جاقىندا قازاقتىڭ ۇلى اقىنى اباي قۇنانبايۇلىنىڭ ەسكەرتكىشى مىسىردىڭ كاير قالاسىندا ورناتىلاتىن بولادى. قر سىرتقى ىستەر مينيسترلىگىنىڭ مالىمەتەرىنە سۇيەنسەك،  قازاق اقىنىنىڭ ەسكەرتكىشىن اشۋعا مىسىر استاناسىنىڭ باسشىلىعى باستاماشىلىق ەتىپ وتىر. بۇل تۋرالى abai.kz  پورتالى Total.kz-كە سىلتەمە جاساي وتىرىپ حابارلايدى.

قر ءسىم ءباسپاسوز قىزمەتى تاراتقان اقپاراتتارعا سۇيەنسەك، اباي قۇنانبايۇلىنىڭ ەسكەرتكىشى 2016 جىلى مىسىر استاناسى كاير قالاسىنداعى «بوستاندىق جانە دوستىق» ساياباعىندا ورناتىلادى دەپ جوسپارلانعان.

جاقىندا قازاقستاننىڭ مىسىرداعى توتەنشە جانە وكىلەتتى ەلشىسى بەرىك ارىن مىرزا كاير قالاسىنىڭ باسشىسى ع.مۇستافا مۇاممەد سايدپەن كەزدەسكەن.

كەزدەسۋلەر بارىسىندا ەكى  ەل اراسىنداعى ساۋدا-ەكونوميكالىق، مادەني-تۋريستىك قارىم-قاتىناستار جاعدايلارى تالقىلانعان.

سونىمەن قاتار، 1999 جىلى قول قويىلعان مىسىر مەن قازاقستان اراسىنداعى دوستىق كەلىسىمشارتتارى نەگىزىندە،  ەكى ەل استانالارى اراسىنداعى ىنتىماقتاستىقتى ارتتىرۋ ماسەلەلەرى دە ءسوز ەتىلگەن.

ءوز كەزەگىندە  كاير قالاسىنىڭ باسشىسى ع.م.سايد مىرزا قازاقستاننىڭ وسى ۋاقىتتار ارالىعىندا جەتكەن جەتىستىكتەرىن ءسوز ەتىپ، الداعى ۋاقىتتارى قازاقستانمەن قارىم-قاتىناستارىن نىعايتۋعا نيەتتى ەكەندىكتەرىن جەتكىزگەن.

سونىڭ العاشقى كورىنىستەرى رەتىندە، كەلەر جىلى كاير قالاسىندا ورنالاسقان «بوستاندىق جانە دوستىق» ساياباعىندا قازاق اقىنى اباي قۇنانبايۇلىنىڭ ەسكەرتكىشىن اشۋ تۋرالى كەلىسىمگە قول قويىپ، ۋادەسىن بەرگەن.

بيىل - قازاقتىڭ ۇلى ويشىلى، اقىن اباي قۇنانباەۆتىڭ تۋعانىنا 170 جىل. وسى ايتۋلى داتاعا بايلانىستى رەسپۋبليكامىزدا عانا ەمەس، الەمنىڭ تۇكپىر-تۇكپىرىندە ءتۇرلى شارالار ۇيىمداستىرىلۋدا.

راس، كايردەن جەتكەن بۇل حابار كوڭىلىمىزدى مارقايتىپ تاستادى ءبىر. دەسە دە، كاير قازاق اقىنىنا ەسكەرتكىش قويعان العاشقى قالا ەمەس.

وزبەكستان استاناسى تاشكەنتتەگى اباي ەسكەرتكىشى

مىسالى، 1988 جىلى كيەۆ ءبىر كوشەنىڭ اتىن اباي قۇنانباەۆتىڭ اتىنا بەردى. اقىن اتىنداعى كوشە سونداي-اق ۋكراينانىڭ كراماتورسك، دنەپروپەتروۆسك قالالارىندا دا بار.  

1995 جىلى 15 اقپاندا الەمنىڭ ورتالىعى سانالاتىن لوندون قالاسىندا روللان سەيسەمباەۆتىڭ باستاماسىمەن اباي ءۇيى اشىلدى. كايردە اباي اتىنداعى كوشە 1998 جىلى پايدا بولسا، بەرليندە 2000 جىلى 18 اقپان كۇنى اباي-شتراسسە اشىلعان. سونىمەن بىرگە تاشكەنت، بىشكەك قالالارىندا دا، ءتىپتى ءۇندىستاننىڭ استاناسى نيۋ دەليدە دە اباي قۇنانباەۆ اتىنداعى كوشە بار.

2006 جىلى رەسەي استاناسى ماسكەۋدىڭ  «چيستىە پرۋدى» بۋلۆارىندا اباي ەسكەرتكىشى اشىلدى. 

2007 جىلى قازان ايىندا يران يسلام رەسپۋبليكاسى تەگەران قالاسىندا اباي ءمۇسىنى اشىلدى. ءمۇسىن ۇلتتىق كىتاپحاناعا كىرەبەرىس اللەيادا ورناتىلعان. سونداي-اق يران ۇلتتىق كىتاپحاناسىندا دا ابايدىڭ ءمۇسىنى قويىلعان. 

ال 2011 جىلى جەلتوقسان ايىندا ازەربايجان استاناسى باكۋدە اباي قۇنانباەۆتىڭ اتىمەن اتالعان كوشەنىڭ سالتاناتتى اشىلۋ ءراسىمى ءوتتى.

2013 جىلى ماۋسىم ايىندا قازاقستان پرەزيدەنتى نۇرسۇلتان نازارباەۆ پەن وزبەكستان پرەزيدەنتى يسلام كاريموۆتىڭ قاتىسۋىمەن تاشكەنتتەگى اباي كوشەسىندە اقىن ەسكەرتكىشى اشىلدى.

2014 جىلى ناۋرىزدا قىتاي استاناسى بەيجىڭنىڭ ورتالىعىنداعى «چاويان» ساياباعىندا ابايعا ارنالعان ەسكەرتكىش اشىلدى.

2014 جىلى ۆەنگريا استاناسى بۋداپەشتتەگى استانا كوشەسىنە ابايدىڭ ەسكەرتكىشى ورناتىلدى.

نۇرگەلدى ابدىعانيۇلى

Abai.kz  

دەرەكتەر قازاقپاراتتان الىندى