وسى ۋاقىت ارالىعىنا دەيىن تىلگە قاتىستى ءبىراز ماسەلە كوتەرىلدى. سونىڭ ىشىندە بالاعا ءوز انا ءتىلىن جاستايىنان ۇيرەتۋ قاجەتتىگى ءسوز بولدى. ەندى ءبىزدى الاڭداتقان ءجايت، بۇگىندە بەسىك جىرىن ايتۋ جەتكىلىكتى دارەجەدە ورىندالىپ جۇرگەن جوق. ونىڭ ءبىر ءمانىسىن مىنادان ىزدەگەن ءجون. جەكەلەگەن دارىگەرلەردىڭ ايتۋىنشا، بالانى بىرنەشە ساعات بويى بەسىكتە ۇستاۋ قان اينالىمى قىزمەتىن ناشارلاتىپ، «ونىڭ تولىق ءوسىپ-جەتىلۋىنە كەدەرگى جاسايدى» ەكەن. ەگەر، راسىمەن وسىلاي بولسا، بەسىكتە جاتىپ، تاربيەلەنگەن  حالىق جازۋشىسى شەرحان اعا مۇرتازا تۋرالى Baq.kz-تە (09 جەلتوقسان 2011, سۇحبات. شەرحان مۇرتازا، حالىق جازۋشىسى: «مەنىمەن بىرگە تۋعان ۇرپاق قىرىلىپ قالماعاندا، بۇگىن 30-40 ميلليونعا جەتەر مە ەدىك...) جاريالانعان مىنا سۇحباتقا نازار سالىڭىز. وندا بەلگىلى قالامگەر بىلاي دەيدى:  «مەن اكەمنىڭ جالعىزىمىن. مەنەن بۇرىن ۇشەۋى، بىرىنەن سوڭ ءبىرى، قاراشەشەكتەن قايتىس بولىپ كەتكەن. شەشەك شىعادى، ولە بەرەدى، ءتىرى قالمايدى. مەنىمەن بىرگە تۋعان بالالاردىڭ قىرىلعانى – ءبارى ءتىرى بولعاندا، ءبىز بۇگىنگى زاماندا، 30-40 ميلليونعا جەتەر مە ەدىك؟! قىرىلىپ قالعان! قىناداي قىرىل­عان، قاراشەشەكتەن! مەن امان قالعام! نەگە، امان قالعام؟ سويتسەم، مەنىڭ بەسىگىم ار­شا اعاشىنان ەكەن. اجەم – كۇنەكەي، جا­رىق­تىق، بايدىڭ قىزى. سول اجەمنىڭ بەسىگى بولعان. ونى «ارشابەسىك» دەيدى. تالاس الا­تاۋىن­دا وسەتىن ارشا، سودان بەسىك جاساعان. ارشابەسىككە قۇرت-قۇمىرسقا، «شورت-مورت»، بيت، اناۋ-مىناۋ، جىبىرلاعاندار جولاماي­دى، قىرىلىپ قالادى. ماعان دا شىققان، قاراشەشەك. قۇداي ساقتاپ، سول ارشابەسىكتىڭ ارقاسىندا امان قالعام. اكەم جارىقتىق ول كەزدە جاس، مەن بەسىكتە جاتقاندا: «مىناۋ دا ادام بولمايتىن بولدى عوي» دەپ تەرىس قاراپ، كۇدەر ءۇزىپ قالعان ەكەن. قۇدايدىڭ قۇدىرەتى، ءبىر كەزدە مەن ايتەۋىر، ءتىرىلىپ، قاتارعا قوسىلىپپىن. امان قالۋىما، سول ارشابەسىك سەبەپ بولدى. شەشەك اۋرۋىنىڭ، دەرتىنىڭ ۋىتىن ءوزىنىڭ بويىنا سىڭىرگەن دۇنيە. قاسيەتتى ارشا اعاشى بار – تالاس ءتاڭىرتاۋىن­دا. سول جەرلەردە وسەدى. كوپ جەرلەردە جوق، قاسيەتتى ارشا. ول كەز كەلگەن جەردە وسە بەرمەيدى».

شەرحان اعامىزدىڭ ويى وزگەدەن ەرەك ەكەنىن ءبارىمىز جاقسى بىلەمىز. سوندىقتان بالانى بەسىكتە ۇستاۋ زيان دەگەن پىكىر قيسىنعا كەلمەيدى. قورىتا كەلگەندە، ءدال قازىرگى كەزدە قالادا جاڭا تۋعان نارەستەنى بەسىككە بولەپ جۇرگەندەر اۋىز تولتىرىپ ايتارلىقتاي ەمەس. ال انىعى، اجەلەرىنەن بەسىك جىرىن تىڭداپ وسكەن  بالالاردىڭ دەنى قازاقشا سويلەيدى.وسى ورايدا، «بالامىزدى كەرەۋەتتە ۇستاپ، بەسىك جىرىن ايتپاي، ءتىلىمىزدى جورگەكتەن «تۇنشىقتىرىپ» جاتقان ءوزىمىز ەمەس پە؟ دەگەن سۇراق ەرىكسىز تۋىندايدى.

ءامىرحان الماعانبەتوۆ،

استانا

Abai.kz