قازىرگىدەي تاسقىن ومىرگە يۋمورمەن قاراي الاتىن جاندار سيرەك بولىپ بارا جاتىر. ساتيريك قاناعات ابىلقايىرمەن از-كەم ءتىل قاتىسقان ادام باسىنداعى كۇللى ماسەلەنى ۇمىتىپ، ەزۋى جيىلماي، ىرزا بولىپ تۇرعانىن ءوزى دە بايقاماس-اۋ. بۇل جىگىت «قاعاز قالا» اتتى تۇڭعىش جيناعىندا ءبىزدىڭ قوعامنىڭ بەتىن ابدەن-اق شىمشىلادى. «مەنىڭ اتىم – تيمبەرلەيك»، ء«جۇز وتىزىنشى اتامان»، «ق-نىڭ قاسىرەتى»، ء«بارىن باسەكەم بىلەدى»، «شرەكتىڭ قايىنجۇرتى»، «قۇتيپاش پەن ساقىش»، «رەزيۋمە»، ت.ب. ساتيرالىق اڭگىمەلەرى وقىرماننىڭ جوعارى باعاسىن الدى. «ۇمىت مەنى» دەپ اتالاتىن ەكىنشى جيناعىنا قاناعات اڭگىمەلەرىن، ساتيرالىق جازبالارىن قوستى. وتكەن اپتادا «رەيتينگ» وقىرماندارى قاناعاتتىڭ شىعارماشىلىعىمەن ازداپ بولسا دا تانىستى. ومىرگە كۇلىپ قارايتىن جازۋشىمەن اڭگىمەمىزدىڭ فورماسىن باسقاشالاۋ قۇردىق.

رەيتينگ: مىنا ومىرگە نە بولىپ كەتتى، قاقا؟

قاناعات ابىلقايىر: ومىرگە ەشتەڭە بولعان جوق. كۇن شىعىستان شىعىپ، باتىسقا باتىپ ءجۇر عوي. ال ادامدارعا انىق بىردەڭە بولدى. قىسقاسى، راحات قازىر! شىنىڭدى ايتساڭ، سەنبەيدى. وتىرىك ايتساڭ، اۋزى اشىلادى. تۇيە ۇرلاعان اقتالادى، ينە ۇرلاعان سوتتالادى. قاسىڭ – دوسىڭا، دوسىڭ قاسىڭا اينالا سالادى. ادامدار ۇساق، كىرشىل، تىزەتپە، «نامىسقوي». ءوز اتىن مۇڭكىگەن كۇرەسىننىڭ اراسىنان دا اقتاپ الا الادى. ادالدىق، سەنىم، جاۋاپكەرشىلىك، دوستىق «قىزىل كىتاپقا» كىرىپ، ساتقىندىق، الداپ-ارباۋ، وپاسىزدىق قاماۋدان شىقتى.

رەيتينگ: ساتقىندىق پەن ونىڭ دوستارى اباقتىدان شىققان زامان قانداي ەكەن؟

قاناعات ابىلقايىر: ول زامان راحات قوي. باسىڭدا ەشقانداي جاۋاپكەرشىلىك جوق. ايتقانىڭدى ايتپاعان عىپ شىعارا سالۋدان وڭاي ەشتەڭە جوق. قالاي الداۋدى، قالاي ساتىپ كەتۋدى، بىرەۋگە جالانى قالاي جابۋدى ۇيرەنىپ الساڭ بولدى. ال ونى ۇيرەتەتىندەر اينالادا وتە كوپ. ەسەسىنە، ء«ما-ءا، ۇيات بولدى-اۋ»، «قوي، دوستىققا سىزات تۇسەدى»، «مەن وعان ادالمىن» دەگەن سوزدەرگە ىشەك-سىلەڭ قاتقانشا ءبىر كۇلىپ الاسىڭ. كەرىسىنشە، اقشاسىن سىيلاۋ – ادالدىق، بايلىققا ولەرمەندەنە ۇمتىلۋ – ماقساتتاردىڭ شىڭى، بولىپ-تولعاسىن ەشكىمدى تانىماي كەتۋ «ترەند» بولىپ تۇر.

رەيتينگ: ءوزىڭىز ءالى سول «قاعاز قالادا» تۇرىپ جاتىرسىز با؟

قاناعات ابىلقايىر: باياعىدا «مەن قاعاز قالادا تۇرامىن» دەپ وتىرىك ايتتىم. ماقتانعىم كەلدى. قالاي بايىپ كەتكەنىن ءوزى دە بىلمەي قالعانداردىڭ، باسى ىستەمەسە دە جوعارىدا وتىرا بەرەتىندەردىڭ جانىندا بولعىم كەلدى. نەگىزى، ول جاقتا تۇرمايمىن. قاعاز دا بولسا ول قالا مەنى وزىنە ماڭايلاتپادى. قاعاز قالادا قاعاز قالانى جاساعاندار تۇرىپ جاتىر. ءتاتتىنى دە وزدەرى جەيدى، جىلىنى دا وزدەرى كيەدى، قىمباتتىڭ ءبارى سولاردا.

رەيتينگ: تيمبەرلەيك اقساقال نەمەرەسى كەتريندى ۇزاتقان تويىندا بولدىڭىز با؟

قاناعات ابىلقايىر: وي، سول تويدا بايجۇما دەگەن ەسكىرىپ كەتكەن اتىن بلەيك دەپ وزگەرتكەن دوسىم ەكەۋمىز «جازدا اپامنىڭ اۋىلىندا» دەگەن ءاندى حيپ-حوپ ءھام روك-ن-رولل ۇلگىسىندە ايتىپ، وعان تيمبەرلەيك اقساقالدىڭ تۋعان قۇداسى استانا مەن قۇداعيى جانەتا سەكىرىپ بيلەدى. تاعى ءبىر قاتتى ەسىمدە قالعانى، توي ورتاسىندا قالىڭدىق، اكەسى، اناسى، اتاسى، اجەسى جانە وزگە تۋىستارى ءبارى قاتار-قاتار تۇرا قالىپ، لامبادا ساننەن قالىپتى، مەن اتىن بىلمەيتىن ءبىر ءبيدى جارتىلاي جالاڭاش بىرگە بيلەدى. ءبارىمىز ايىزىمىز قانا ريزا بولدىق. ەندى ءوزىمىز دە كىشى نەمەرەنىڭ تويىنا سونداي توسىن سىي دايىنداپ جاتىرمىز. ءبىزدىڭ باستى ەرەكشەلىگىمىز، ءبىرجولا جالاڭاش شىقساق پا دەگەن وي بار.

رەيتينگ: ءالى دە ءجۇز وتىزىنشى اتامانسىز با؟

قاناعات ابىلقايىر: «جيىرما بەس قايتا اينالىپ كەلمەس ساعان» دەپ، باياعىدا ءبىر حالىق ايتىپتى عوي. سول ايتقانداي، 130-اتاماندىق قازىر قايدا ماعان؟ تاڭسىق كورىپ اركىمدى ءبىر شاقىرىپ الدىق. ءوزىنىڭ كىم ەكەنىن ۇمىتىپ بارا جاتقانداردىڭ دا قولتىعىنا سۋ بۇركىپ ءجۇرىپ، كۇشىنە مىنگىزدىك. قازىر ولاردىڭ قاي-قايسىسىمەن بىرگە-ءبىر شىقساڭ دا جابىلىپ كەتەدى. قۇرىعاندا «براتاندارى» بار. ەڭ قىزىعى، ءبىزدىڭ «براتان» دا سولاردىڭ ءسوزىن سويلەيدى. سوندىقتان قازىر مەن 130 ەمەس، سوڭىنان ساناعاندا ءبىرىنشى اتامانمىن.

رەيتينگ: ءسىز وسى ق ارپىنەن نەگە تۇتىعا بەرەسىز؟

قاناعات ابىلقايىر: بىلمەيمىن، ايتەۋىر ءتىلىم كەلمەيدى سوعان. و باستا ق، ع، ڭ ارىپتەرىنە قارىنداستارىمنىڭ عانا ءتىلى كەلمەدى. كەلمەدى بولعاندا، كەلىپ ءجۇرىپ كەلمەي قالدى. كەشە وزىڭمەن اۋىلدان بىرگە كەلگەن قىز بەتىڭە قارايدى دا، ايدىڭ-كۇننىڭ امانىندا «مەنىن گانا»، «سەنىن گانا»، «كويشى» دەپ تۇرادى. ءبىر رەت ەسكەرتەسىڭ، ەكى رەت. سوسىن ءبىر كۇنى ءوزىڭ الەۋمەتتىك جەلىلەردە كوزىڭدى جۇمىپ الىپ «كويسان كوي، بير ەشكيندي سوي. ماگان باريبير» دەپ، ق-نىڭ جاقىن تۋىستارىمەن ايتىسىپ وتىراسىڭ...

رەيتينگ: ءالى دە باسەكەڭىزگە باس ۇراسىز با؟

قاناعات ابىلقايىر: بىزگە قاراتىپ وق اتسا دا، قىمباتىمىزدى تارتىپ السا دا، بايلىعىمىزدى سىرتقا تاسىسا دا، ءوز ءتىلىن سىيلاماسا دا، ەلىن سۇيمەسە دە، ىشكيىمسىز قالدىرسا دا – ول مەنىڭ باسەكەم! ەڭ باستىسى، ء«بارى سونىڭ ارقاسى» دەگەن وي مەنىڭ ساناما ۇيا سالىپ العان. كورە المايتىن بىرەۋلەر كوزىمدى اشقىسى كەلسە دە تارس جۇمىپ الىپ وتىرمىن وڭاشا. مەن ءۇشىن ادام تەڭدىگىنەن گورى ءوزىمدى قۇربان قىلاتىن تىنىشتىق ارتىق. «وزگە ەلدەردى قاراشى. وسىعان ءتاۋبا!»

رەيتينگ: شرەكتىڭ قايىنجۇرتى قالاي؟

قاناعات ابىلقايىر: شرەكتىڭ قايىنجۇرتى قازىر «گۇلدەنىپ» كەتكەن. «دامىعان ەلۋ ەلدىڭ قاتارىنا كىرەمىز» دەپ تۇرا جۇگىرىپ ەدىك، از عانا ۋاقىتتا كىردىك تە كەتتىك. ەندىگى ماقسات – وتىز ەلدىڭ قاتارىنا ەنۋ. شىنداساق، ول دا از جىلدا ىسكە اسپاق. بىراق، ولاردىڭ دا قاتارىنا كىرىپ العان سوڭ نە ىستەيمىز؟ مەنى سول الاڭداتادى. كىرەتىن جەر تابا الماي قالىپ، ءبارىن قايتادان باسىنان باستاپ جۇرمەسەك بولعانى. مۇنى نەگىزى شرەكتىڭ جانىنان ءبىر ەلى شىقپايتىن، بارلىق جەرگە ءوزىنىڭ اعايىندارىن وتىرعىزىپ قويعان، ءتورت دۇنيەسى تۇگەل ەسەكتەن سۇراۋ كەرەك-اۋ...

رەيتينگ: قۇتيپاش، ساقىشتارمەن ءالى ارالاسىپ تۇراسىز با؟

قاناعات ابىلقايىر: ءبىزدىڭ اۋىلدىڭ قىزدارى ءوزى ەكىگە بولىنەدى. و باستا قۇتيپاش تا جاپ-جاقسى قىز ەدى. كەيىن اقشاسى بارلارمەن، دۋبايعا باراتىندارمەن، ياحتاسى بارلارمەن ەسەپ كوڭىلمەن عانا ءومىر سۇرەتىن بولدى. تاعى ءبىر قىزدار بار. قارا ناندى قاناعات تۇتقان، بالا-شاعانىڭ قامىن ويلاعان، ءناپسىنى ەمەس، اردى ويلاعان. بىراق، ولارمەن كوبىنەسە ارالاسا بەرمەيمىن. مەنىڭ ويىم – العاشقىلار ازايىپ، كەيىنگىلەر كوبەيسە عوي.

رەيتينگ: قازىر نە جازىپ ءجۇرسىز ءوزى؟

قاناعات ابىلقايىر: نە ەكەنىن ءوزىم دە بىلمەيمىن، ايتەۋىر، قولىمنان كەلگەنىن شيمايلاپ جازىپ جاتىرمىن. كوزى اشىقتى كۇلدىرسەم، كۇلدىرە وتىرىپ جىلاتسام دەپ قويام. بىراق، ونىڭ قانشالىقتى جۇزەگە اسىپ جاتقانىن مەنەن گورى سىزدەر بىلەسىزدەر عوي. مەنىڭ جازعانىم جاقسى بولماسا دا، ەلدە ءبارى جاقسى بولسا ەكەن دەيمىن. ساتيريكتەر «كۇلكى قىلار» ەشتەڭە تابا الماي، ليريكتەر كوبەيسە كەرەمەت ەمەس پە؟..

تۇپنۇسقاداعى تاقىرىپ: قاناعات ابىلقايىر، ساتيريك-جازۋشى: «قازىر سوڭىنان ساناعاندا ءبىرىنشى اتامانمىن»

سۇحباتتاسقان ەسەي جەڭىسۇلى

ەستافەتا

قار ەرىپ، ارنا تولىپ، كەمەرىنەن اسقان سۋ بوگەتتى بۇزىپ اقتى. جولىنداعىنىڭ ءبارىن شايىپ، ابدەن كۇشىنە مىنگەن تاسقىن ەتەكتە وتىرعان اۋىلدى دا جالماي كەتتى. تىپ-تيپىل.

– بۇل جەردە بوگەت بار ەكەنىن بىلمەپپىن، – دەدى وبلىستاعى ءار نىسانعا، ءار ىسكە «جاۋاپتى» باسشى.

– سۋدىڭ جولىنا وتىرىپ العان ەلدىڭ ءوزى كىنالى، – دەدى توتەنشە باستىق.

«100 ءۇي ەمەس، 10 ءۇي، 500 ادام ەمەس، 5 ادام عانا سۋعا كەتتى. مال-مۇلىك ولاردا مۇلدە بولعان ەمەس» دەپ ۇكىمەت باسشىسىنا ەسەپ بەرىلدى. ال ۇكىمەت باسشىسىنىڭ باسشىسى بۇل جايلى بىلگەن دە جوق.

جادىراپ جاز شىقتى. كوكوراي شالعىن كوز ارباپ، ەگىن بيىل دا بىتىك شىقتى. «پاھ!» دەستى شارۋالار. كوپ ۇزاماي قاراپايىم جۇرت قاتتى قاۋىپ قىلعان، قانشا ايتىلسا دا شەنەۋنىكتەردى سەلت ەتكىزبەگەن شەگىرتكەلەر جەتتى.

– وسى شەگىرتكەلەر-اق تۇبىمە جەتەتىن بولدى، – دەپ كۇيىندى «بيىل بالەن ميلليون توننا استىق الامىز» دەپ ەسەپ بەرىپ، بولىنگەن اقشانى اساپ قويىپ، ءوزى وزگەلەردىڭ تۇبىنە جەتىپ جۇرگەن اۋىلشارۋاشىلىق ءمينيسترى.

ىرىسى مەن بەرەكەسىن ەرتىپ قوڭىر كۇز دە كەلدى. تىشقان ەكەش تىشقان ىنىنە ءدان تاسىدى. اڭ-قۇس جاتپاي-تۇرماي قىستىڭ قامىنا كىرىستى. ال شەگىرتكەدەن ارتىلعان استىق العاشقى قاردىڭ استىندا قالدى.

– بارىنە اۋا رايى كىنالى. ايتپەسە ءبىز ساقاداي ساي ەدىك، – دەدى باسشىلىق.

وسى جىلى قىس قىلىشىن سۇيرەتپەي-اق كەلدى. ماي توڭعىسىز قىس. ەسەسىنە قار تىم قالىڭ ءتۇستى. اۋىل-ايماقتى قويشى، ولار ۇمىتىلعالى قاشان؟.. الىپ قالالاردا قوزعالىس توقتادى.

– ەشقانداي قار جازعا دەيىن جاتىپ العان ەمەس، ەريدى، – دەدى قالا باسشىسى ۇيقىلى-وياۋ.

P.S: ءبى-ءى-ءى-ءىر جاقتا ءبىر ەل بار. قىزىق ەل ءوزى. ول ەلدىڭ قارجىعا جاۋاپتى ادامىنىڭ ءوزى ەلدە دەۆالۆاتسيا بولعانىن وزگەلەردەن ەستيدى.

– كەلەسى جىلى وسىنىڭ بارىنەن ءبىر قورىتىندى شىعارىڭدار! – دەدى ۇكىمەت باسشىسى وسىمەن مىڭىنشى رەت. ەستافەتا ءبارىبىر جالعاسىپ جاتىر...

قاناعات ابىلقايىر

دەرەككوزى: rgmedia.kz