«مەملەكەت وسى جىلداردىڭ ىشىندە سىزدەردىڭ بيزنەستەرىڭىزدى دامىتىپ، اياققا تۇرۋلارىڭىزعا بارلىق جاعدايدى جاسادى. ءبىز باي ازاماتتار تۇراتىن ەل قۇرعىمىز كەلەدى. ونداعى ويىمىز – باي ازاماتتار دامىعان بيزنەسىمەن وزىنە دە، مەملەكەتكە دە كومەكتەسەدى دەپ ويلادىق. ەندەشە بۇگىنگىدەي سىن ساعاتتاردا مەملەكەتكە كومەكتەسىڭىزدەر! اۋقاتتى بولدىڭىزدار! جاقسى گازەتتەردىڭ بەتىنە شىعىپ، ميللياردەر، ميلليونەر بولعاندارىڭىزدى كورسەتتىڭىزدەر. قۇتتى بولسىن بارلىعى. باقىتتى بولىڭىزدار. ەندى مىنە مەملەكەتتىڭ، ەلدىڭ الدىندا جاۋاپ بەرەتىن كەزدەرىڭ دە كەلدى. جەكەشەلەندىرۋدىڭ جاڭا لەگىنە بەلسەندى قاتىسىپ، اقشالارىڭدى زاڭداستىرىپ، اشىق جۇمىس ىستەڭدەر!»،- دەپ ۇندەۋ تاستادى مەملەكەت باسشىسى نۇرسۇلتان نازارباەۆ 30 قاراشادا قازاقستان حالقىنا جولداۋىن جاريالاۋ كەزىندە.

ەلباسى اقشاسىن شەتەلدەرگە جاسىرعان كاسىپكەرلەر مەن ىسكەر ازاماتتارعا ونى قازاقستانعا اكەلىپ، ءۇش جاقسى نارسە جاساۋعا بولاتىنىن ايتتى. «بارلىق اقشالارىڭدى شەتەلدىڭ ارعى جاعىنا تىققىلاماي، ەلگە اكەلىڭدەر! ەشكىم تىققىلاتپايدى. شۆەيتساريادان باستاپ ەكونوميكالىق ىنتىماقتاستىق جانە دامۋ ۇيىمىنا مۇشە-ەلدەردىڭ بارلىعى ءبىر اپتا بۇرىن شەتەلدىك ازاماتتاردىڭ اكتيۆتەرىن اشىپ تاستايتىنى تۋرالى قاۋلى قابىلدادى. تەتىكتەردى اشىپ تاستاعان سوڭ، بارلىعى بەلگىلى بولادى. تەك قانا قازاقستانعا اكەلگەن اقشا وزدەرىڭدىكى بولادى. ەشكىم وعان تيىسپەيدى، سەبەبى مەملەكەت قورعايدى. ول اقشالارىڭدى ەلگە اكەلىپ، ءۇش جاقسى نارسە جاسايسىڭدار: بىرىنشىدەن، ول تۇراقتى تابىس تابۋدىڭ جولى، ەكىنشىدەن، حالىققا جۇمىس بەرەسىڭدەر. ۇشىنشىدەن، سالىق تولەپ، مەملەكەتكە كومەكتەسەسىڭدەر. وسىلايشا حالىقتىڭ راحمەتىن، ريزاشىلىعىن الاسىڭدار»،- دەپ ءتۇسىندىردى نۇرسۇلتان نازارباەۆ.

سونىمەن قاتار، ەلباسى اقشا مەن مۇلىكتى زاڭداستىرۋ مەرزىمى 2016 جىلدىڭ 31 جەلتوقسانىنا دەيىن ۇزارتىلعانىن ەسكە سالدى. اقشا مەن مۇلىكتىڭ زاڭدى اينالىمعا قايتارىلۋى ءۇشىن قوسىمشا ىنتالاندىرۋلار قابىلدانعانىن، بۇعان قوسا، قۇپيالىلىق پەن سوتتىڭ قۋدالاۋىنان ساقتاندىرۋ شارالارى ساقتالاتىنىن قاداپ ايتتى. مەملەكەت باسشىسى پارلامەنت پالاتالارى ماقۇلداعان «قر-نىڭ كەيبىر زاڭنامالىق اكتىلەرىنە قازاقستان رەسپۋبليكاسىنىڭ ازاماتتارىنا، ورالماندارعا جانە قر-دا تۇرۋعا ىقتيارحاتى بار ادامدارعا ولاردىڭ مۇلىكتى جاريا ەتۋىنە بايلانىستى راقىمشىلىق جاساۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويعانىن حابارلادى. سونداي-اق، ۇكىمەتكە زاڭداستىرۋ تالاپتارىن تاعى ءبىر تالداۋدان وتكىزىپ، قاجەت بولعان جاعدايدا قاتىسۋشى تاراپتارعا كەپىلدىكتەردى كۇشەيتىپ، ءتۇسىندىرۋ جۇمىستارىن تياناقتى جۇرگىزۋدى تاپسىردى. «بۇل سەندەردىڭ اقشالارىڭ كەرەك بولعاندىقتان جاسالىپ وتىرعان شارا ەمەس. ەشكىمگە قىلمىستىق ءىس قوزعالىپ، بوسقىن قۇساپ قاشىپ جۇرگەنىن قالامايمىز. اقشانى زاڭداستىرىپ، تىنىش ۇيىقتاڭدار!» دەدى كاسىپكەرلەرگە ارناعان سوزىندە پرەزيدەنت.

الايدا قازاقستاندىقتار وزدەرىنىڭ شەتەلدەردەگى اكتيۆتەرىن زاڭداستىرۋعا اسىعاتىن ەمەس. مەملەكەتتىك كىرىستەر دەپارتامەنتى حابارلاعانداي، 2015 جىلدىڭ 1 جەلتوقسانىنا دەيىنگى كەزەڭدە قۇنى 16 132 669,8 مىڭ تەڭگەنى قۇرايتىن 4069 نىسان زاڭداستىرىلعان. قۇزىرلى ورگاننىڭ مالىمەتىنشە، 2015 جىلدىڭ 2 جەلتوقسانىنا دەيىنگى احۋال بويىنشا، استانا قالاسىنداعى مەملەكەتتىك كىرىستەر ورگاندارىنا قازاقستان رەسپۋبليكاسىنان تىس جەرلەردە ورنالاسقان مۇلىكتى زاڭداستىرۋ بويىنشا ەشقانداي ءوتىنىش تۇسپەگەن.

ءامىرلان ءالىمجان

Abai.kz