1-ارنانىڭ «اشىعىن ايتقاندا» جوباسىنىڭ جەتەكشىسى، پۋبليتسيست سەرىك ەرعالي مىرزامەن سۇحباتىمىز اتالعان باعدارلامانىڭ ەفيرگە قالاي جول تارتقانىنان باستاپ بۇگىنگى توك-شوۋلاردىڭ كورەرمەنگە بەرەرى مەن بەرمەگى تۋرالى جايتتاردى قامتىدى.

- توك-شوۋ - شىعارماشىلىق پەن ءومىردىڭ بىرىگۋىنەن تۇراتىن تەلەونىم. قيىندىعى دا وسىندا.ونىڭ ۇستىنە ءبىز ماسەلەنى اشىق ايتۋمەن اشقىمىز كەلەدى. وسىنى يگەرە الماعان ۇجىمدار كوبىنە توك-شوۋ شىعارماشىلىعىن ساحنا ويىنىنا، بولماسا ستۋديانى وسەك ايتىسقا اينالدىرىپ الادى، - دەدى ەرعالي مىرزا بىزبەن سۇحباتىندا.   

-  سەكە، «اشىعىن ايتقاندا» توك-شوۋى العاشقى كۇننەن كورەرمەنىن سەلت ەتكىزگەن جوبا. بۇل جوبا قالاي جانە قاشان دۇنيەگە كەلدى؟ ءسىز وعان قالاي باردىڭىز؟

-  بۇل جوبا قازاقستاننىڭ 1-ارناسىندا بيىلعى جازدا باستالدى. شاماسى قازاقتىلدى مازمۇندى مولايتۋ ماقساتىنان تۋىنداسا كەرەك.  مەن باسقا سالادا جۇمىستا بولاتىنمىن. فەيسبۋكتە ارنانىڭ قازاقتىلدى رەداكتسياسىنىڭ جەتەكشىسى مارالبەك ساعىنعانوۆتىڭ جاڭا جوباعا قىزمەتشىلەر قابىلداناتىنى جونىندەگى حابارلاماسىن كوزىم شالدى. توك-شوۋ ەكەنىن ءبىلىپ بۇيرەگىم بۇلك ەتە قالسا دا، بىراق ءمان بەرمەدىم، حابارلاسا قويمادىم. سەبەبى، كازىرگى تەلەارنالار ءبىز سەكىلدى «قارتتاردى» قابىلدامايتىنىن بىلەتىندىكتەن، شالابىمدى شايقاعىم كەلگەن جوق. ءبىر ايداي وتكەسىن مارالبەك حابارلاماسىن تاعى قايتالادى جانە ء«ومىر كورگەن كىسىلەرگە باسىمدىقپەن قارايمىز» دەگەنىن بايقاپ قالدىم. سوڭعى كەزدە قاپتاعان توك-شوۋلاردى قاراپ، ىشتەي قومسىنىپ جۇرەتىنىم راس-تى. مارالبەكتىڭ جەكە بەتىنە حابارلاسا سالىپ ەدىم، ول تاڭ قالدى: «شىنىن ايتسام، سىزدەي كىسىلەردىڭ كەلگىسى كەلەتىنىنە كۇمانمەن قاراپ ەدىم» - دەپ. سودان كوپ ۇزاماي، كەلىسىپ، جۇمىسقا كىرىستىك.

- «قازاقستاننىڭ ءبىرىنشى ارناسى» بۇرىن «ەۆرازيانىڭ ءبىرىنشى ارناسى» اتالمايتىن با ەدى؟

- ء يا، ەندى قازاقستاندىق اتاۋ دا، مازمۇن دا مولايماق. بۇعان جۋىردا باس ديرەكتوردىڭ ورىنباسارى بولىپ ەكس-سەناتور، حاريزمالىق حانىم سۆەتلانا جالماعامبەتوۆانىڭ تاعايىندالۋىن قوسىڭىز. ويتكەنى، بۇل شىنىندا دا قازاقستاندىق ارنا. الايدا، بۇل ارنانى كوبىنە ءورىستىلدى كورەرمەندەر قىزىقتايتىندىقتان ءبىزدىڭ الدىمىزدا ءوز كورەرمەنىمىزدى قالىپتاستىرۋ مىندەتى تۇر.

-  قاي ءىستى دە باستاۋ قيىن. قانداي قيىندىقپەن بەتتەستىڭىزدەر؟

- توك-شوۋ - شىعارماشىلىق پەن ءومىردىڭ بىرىگۋىنەن تۇراتىن تەلەونىم. قيىندىعى دا وسىندا.ونىڭ ۇستىنە ءبىز ماسەلەنى اشىق ايتۋمەن اشقىمىز كەلەدى. وسىنى يگەرە الماعان ۇجىمدار كوبىنە توك-شوۋ شىعارماشىلىعىن ساحنا ويىنىنا، بولماسا ستۋديانى وسەك ايتىسقا اينالدىرىپ الادى. ءبىز وسىعان ۇرىنباۋعا باس قاتىرۋدامىز. ەڭ قيىنى ادامدارمەن جۇمىس ىستەي الاتىن پروديۋسەرلەردى ىرىكتەۋ بولدى. بۇل ۇدەرىس بىزدە ءۇش ايعا سوزىلدى جانە توك-شوۋ ۇجىمىنىڭ قالىپتاسۋى وسىنشا مەرزىمدى قامتىدى. قيىندىق ءالى بىتكەن جوق، ەندى الدىمىزعا دامۋ ماقساتىن، كاسىبي بىلىكتىلىكتى ارتتىرۋ مۇراتىن قويىپ وتىرمىز. اپتانىڭ ءتورت كۇنىندە  ەفيرگە شىعاتىن باعادارلامانى بار-جوعى 9 ادامدىق ۇجىممەن قامتۋ وڭاي ەمەس. ەرا تۆ ارناسىندا «زامانا» توك-شوۋىن جۇرگىزگەنىمدە قازاقتىلدى ادام تاپپاي قينالاتىنبىز، قازىر شۇكىر، قازاقشاسى ءتاۋىر ادام جەتەدى. بىراق بۇگىنگى توك-شوۋ تالابىنا سايكەس كەيىپكەر مەن ساراپشى تابۋ ءوز الدىنا ماسەلە. دەگەنمەن، توك-شوۋعا رەاليتي سيپات بەرگەن «سەزىمدى تەجەۋ مۇمكىن بە؟» - http://1tv.kz/kk/projects/ashygyn/watch/271014_k,  «قىزعانىش» - http://1tv.kz/kk/projects/ashygyn/watch/051114_k    سەكىلدى تۇسىرىمدەر وزىمىزگە دە، كورەرمەنگە دە قانات ءبىتىردى.

-  سىزدەردىڭ بۇل جوبالارىڭىز رەسەيدىڭ «پۋست گوۆورياتىنىڭ» كوشىرمەسى ەمەس پە؟

-  شىنىن ايتقاندا، ءبىزدىڭ ارنانىڭ نەگىزگى شىعارماشىلىق تىزگىنىن رەسەيلىك ماماندار ۇستاپ وتىرعانى جاسىرىن ەمەس جانە سونىڭ پايداسى دا بار. ۇيرەنە بىلگەن ادامعا بىلىكتىلىكتى ءوز بويىنا سىڭىرە ءبىلۋ باستى پارىز، كوشىرۋ ەمەس. بۇگىندە تەلەكەڭىستىكتە بىردەڭەنى ويلاپ تابۋ مۇمكىن ەمەس، ءبارى بار، سول باردى اركىم ءوز ۇلتىنىڭ رۋحاني سۇرانىسىنا يكەمدەي الۋى كەرەك. يكەمدەلمەگەن نارسە كوشىرمە سەكىلدەنەدى دە تۇرادى. ءبىزدىڭ جوبا دا الەۋمەتتىك توك-شوۋعا جاتادى. كورەرمەنىمىز - ءتۇس كەزىندە ۇيىندە تەلەديدارعا ۇڭىلەتىن قاراپايىم جاندار. ءبىزدىڭ «پۋست گوۆورياتتان»  ايىرمامىز جەر مەن كوكتەي: جۇزگە تارتا ادامنان تۇراتىن ۇجىم جوق، پرايم-تايمدا ەمەس، جۇمىس كەزىندە جۇرت تۇسكى اس ىشەتىن مەزگىلدە عانا ەفيردەمىز. وسىنىڭ ءبارىن ەسكەرىپ، قازاقتىلدى كورەرمەنگە قالاي جاعاتىنىڭدى مىقتاپ ويلاساڭ، سونىڭ ويى مەن كوزقاراسىنا ساي تەلەونىمدى بەرۋگە كۇش سالساڭ، كورەرمەندى مويىنداتساڭ، ول كوشىرمە بولۋى مۇمكىن ەمەس – قازاقستاندىق ءتول ءونىم. بۇگىندە وپەرا مەن بالەتتى، ەسترادانى كوشىرمە دەمەيمىز عوي، بۇل دا سول سەكىلدى دۇنيە.

- العاشقى قانداي ناتيجەنى ايتار ەدىڭىز؟

-  العاشقى ناتيجەمىز – تالتۇستە ەفيرگە شىقساق تا، سول ۋاقىتتاعى ەفيرلىك تەلەونىمدەرمەن تايتالاسا باستادىق. مىسالى، ەفيرگە شىققان ءبىر اي ىشىندەگى اپتالىق رەيتينگىمىز – 1,5 كورسەتكىشتەن تۇسكەن ەمەس. كەيبىر جەكەلەگەن كورسەتىم،ءتىپتى تۇستەگى ءاربىر كورەرمەننىڭ ۇشتەن ءبىرىن، ياعني 30 پايىزىن تارتقان. بۇنى تاۋەلسىز كومپانيالاردىڭ رەيتينگىسى كورسەتىپ وتىر. ءبىز اپتا سايىن رەيتينگپەن جۇمىس جاسايمىز. قاي جەرىمىزدى كۇشەيتۋ، قاي جەرىمىزدى نىعايتۋ كەرەكتىگىنە نازار اۋدارۋمەن وتىرامىز.

- توك-شوۋ جۇرگىزۋشى الماس التاي قالاي تاڭدالدى؟

- الماس سىرتقى تۇلعاسىمەن دە، شىعارماشىلىق بولمىسىمەن دە بارىنشا ەرەكشە ءارى لايىق جىگىت رەتىندە تاڭدالدى. ارينە، ورتالىق تەلەارنالارداعى تاجىريبەسى از، سوندىقتان وڭىرلىك داعدى مەن دەڭگەيدەن ءالى ارىلا قويعان جوق. ونىمەن وسى باعىتتا جۇمىس ىستەپ ءجۇرمىز. دەگەنمەن، ول ءار تاقىرىپقا كىرىپ، شىنايى جۇرگىزۋگە تىرىسادى. بولاشاقتا مىندەتتى تۇردە بىلىگىن كوتەرۋ مەن دامىتۋ قولعا الىنباق.

- شىعارماشىلىق جاعىن كىمدەر قولعا الۋدا؟

- ەكى شىعارۋشى رەداكتورىمىز – ءاليا تەكەنوۆا مەن زارينا قوزىباەۆا اتقارۋدا. بۇلار - توك-شوۋدىڭ ەكى قاناتى. ءبىزدىڭ پروديۋسەرلەر دە شىعارماشىل جاستار – كەز كەلگەن ادامدى شاقىرا سالمايدى، ولار الدىن الا جوسپارلانعان، ستسەناريگە ورنى بەلگىلەنگەن ادامداردى تاۋىپ، شىعارىمنىڭ باستالۋى مەن ءوربۋىن، شەشىم تابۋىن قامتيتىن ءتۇرلى رەسۋرستاردى ازىرلەيدى. ءبارىمىز دە بىرگە ءوسىپ-ءوربىپ كەلەمىز. جالپى بۇل توك-شوۋ ارقىلى حالقىمىزدىڭ بويىندا وسى كەزەڭدە ءوتىپ جاتقان الەۋمەتتىك ۇدەرىستەر مەن جايتتاردى، وقيعالاردى ساراپتاي الاتىن مامانداردى تۇسىرىمگە تارتۋمەن ۇلتتىڭ قۇندىلىعىن دارىپتەۋدى قولعا الىپ وتىرعانىمىزدى كورەرمەنىمىز باعالاي باستادى.

- سەكە، كەيبىر تاقىرىپتارىڭىز ۇشقارى ەمەس پە؟ ماسەلەن، جىنىسىن اۋىستىرۋشىلاردى كورسەتۋ ناسيحات سەكىلدى...؟

- ءدال وسىلاي دەپ حابارلاسقان زيالى ادامدار دا بولدى. بىراق دۇنيەدەگى بولىپ جاتقان ۇدەرىستى نازارعا الۋ ناسيحات دەپ كىم ايتتى؟ ناسيحات دەپ سوعان بۇيرەگىمىز بۇرعان جاعدايدا ايتۋعا بولار، ال ءبىز سونى بارىنشا جيرەنىشتى ەتىپ كورسەتۋدەمىز. ءبىز كورسەتپەسەك تە، كورەرمەن باسقا ەكراننان باسقا تىلدە كورىپ-ءبىلىپ وتىر جانە باسقاشا ينتەرپرەتاتسيامەن سىڭىرۋدە. ناعىز ناسيحات سول. ال ءبىز ۇلتتىق كوزقاراس تۇرعىسىنان قاي جەرىمىز وسال، وعان نە ىستەۋ كەرەكتىگىنە حالىقتى ويلاندىرعىمىز كەلەدى، باستىسى – قوعامعا وڭ ىقپال ەتۋ تۇپكى ماقساتىمىز.

- توك-شوۋلار قاپتاپ كەتتى، سىزدەر سولاردىڭ ىشىنەن جارىپ شىعاتىندارىڭىزعا سەنىمدىسىزدەر مە؟

- توك-شوۋلاردىڭ كوپتىگى راس،ءتىپتى، ازداپ دامۋ دا بايقالادى. بۇل رەسەيلىك نەمەسە وگەي تەلەونىمدەردەن ءوز كورەرمەنىمىزدى اراشالاۋدىڭ ءبىر جولى. ونىڭ ۇستىنە ورتامىزدا  باسەكە بولعانى دا جاقسى. كىمنىڭ كىم ەكەنىن ۋاقىت پەن كورەرمەن كورسەتەدى. ءبىز وزىمىزگە سەنىمدىمىز، سەبەبى، كورەرمەنگە ءبىر قايناۋى ىشىندە ەمەس، ولاردى شىنايى شىعارىمعا قانىقتىرۋعا بارىمىزدى سالۋدامىز. ويتكەنى، ارنادا اشىق ايتاتىن كەز كەلدى. بۇنىڭ تۇبىندە ءبىر ناتيجەسى بولادى دەپ سەنەمىن.

- پىكىرىڭىز بەن پايىمىڭىزعا راحمەت. ساتتىلىك تىلەيمىز!

Abai.kz