كۇنى كەشە قازاقستان كوممۋنيستىك پارتياسىنىڭ بۇرىنعى وكىلى الپامىس بەكتۇرعانوۆتىڭ مالىمدەمەسىن جاريالاعان بولاتىنبىز. ول ءوزىنىڭ پارتيا قاتارىنان نە ءۇشىن شەتتەتىلگەنىن ايتىپ، كومپارتيانىڭ ىشتەن ءبۇلىنىپ جاتقاندىعىن مالىمدەدى. سونداي-اق، كوممۋنيست ءوز ارىپتەستەرىن وسىناۋ زاڭسىزدىقتارمەن بىرگە كۇرەسۋگە دە شاقىرعان.

بۇگىن بەكتۇرعانوۆتىڭ وسى باستاماسىن وزگە پارتيالاستارى دا قولداپ، ءباسپاسوز ءماجىلىسىن وتكىزدى. اتاپ ايتقاندا، قكپ ۇيىمداستىرۋ ءبولىمىنىڭ باسشىسى كوسياچەنكو ۆلاديمير ۆاسيلەۆيچ پەن قكپ وك-نىڭ بۇرىنعى مۇشەسى يسمايلوۆ مادەل مۇحامەديۇلى جۋرناليستەرمەن كەزدەسىپ، ءوز شىندىقتارىن ورتاعا جايىپ سالدى.

«قازاقستانداعى كومپارتيا قۇرىلعان كەزدەن بەرى وندا يدەولوگيامەن ەشكىم اينالىسقان جوق. وبلىستىق، قالالىق فيليالداردىڭ ەشقايسىسى پارتيا مۇشەلەرىن ەسەپكە الۋ ماسەلەسىنە پىسقىرىپ تا قارامادى. سونىڭ سالدارىنان قازىر قاي وڭىردە قانشا كوممۋنيست بارىن ناقتى ەشكىم ايتا المايدى. كەيبىر بولىمشەلەردە نەبارى 2-3 ادامنان عانا بار. ال، سەمەيدەگى پارتيانىڭ كوميتەتىندە جالعىز ادام جۇمىس ىستەپ كەلەدى، ول – ماحىجانوۆ. بۇل اۋىزبىرشىلىكتىڭ جوعىنان. مۇنىڭ سوڭى قازاقستانداعى كومپارتيانىڭ تولىق ىدىراۋىنا الىپ كەلۋى ابدەن مۇمكىن» دەيدى ۆلاديمير كوسياچەنكو.

ول پارتيا جەتەكشىسى ع.الدامجاروۆقا ورنىن بوساتۋدى تالاپ ەتىپ، جاڭا باسشىلىقتى وڭىرلەردەگى پارتيالاستارىمەن اقىلداسا وتىرىپ تاعايىنداۋ ۇسىنىپ وتىر.

Abai.kz