«نۇر وتان» پارتياسىنىڭ «قازاقستان. 2017 ماقساتتارى. ۇلتتىق ءىس-قيمىل جوسپارى» سايلاۋالدى تۇعىرناماسىنىڭ «حالىق بىرلىگى» باعىتى بويىنشا ساراپتاما توبىنىڭ كەزەكتى وتىرىسىندا قر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى توراعاسىنىڭ ورىنباسارى سەرىك سالەموۆ تەرمينولوگيا سالاسىنداعى پروبلەمالاردىڭ بىرقاتارىن اتادى.

«جىل سايىن مەملەكەتتىڭ قاتىسۋىنسىز عالىمدار مەن باسقا جەكە تۇلعالار ءتۇرلى باسپادا شىعاراتىن ونداعان سوزدىكتەر شىعارۋدا. ولار تىركەلمەگەندىكتەن، ءتىپتى ناقتى سانىن ايتۋ دا قيىن. ولاردىڭ ىشىندە ەكى، ۇشتىلدىك تە، تەرمينولوگيالىق تا سوزدىكتەر بار. ءارتۇرلى كوزقاراسپەن، ەشبىر ماقۇلدانباستان شىققان سوزدىكتەردە بىرىزدىلىك جوق ەكەندىگى تۇسىنىكتى. ال بۇل سوزدىكتەردى وقۋشىلاردان باستاپ، ءار بۋىننىڭ، ءار مەكەمەنىڭ قىزمەتكەرلەرى پايدالانادى»، – دەدى ول.

«بۇگىنگى تاڭدا – قازاق تەرمينولوگياسىنىڭ قايتا قالىپتاسۋ كەزەڭىندە بۇكىل ەلدىڭ نازارىنا ۇسىنىلاتىن سوزدىكتەردە بىرىزدىلىكتىڭ بولماۋى سالانىڭ دامۋىنا كەدەرگى كەلتىرىپ، تيىسىنشە ءىس جۇرگىزۋدە كەلەڭسىزدىكتەر تۋعىزۋدا. تەرمينولوگيا سالاسى بويىنشا ەلىمىزدىڭ اۋماعىندا شىعارىلاتىن بارلىق سوزدىكتەرگە ساراپتاما جاساپ، ماقۇلدايتىن، تەرميندەردى بىرىزدەندىرىپ جانە رەتتەيتىن، جۇمىستى جۇيەلى تۇردە جۇرگىزەتىن مەكەمە بولماعاندىقتان، تەرمينولوگيالىق لەكسيكانى بىرىزدەندىرۋ جانە رەتتەلگەن تەرمينولوگيالىق قوردى قالىپتاستىرۋ ماسەلەسى شەشىلمەي وتىر»، – دەپ اتاپ ءوتتى س.سالەموۆ.

ايتا كەتەيىك، وتىرىس قورىتىندىسى بويىنشا ارنايى تەرمينولوگيا ينستيتۋتىن اشۋ، ونى رەسپۋبليكالىق بيۋدجەتتەن قارجىلاندىرۋ، نورماتيۆتىك قۇقىقتىق قامتاماسىز ەتۋ بويىنشا پىسىقتالعان ۇسىنىستار ەنگىزۋ، ەلىمىزدىڭ اۋماعىندا شىعارىلاتىن بارلىق سوزدىكتەردىڭ ارنايى تەرمينولوگيالىق ينستيتۋتتا ساراپتامادان ءوتۋىن مىندەتتەۋدى زاڭداستىرۋدىڭ مۇمكىندىكتەرىن قاراستىرۋ، مەملەكەتىك ءتىل ساياساتىن ودان ءارى جەتىلدىرۋ جونىندەگى كوميسسيا حاتاماسى تارماقتارىنىڭ تولىعىمەن ىسكە اسىرۋ جانە باسقا دا ناقتى ۇسىنىستار جاسالدى.

اباي-اقپارات