استانا قالاسى اكىمدىگىنىڭ قولداۋىمەن ساكەن سەيفۋللين مۇراجايى جانە قازاقستان جازۋشىلار وداعىنىڭ استانا فيليالى وسىمەن بەسىنشى رەت وتكىزىپ وتىرعان جىر بايگەسى ءوز مارەسىنە جەتتى.

«ۇلىتاۋ ۇلاعاتى – ۇلت تاريحى» ايدارىمەن جاريالانعان بيىلعى ءمۇشايرا قازاق حاندىعىنىڭ 550 جىلدىعىنا ارنالدى. ەلباسىنىڭ ۇلىتاۋدا بەرگەن سۇحباتىنان سەرپىن العان ءدۇبىرلى جىر دوداسىنا 90 اقىن قاتىستى. اقىندارىمىز تاۋەلسىز قازاقستاننىڭ ايشىقتى كەلبەتىن، ازاتتىق جولىندا ارپالىسىپ وتكەن بابالار تاريحىمەن ۇشتاستىرا جىرلاي وتىرىپ، كەلەلى تاقىرىپتى جان-جاقتى جارقىراتا اشا بىلۋگە ۇمتىلىستارى كوڭىلدەن شىقتى. بايگەگە ولەڭدەر، تولعاۋلارمەن قاتار سۇبەلى-سۇبەلى پوەمالار دا ءتۇستى. كەيبىر ۇمىتكەرلەردىڭ تىڭنان تۇجىرىم جاساپ، ءورىستى ويلارعا قۇلاش ۇرۋدىڭ ورنىنا تاريحي وقيعالاردى تىزبەكتەۋمەن شەكتەلىپ، ءبىر سارىندىلىققا ۇرىنعانىن دا ايتا كەتۋدى ءجون كوردىك.

قالاي بولعاندا دا مەرەيلى مەرەكەگە ارنالعان بيىلعى ءمۇشايرادا ويلاعان، دىتتەگەن جەرىمىزدەن شىقتى.

استانا قالاسى اكىمدىگى جىل سايىن ءداستۇرلى تۇردە وتكىزىپ كەلە جاتقان مۇشايراعا تەك رەسپۋبليكا اقىندارى عانا ەمەس شەتەلدەگى قانداس قالامگەرلەرىمىزدىڭ قاتىسۋى جىر بايگەسىنىڭ بەدەلىن ودان سايىن بيىككە كوتەرگەنى انىق.

بەلگىلى، بەدەلدى ادەبيەت قايراتكەرلەرىنەن قۇرالعان قازىلار القاسىنا اكادەميك، فيلولوگيا عىلىمدارىنىڭ دوكتورى، پروفەسسور سەيىت قاسقاباسوۆ توراعالىق ەتتى. باس بايگەنى وسكەمەندىك تالانتتى اقىن اسكەرحان اقتاي قانجىعاسىنا بايلاندى. اسكەرحاننىڭ «ازاتتىق تولعاۋى» كونە جىراۋلار جىرىنىڭ جالعاسىنداي ءسوز كەسەكتىگىمەن دە، كوركەمدىك ورنەگىمەن دە بۇل رەتكى ءمۇشايرانىڭ جاڭالىعى بولدى. ءبىرىنشى ورىن مەملەكەتتىك «دارىن» جاستار سىيلىعىنىڭ لاۋرەاتى، بەلگىلى جىر جۇيرىگى داۋلەتكەرەي كاپۇلىنىڭ «بايراعى بۇلتتى جارعان» ولەڭىنە بەرىلدى. ەكى ەكىنشى ورىندى بەلگىلى اقىن وتەگەن ورالبايۇلىنىڭ «ۇلت ۇرانى - ۇلىتاۋ» تولعاۋى مەن جانات اسكەربەكقىزىنىڭ «وربۇلاق شايقاسى» ولەڭ-بايانى ءوزارا ءبولىستى. ءۇش ءۇشىنشى ورىندى قاراعاندىلىق ابزال بوكەننىڭ «التىن تۋرالى تولعانىس»، ءىلياس مۇقاەۆتىڭ «جەرۇيىق»، تانىمال ايتىسكەر اقىن امانجول ءالتايدىڭ «تۇلپار جىرى» ولەڭ-تولعاۋلارى ەنشىلەدى. ىنتالاندىرۋ سىيلىقتارى قىزىلوردالىق تولىباي ابىلاەۆتىڭ «قاراقۇم قۇرىلتايى»، استانالىق ەربول بەيىلحاننىڭ «كوشىم حان-سۇزگە»، كوكشەتاۋلىق ەربولات باياتۇلىنىڭ «بابا تاريح – باستاۋىم» پوەمالارىنا، استانالىق جاس اقىندار ەرجان جاۋبايدىڭ «كەشەگى قازاق مەن ەدىم»، بالتابەك نۇرعاليدىڭ «مەن-ۇلىتاۋ اسپانى»، «باقىت» ولەڭدەرىنە بەرىلدى.

جۇلدەگەرلەردى ماراپاتتاۋ ءراسىمى «اتا تاريح اقىندار جىرىندا» دەگەن ايدارمەن 3 شىلدە كۇنى ساعات 17.00-دە استانا قالاسى «كونگرەسس-حولل» سارايىندا وتەدى. سالتاناتتى كەشتە جۇلدەلى جىرلار وقىلىپ، ونەر جۇلدىزدارى اننەن شاشۋ شاشادى.  

س.سابىربەكوۆ

جاۋاپتى حاتشى

اباي-اقپارات