«قولجەتىمدى باسپانا - 2020» باعدارلاماسى تۇرعىن ءۇي قۇرىلىس جيناق جۇيەسى ارقىلى ەكى باعىت بويىنشا جۇزەگە اسىرىلىپ، وعان بارلىق ازاماتتار قاتىسا الادى.

سونىڭ ىشىندە: 1.جەرگىلىكتى اتقارۋشى ورگاندارى تاراپىنان (جاو) باسپانا قۇرىلىسى جۇرگىزىلىپ، ونى تۇرعىن ءۇي قۇرىلىس جيناق جۇيەسى ارقىلى بارلىق توپتارداعى ازاماتتارعا ساتۋ، سونىڭ ىشىندە باسپانانى ۇزاق مەرزىمدىك جالعا بەرۋ جانە جالعا الۋشىلار ءۇشىن ساتىپ الۋ مۇمكىندىگى قاراستىرىلعان. 2.جەرگىلىكتى ات­قا­رۋشى ورگاندارى تاراپىنان تۇرعىن ۇيلەردىڭ قۇرىلىسى جۇرگىزىلىپ، ونى جالعا بەرگەننەن كەيىن جاس وتباسىلارىنا جەكە مەنشىككە ساتىپ الۋعا مۇمكىندىك بەرۋ.
ءبىرىنشى باعىت بويىنشا، جاو سالىنعان باسپانانى تۇرعىن ءۇي قۇرىلىس جيناق جۇيەسىنىڭ سالىمشىلارى تاراپىنان بانكتەن الىنعان زايىمدار ەسەبىنەن ساتىپ الىنادى (تۇرعىن ءۇي، ارالىق، الدىن الا زايىمدارى). سالىمشىنىڭ تولەۋ قابىلەتى جەتكىلىكسىز بولسا، وندا تۇرعىزىلعان باسپانا ۇزاق مەرزىمدىك جالعا بەرىلەدى (8 جىلعا دەيىن). 8 جىلعا جالعا بە­رىلەتىن ۇيدە تۇرىپ جاتقان باع­دارلاما قاتىسۋشىسى بولاشاقتا باسپانانى مەنشىككە ساتىپ الۋ ءۇشىن، تومەن پايىزدىق مولشەرلەمەمەن تۇرعىن ءۇي زايىمىنا قول جەتكىزۋ ءۇشىن 8 جىلدىڭ ىشىندە تۇرعىن ءۇي قۇرىلىس جيناق­تارىن جينايتىن بولادى.
اتالعان باعىت بويىنشا جالعا بە­رىلەتىن باسپاناعا قول جەتكىزۋ مۇم­كىندىگى 2013 جىلدان باستاپ جۇزەگە اسىرىلا باستادى.
ەكىنشى باعىت بويىنشا جاو تاراپىنان جاس وتباسىلارعا جالعا بەرىلەتىن ۇيلەر سالىنىپ (ەكەۋىنىڭ جاسى 29-دان اسپاۋى شارت), ولاردى جاس وتباسىلارىنا ۇزاق مەرزىمدىك جالعا بەرۋ جانە ارتىنشا ولاردىڭ جەكە مەنشىگىنە ساتۋ كوزدەلگەن. جالعا العان باسپانادا تۇراتىن جاس وتباسىلار 8 جىلدا تۇرعىن ءۇي قۇرىلىس جي­ناقتارىن جيناۋى ءتيىس. سەبەبى بۇل ارقىلى ولار، بولاشاقتا ءۇيدى جەكە- مەنشىككە ساتىپ الۋعا قاجەتتى تۇرعىن ءۇي زايىمىن الا الادى.
ايتا كەتەتىن جايت، تۇرعىن ءۇي قۇ­رىلىس جيناقتارىن بەلگىلەنگەن مولشەردە جيناۋ ءۇيدى جالعا العان جەكە ازاماتتىڭ مىندەتى بولىپ تابىلادى. ەگەر ءتيىستى تارتىپپەن سالىمدار جيناقتالمايتىن بولسا، وندا جالعا الىنعان ءۇيدىڭ تۇرعىندارى ول باسپانانى بوساتۋى ءتيىس. سەبەبى ەگەر سالىمدار جيناق شوتىنا جيناق­تالمايتىن بولسا، وندا تۇرعىن ءۇي جيناق نەسيەسىن الۋ مۇمكىندىگى دە بولمايدى. جالعا بەرىلگەن باسپاناعا قونىستانۋ ءۇشىن، جالعا الۋشى ءوزىنىڭ تۇرعىن ءۇي قۇرىلىس جيناقتاۋ ەسەپ شوتىنا 6 ايلىق سالىم كولەمىندە كەپىلدەندىرىلگەن سالىم سالۋى ءتيىس. جالعا الۋ شارتتارى ءبىرىنشى با­عىتتىڭ قاتىسۋشىلارىنا دا تيەسىلى.
جالعا 8 جىلعا بەرىلەتىن باسپانادا تۇرىپ جاتاتىن ۋاقىت ىشىندە جاس وتباسىلارىنىڭ بيۋدجەتىنە سالماق تۇسىرمەۋ ءۇشىن، ولار جالدىق اقىدان بوساتىلادى. شىعىستارى تەك كوم­مۋنالدىق تولەمدەرگە عانا جۇمسا­لادى (جىلۋعا، سۋعا ت.س.س.).