام سالا ما؟.. قاراپايىم ادام الماتىدان 300 مىڭ تەڭگەگە قورعاۋشى جالداپ، اياگوزگە اپارىپ، ءىستى ءارى قاراي سوزۋعا مۇددەلى بولا ما؟.. بۇل جەردەگى باسى اشىق نارسە - مەنىڭ دەپۋتاتتىق قىزمەتىم، ەلدەگى، قوعامداعى، وبلىس جانە اۋدان كولەمىندەگى كەلەلى ماسەلەلەردى كوتەرىپ، ولاردى ۇكىمەت، اتقارۋشى ورگاندارى قاراپ، ءوز شەشىمىن شىعارىپ جاتقانى كەيبىر ادامدارعا جاقپايتىن سەكىلدى. ونداي ادامدارعا حالىقتىڭ بىرلىگى مەن قوعامنىڭ ساياسي تۇراقتىلىعىنان گورى كۇنشىلدىك، ەكىجۇزدىلىك جانە كورەالماۋشىلىق، اتاققۇمارلىق جاقىن تۇر! باسىمىزعا قانداي كۇن تۋسا دا اباي اتامىزدىڭ:
ءبىرىڭدى - قازاق، ءبىرىڭ - دوس،
كورمەسەڭ - ءىستىڭ ءبارى بوس! - دەگەن ۇلاعاتتى وسيەت ءسوزىن قاپەرىمىزدەن شىعارماعانىمىز ابزال.
جاس قازاق: نۇرەكە، بۇعان دەيىن ءارتۇرلى ءىس-شارالارعا دەمەۋشىلىك تانىتىپ، جەكەلەگەن ازاماتتارعا قولداۋ كورسەتىپ جۇرگەن مەتسەنات ەكەنىڭىزدى قازاق قوعامى جاقسى بىلەدى. «اۋزى كۇيگەن ۇرلەپ ىشەدى» دەگەندەي، وسى جاعدايدان كەيىن تۋعان جەرىڭىزگە دەگەن كوزقاراسىڭىز وزگەرگەن جوق پا؟
نۇرتاي سابيليانوۆ: جوق! قولىنان كەلسە، حالىققا، تۋعان جەرىنە قولداۋ كورسەتۋدى مەن ءوزىمنىڭ ازاماتتىق پارىزىم دەپ ەسەپتەيمىن. ەگەر دە مەن جاقسى تۇراتىن بولسام، مەنىڭ حالقىم دا، اۋىلداسىم دا جاقسى تۇرۋى كەرەك. وسى قاعيدانى بەرىك ۇستانامىن. حالىققا ارقاشان ادال قىزمەت ەتۋ، تاۋەلسىزدىكتى نىعايتۋ - ءار قازاقتىڭ ابىرويلى مىندەتى بولۋى كەرەك.

سۇحباتتاسقان تولەن تىلەۋباي

«جاس قازاق» گازەتى