جۇما, 21 اقپان 2020
شيپاگەر 5162 0 پىكىر 23 قىركۇيەك, 2014 ساعات 17:00

ونەگەلى ءومىر يەسى ەدى...

ەلى ءۇشىن ەرەن ەڭبەك ەتىپ حالىق ىقىلاس-ءىلتيپاتىنا بولەنگەن ازاماتتار از ەمەس. ۇلاعاتتى ىستەرىمەن، قارا­پايىم دا ادامگەرشىلىك قاسيەتتەرىمەن  كوپتىڭ قۇرمەتىنە يە بولعان جان­دار ءاردايىم حالىق جادىندا ەسىندە ساقتالماق. وسىنداي شوقتىعى بيىك ازاماتتاردىڭ ءبىرى —  قاراعاندى وڭىرىنە سىيلى، قارقارالى توپىراعىنىڭ اياۋلى پەرزەنتى، اق حالاتتى ابزال جان، ناعاشى جۇرتىمنىڭ ماقتانىشى  — ومىرزاقوۆ نۇرباي ابىكەنۇلى ەدى. جۋىردا ناعاشى اعامنىڭ دۇنيە سالعانىنا قىرىق كۇن تولماق.     
نۇرباي ابىكەنۇلى ءومىرىنىڭ سانالى  بولىگىن مەديتسينا سالاسىنا دارىگەرلىك  قىزمەتكە ارنادى. مەكتەپتى اياقتاعان سوڭ قارقارالى زووۆەتتەحنيكۋمىن ءبىتىرىپ، كەيىن  قاراعاندى مەملەكەتتىك مەديتسينا ينستيتۋتىن تەراپەۆت ماماندىعى بويىنشا ءتامامدادى. شاحتينسك قالاسىنىڭ قالالىق ەمحاناسىنان باستالعان قاجىرلى ەڭبەك جولى كەيىننەن جامبىل سوۆحوزىندا اۋرۋحانا مەڭگەرۋشىسى، مەديتسينا ءبولىمىنىڭ باسشىسى، ىنتالى سوۆحوزىندا ەمحانا مەڭگەرۋشىسى قىزمەتىنە دەيىن ورلەي ءوستى. 2006 جىلدان عۇمىرىنىڭ سوڭىنا دەيىن قاراعاندى قالاسىنىڭ № 2 ەمحاناسىندا جەمىستى ەڭبەك ەتىپ،  مىڭداعان ناۋقاستىڭ ءومىرىن ساقتاپ، دەرتىنەن ايىقتىردى. ول بارلىق سىرقاتقا بەينە ءبىر تۋىسىنداي قاراپ، تۋعانىنداي كومەككە كەلدى. بۇل قىزمەتتىڭ قاجىرلى ەڭبەك پەن ۇلكەن شىدامدىلىقتى تالاپ ەتەتىنى بەلگىلى. ءوز ىسىنە جاۋاپتى ءارى ۇقىپتى قارايتىن، جاستايىنان تياناقتى ناعاشىم ءار ناۋقاسقا قامقورلىق تانىتىپ، مەيىرىمىن سىيلاي ءبىلدى. دەنساۋلىعىن قالپىنا كەلتىرىپ، ءومىرىن ساقتاعانى ءۇشىن مىڭداعان ناۋقاستىڭ تولاسسىز العىسىنا بولەندى.

پەندەنىڭ قامشىنىڭ سابىنداي قىسقا عۇمىرىندا نۇرباي ابىكەنۇلى ءاۋ باستان ءوزى ءۇشىن ەمەس، وزگەلەر ءۇشىن ءومىر سۇرگەندەي. ءاردايىم ءبىلىم-بىلىگىن، جيعان-تەرگەنىن ءوز تاجىريبەسىندە قولدانىپ، وزگەلەردىڭ دەنساۋلىعىن ساۋىقتىرىپ، ولاردى باقىتتى ەتۋگە ۇمتىلدى...

نۇرباي ابىكەنۇلى وتباسىندا دا باقىتتى ءومىر كەشتى. ەلگە ۇلگى، جۇرتقا ونەگە بولاتىنداي تاربيەلى ۇل-قىز ءوسىرىپ، نەمەرە-شوبەرە سۇيگەن ابىرويلى اتا ەدى... ەندى ارتىندا قالعان سول سانالى ۇرپاعى ارداقتى اكەسىنىڭ،  ال اعايىن-تۋعانى جاقىن تۋىسىنىڭ اتىن قادىرلەي، ۇلاعاتتى ءىسىن جالعاستىرادى دەپ سەنەمىز. سالماقتى دا سابىرلى مىنەزىمەن، مەيىرباندى قالپىمەن قايىرلى عۇمىر كەشكەن نۇرباي اعامىزدىڭ بەينەسى ءبىزدىڭ جۇرەگىمىزدە ماڭگى ساقتالادى.
يمانىڭ جانىڭا سەرىك بولىپ، سول مەيىرباندى اسىل مىنەزىڭمەن جۇماقتىڭ تورىنەن ورىن العايسىڭ، نۇرباي اعا!

 

قارىنداسى بيكەن، جيەندەرى گۇلنار، نۇركەن جانە ەركەبۇلاننىڭ اتىنان

ديدار امانتاي

قازاقستاننىڭ ەڭبەك سىڭىرگەن قايراتكەرى،

مەملەكەتتىك "دارىن" سىيلىعىنىڭ جانە قازاقستان مەتسەناتتار كلۋبى «تارلان-ءۇمىت» سىيلىعىنىڭ يەگەرى،

ش.ايمانوۆ اتىنداعى «قازاقفيلم» اق باس رەداكتورى

 جازۋشى، دراماتۋرگ،

Abai.kz

0 پىكىر