قازاقتىڭ ءسوزىن سويلەپ، جوعىن جوقتاۋدى ماقسات تۇتقان، قۇرمەتتى ۇلتتىق پورتال باسشىلارى مەن شىعارماشىلىق ۇجىمى!

       سوڭعى ۋاقىتتارى قوجا احمەت ياساۋي كەسەنەسى مەن سول كەسەنە نەگىزىندە قۇرىلعان «ازىرەت سۇلتان» مەملەكەتتىك قورىق-مۇراجايى باسشىلىعىنا قاتىستى ءبىر جاقتى ماتەريالدار مەن بيلىك وكىلدەرىنە باعىتتالعان دالەل-دايەكسىز ارىز-شاعىمدار باق، سونىڭ ىشىندە ينتەرنەت باسىلىمدارىندا ءجيى جاريالاناتىن بولدى. ماتەريالداردىڭ مازمۇنى سول باياعى جالا جابۋعا نەگىزدەلگەن. مۇنداي ارىزدار بويىنشا قۇقىق قورعاۋ ورگاندارى مەن مينيسترلىك تاراپىنان قانشاما تەكسەرۋلەر جۇرگىزىلگەنىمەن ءالى كۇنگە دەيىن نە ارىزدىڭ يەلەرى تابىلعان جوق، نە شاعىمدا كورسەتىلگەن ماسەلەلەر دالەلدەنگەن ەمەس. ال قورىق-مۇراجاي ۇجىمى بۇل ارىز-شاعىمداردىڭ نە ءۇشىن جازىلىپ جاتقاندىعىن جانە ولاردى جازىپ جاتقانداردىڭ كىمدەر بولۋى مۇمكىن ەكەندىگى تۋرالى اتاپ كورسەتىپ، «جالاقورلار جاۋاپقا تارتىلسىن!» دەگەن تاقىرىپپەن قر مادەنيەت جانە سپورت ءمينيسترىنىڭ، قر باس پروكۋرورىنىڭ جانە قر ۇقك توراعاسىنىڭ اتىنا ارنايى حات جولدادى. ۇجىمنىڭ بۇل حاتى وزدەرىڭىز باسقارىپ وتىرعان ينتەرنەت پورتالدا جانە بىرقاتار گازەتتەردە جاريالاندى.  

2014 جىلدىڭ 20 قاراشاسى كۇنى «Abai.kz» پورتالىندا «زيارات جاساي بارىپ، جاعامىزدى ۇستاپ قايتتىق» (http://abai.kz/post/view?id=2192) دەگەن تاقىرىپپەن قر باس پروكۋرورىنىڭ جانە قر ۇقك توراعاسىنىڭ اتىنا جازىلعان ارىز جاريالاندى. ارىز جازۋشىلار جامبىل وبلىسى، بايزاق اۋدانىنىڭ تۇرعىندارى  اقىلجانوۆا دىلداكۇل، مايماقوۆا گۇلبارام، سەيىتوۆا ايىم دەگەن ايەلدەر ەكەن. ارىزدا قورىق مۇراجايدىڭ بىرنەشە قىزمەتكەرىنىڭ اتى-ءجونى اتالعان. مەكەمە قىزمەتكەرلەرى مۇنداي ايەلدەردى كورمەگەندىگىن، ال ارىزدارىندا جازىپ وتىرعاندارىنىڭ ءبارى جالا ەكەندىگىن ءبىراۋىزدان ايتىپ وتىر. ءتىپتى، بىرقاتارى ەكى كۇندىك دەمالىستارىندا ۇيلەرىندە بولعان.   ال، زياراتشىلاردان ول كۇنى ۇكاشا اتا كەسەنەسىنە قىرعىزستاننان كەلگەن توپ قانا تۇنەگەن.  شاعىم يەلەرىنىڭ  ء«سويتىپ بولعان ءمان جايدى ديرەكتور ماۋلەن سادىقبەكوۆكە ەسكەرتۋگە بارسام، كەڭسە الدىندا كۇزەتشىلەر عانا ءجۇر ەكەن. «اپايلار، بۇگىن كەڭسە دەمالادى. ونىڭ ۇستىنە ديرەكتورى ەڭبەك دەمالىسىندا» دەدى. كورگەنىمىزدى باسشىلارىنا جەتكىزە الماعاندىقتان جازىپ وتىرمىز» دەگەن سوزدەرى دە كۇمان تۋعىزادى. ويتكەنى، سول كۇنى كەزەكشىلىكتە بولعان قورىق-مۇراجايعا باعىنبايتىن، ءوز الدىنا دەربەس «كۇزەت» مەكەمەسىنىڭ قىزمەتكەرلەرى دە ءبىراۋىزدان «م.سادىقبەكوۆتى ول كۇنى ەشكىم دە ىزدەپ كەلگەن جوق» دەپ وتىر.    شاعىم يەلەرى دەپ كورسەتىلگەن جامبىل وبلىسىنىڭ بايزاق اۋدانىنىڭ تۇرعىندارىنىڭ سوزدەرى راس بولسا،  مەكەن-جايلارى مەن بايلانىس تەلەفوندارىن كورسەتسە ەكەن. ءبىزدىڭ مەكەن-جايىمىز: تۇركىستان قالاسى، تاۋكە حان داڭعىلى 70, بايلانىس تەلەفوندارى 8 (72533) 3 23 00  

   بىزدىڭشە بۇل ارىز دا تاسادا تۇرىپ تاس اتاتىن توپتىڭ قاساقانا ارەكەتى. مۇددەلى توپتىڭ ماقساتى قورىق-مۇراجايعا قاتىستى شۋدى كوبەيتە بەرۋ. سوڭعى ەكى-ءۇش جىل كولەمىندە مادەنيەت جانە سپورت مينيسترلىگىنىڭ بلوگىنا، قازاقستان رەسپۋبليكاسىنىڭ ۇكىمەتىنە، باس پروكۋروردىڭ، ۇقك توراعاسى مەن قارجى پوليتسياسىنىڭ باسشىلىعى اتىنا «ازىرەت سۇلتان» باسشىلىعى جۇمىسىن ايىپتاعان  ارىزدار قارشا بوراعان بولاتىن. پروكۋراتۋرا، قارجى پوليتسياسىنان ارنايى وكىلدەر، سونىمەن قاتار مادەنيەت مينيسترلىگىنەن كوميسسيا كەلىپ قانشاما تەكسەرۋلەر ءجۇردى. سول تەكسەرۋلەردىڭ بارلىعىندا دا ارىز يەلەرى انىقتالمادى، ياعني «دومالاق ارىزدار» بولىپ شىقتى. «ارىزدىڭ دومالاقتىعىنا» قاراماستان تەكسەرۋ جۇمىستارى جۇرگىزىلىپ، وندا كورسەتىلگەن قارجىنى جەپ قويدى جانە ت.ب. ايىپتاۋلاردىڭ بىردە-ءبىرى دالەلدەنبەي، جالعان جالا بولىپ شىقتى. ەندى «دومالاق ارىز» جازۋشىلار ەسكى تاسىلدەن ەشتەڭە وندىرە الماي جاڭا امالعا، باق-عا ءارتۇرلى تاقىرىپتارمەن قارالاۋ ماقالالارىن جازۋعا كوشكەن سىڭايلى.

       تۇركى جۇرتىنىڭ قاسيەتتى ورداسى، كيەلى شاڭىراعى، حالقىمىزدىڭ ۇلتتىق پانتەونى، ادامزاتتىڭ اسىل مۇراسى  قوجا احمەت ياساۋي كەسەنەسىنە قاتىستى قانداي دا ءبىر ماسەلە كوتەرگەندە مۇقيات بولعانىمىز ابزال. جەكە ماقسات ەمەس، ۇلتتىق مۇرات باسىم تۇراتىنىن ۇمىتپايىق.  رەداكتسياعا تۇسكەن ماقالانىڭ اۋەلى اۆتورىن انىقتاپ، ناقتى دەرەككە سۇيەنىپ بارىپ قانا ماتەريال جاريالانسا دۇرىس بولار ەدى. ارينە سىزدەردىڭ كاسىبي قىزمەتتەرىڭىزگە  باعىت-باعدار نەمەسە ارنايى نۇسقاۋ بەرە المايمىز. بىراق كۇندەلىكتى ءومىردىڭ  ساباقتارى سىزدەرگە وسىنداي ارىپتەستىك تىلەك ايتۋىمىزعا ماجبۇرلەپ وتىر.  ويتكەنى، ءار ءسوزدىڭ سالماعى بولادى، جاۋاپكەرشىلىگى بولادى.

       تاعى ءبىر بازىنالىق ءوتىنىشىمىز كوتەرىلىپ وتىرعان ماسەلەگە  بىرجاقتى قاراماي، مەكەمەمەن حابارلاسىپ ءمان-جايدىڭ اقيقاتىن انىقتاپ الىپ، كوپشىلىككە تولىققاندى مالىمەت بەرىلسە ەكەن.

       قازاق حالقىنىڭ يگى جاقسىلارى جەرلەنگەن ۇلتتىق پانتەوندا قىزمەت  ەتىپ وتىرعان ۇجىمنىڭ بۇل ءوتىنىشىن تۇسىنىستىكپەن قارايدى دەپ سەنەمىز.    

ق.ارىستانبەكوۆ، «ازىرەت سۇلتان» مەملەكەتتىك قورىق-مۇراجايى ديرەكتورىنىڭ مىندەتىن اتقارۋشى.

رەداكتسيادان: Abai.kz اقپاراتتىق پورتالىندا جاريالانعان ماقالا («زيارات جاساي بارىپ، جاعامىزدى ۇستاپ قايتتىق» (http://abai.kz/post/view?id=2192) ەلەكتروندى پوشتاسى كورسەتىلگەن ناقتى ادرەستەن كەلگەن ماقالا بولاتىن. ماقالانىڭ تۇپنۇسقاسى رەداكتسيامىزدا ساقتاۋلى. الايدا، ءبىز قارسى تاراپتىڭ دا ءۇشبۋ حاتىن وقىرمان نازارىنا ۇسىنعاندى ءجون كوردىك. ويتكەنى ەكى تاراپتىڭ دا وزىندىك شىندىعى بار. ەكى جاقتىڭ شىندىعىن اقىل تارازىسىنا سالىپ، بايلام جاساۋ وقىرمان ەنشىسىندەگى دۇنيە. 

 Abai.kz