بۇگىنگى كۇننىڭ ەڭ وتكىر تاقىرىبى –  باسپانا ماسەلەسى. ناعىز باسپاناسىز حالىق ءالى ۇكىمەتتەن قايىر كۇتىپ ءجۇر مە، جوق الدە ءۇمىتىن ءۇزدى مە؟ شىنتۋايتىندا حالىق الدەقاشان ءۇمىتسىز ءومىر ءسۇرىپ كەلەدى. ولاردىڭ قولى جەتۋگە ءتيىس باسپانالار باقۋات جۇرتتىڭ ۇلەسىنە تيءىپ, ال حالىق باسپانانى سولاردان جالعا الىپ تۇرۋعا ءماجبۇر. 

حالىقتىڭ ءال-اۋقاتىن جاقسارتۋ ماقساتىندا ۇكىمەتىمىز ءارتۇرلى باعدارلامالاردى بەكىتىپ، ەلىمىزدىڭ ەكپىندەپ وسۋىنە ىقپال ەتىپ باعۋدا. وسى قارقىنمەن دامىعان ەلۋ ەلدىڭ قاتارىنا قوسىلۋ ەل بولىپ كوزدەلگەن ۇلى ماقسات. ەڭ ءبىر اۋىز تولتىرىپ ايتارلىق مەملەكەتتىك باعدارلامالاردىڭ ءبىرى – باسپاناسىز ازاماتتاردى تۇرعىن ۇيلەرمەن قامتاماسىز ەتۋ.

وسى باعدارلاما اياسىندا ەلىمىزدىڭ تۇكپىر-تۇكپىرىندە پاتەر كىلتىنە قول جەتكىزگەن مىڭداعان ادامدار بار. دەگەنمەن، وسى پاتەرلەرگە شىنىمەن باسپاناعا مۇقتاج ادامدار جايعاستى ما، ول ۇلكەن باسى اشىق داۋ بولىپ تۇر. باعدارلامانىڭ ەرەجەسى بويىنشا وسى پاتەرلەرگە تەك پاتەر يەلەرىنىڭ ءوزى عانا تۇرۋعا ءتيىس.

وزگە قالالاردى قويعاننىڭ وزىندە ۇكىمەت ءۇيىنىڭ تۇمسىعىنىڭ تۇبىندەگى استانا قالاسىندا پاتەرگە قول جەتكىزە سالىپ اقىلى تۇردە جالعا بەرىپ قويعان دەرەكتەرگە قالاي كوز جۇما قارايمىز. ءال-اۋقاتى الدەقايدا جاقسى ادامدار شىن مانىندە پاتەرگە ءزارۋ تۇلعالاردىڭ الدىن وراپ، قاعازىن قاتتاپ، ارىزىن جاتتاپ، ەبىن تاۋىپ ەكى اساۋمەن سۋ جاڭا پاتەرلەرگە يە بولۋدا. سويتەدى دە كوپ ۇزاماي ءدال سول پاتەرگە ءزارۋ تۇلعالاردىڭ وزىنە ۋداي اقىعا جالعا بەرىپ قىپ-قىزىل تابىس كوزىنە اينالدىرادى. نەتكەن قاراما-قايشىلىق دەرسىز؟! الدە جاعدايدى كەرسىنشە دەپ سەندىرگىڭىز كەلە مە؟ ەشكىمدى قولىنان ۇستاپ الاتىنداي دەرەكتەردى تاپپاعاننان ەمەس، باياعى كوزجۇمبايلىقتىڭ كەسىرىنەن ءوز نەسىبەمىزدەن ءوزىمىز قاعىلىپ جاتقانىمىزدى سەزبەيمىز اۋ. ەندەشە، سالعىرتتىقتى سىلكىپ تاستاپ، شىنايى فاكتىلەرگە نازار اۋدارالىق. ماسەلەن، جۋىردا عانا قولدانىسقا بەرىلگەن استانا ق.، ر.قوشقارباەۆ كوشەسى 45 جانە 45/1 ۇيگە، ايناكول كوشەسىندەگى 56 جانە 56/1 ءۇيدىڭ پاتەرىنە تۇگەل تەكسەرۋ جۇرگىزە قالساڭىز، پاتەر جالداپ تۇرۋشىلارمەن تىلدەسە الاسىز. پاتەر يەلەرى وزدەرىنىڭ جالعا بەرۋ ارەكەتتەرىن قاعازعا ءتۇسىرىپ، كەلىسىم جاساۋدان دا اياقتارىن تارتپايدى. ءسىرا، مەملەكەتتىك باقىلاۋشىلار وسىنداي فاكتىلەردىڭ وزىنە كوزىن جۇما بەرەدى دەپ سەنسە كەرەك.

گۇلجان ءىزتاي

Abai.kz