قۇرمەتتى انتراكتيدالىقتار! اياۋلى پينگۆيندەر!
ءدال قازىرگى ۋاقىتتا كۇللى الەم كوپتەگەن قاۋىپ-قاتەرلەرمەن بەتپە-بەت كەلىپ تۇر. ادامزات بالاسى باستان كەشىپ وتىرعان ەكونوميكالىق داعدارىس بىزگە اسەر ەتپەگەنىمەن، عالامدىق جىلىنۋدىڭ اسەرى جوق دەپ ايتا المايمىز. مەن بۇعان دەيىنگى جولداۋلارىمنىڭ بارلىعىن تۇرىپ جاساپ كەلگەنمىن، ي دو كونتسا تۇرىپ جاسايمىن... ويتكەنى وتىرىپ جاساسام قازاقتار قۇساپ «شارشاي باستاعان ەكەن»،- دەپ سىپسىڭداپ شىعا كەلەتىندەرىڭدى بىلەمىن. ءجا، جولداۋىما كوشەيىن. ءبىزدىڭ ۇلتتىق قورىمىزدا 2 ملن 456 مىڭ شايان، 365 ميلليوننان استام بالىقتار بار. مەن شايانداردىڭ 1 ملن 300 مىڭ كەزىندە، بالىقتاردىڭ 250 ملن كەزىندە ەسكەرتكەنمىن. «كۇنى ەرتەڭ قاندايدا ءبىر جاعداي بەلەڭ العاندا جەيمىز، قازىرشە تيمەڭدەر، ولار ءبىزدىڭ ۇلتتىق قورىمىز» دەگەنمىن. سونىڭ ارقاسىندا ولاردىڭ سانىن ەداۋىر ارتتىرىپ الدىق. ەندى مىنە سول ۇلتتىق قورداعى اس-اۋقاتىمىزدى پايدالاناتىن كەز-كەلدى. جە دەگەنگە جۇتىپ، قىلعىتا بەرمەي، ۇقىپپەن جەڭىزدەر. كۇنى ەرتەڭ نە بولارىن بىلمەيمىز. ۇلتتىق قور تىكەلەي ءوزىمنىڭ باقىلاۋىمدا بولادى. تاعى ءبىر ايتا كەتەتىن جاعداي بار. ءدال قازىرگى ۋاقىتتا گەوساياسي احۋال ۇشقىنىپ تۇر. بىزگە كيتتەرمەن كيلىگۋدىڭ، اكۋلالارمەن ايقاسۋدىڭ ەشقانداي قاجەتتىلىگى جوق. مۇحيتتىڭ جوعارعى قاباتىندا دا، تەرەڭىندە دە جۇرگەندىكتەن ءبىز كوپۆەكتورلى ساياسات ۇستانۋعا ءتيىسپىز. قالعىپ، مۇلگىمەي دۇرىستاپ تىڭداپ الىڭىزدار. ءبارىبىر وقىمايتىندارىڭىزدى بىلەمىن. كۇنى ەرتەڭ وقىماي، بىلمەي ناسيحاتتاۋعا كوشەسىڭدەر. ۇساق بالىقتاردىڭ ءوسۋىنىڭ باياۋلاۋى ءبىزدى ەكونوميكالىق تىعىرىققا تىرەيدى. ءبىز قۇرلىقتا دا ءومىر سۇرە الاتىن بولعاندىقتان دامۋدىڭ جاڭا كەزەڭىنە اياق باسۋىمىز كەرەك. بۇل ءبىزدىڭ قوسىمشا رەسۋرسىمىز بولىپ تابىلادى. بىزگە ينفراقۇرىلىمدى دامىتۋدىڭ ەشبىر قاجەتتىلىگى جوق. تابيعاتتا نە بار، سونى پايدالانامىز. ءبىز قۇرلىقتا دا، سۋدا دا جۇبىمىزدى جازباي جۇرۋگە ءتيىسپىز. بۇل دامۋدىڭ پينگۆيندىك مودەلى دەپ اتالادى. كوبەيۋ ءبىزدىڭ نەگىزگى يدەولوگيامىزدىڭ نەگىزگى ءتىنى.
مەنىڭ بيىلعى جولداۋىمدا ايتارىم وسى. وسى باعىتتا بارلىقتارىڭىزعا تابىس تىلەيمىن.