تەلەارنالارداعى ارتىستەرگە ارنالعان ءتۇرلى شوۋ باعدارلامالاردىڭ اتاۋىنا «جۇلدىز» ءسوزىنىڭ قولدانىلعانى ءجون بە؟ بايقاساڭىزدار، ءبىزدىڭ تەلەارنالاردا وسىناۋ ءسوزدى جالعاپ العان باعدارلامالار تىم كوپ-اق! «جۇلدىزدار جارقىرايدى»، «جۇلدىزدى دودا»، «جۇلدىزدى شاڭىراق»، «ەكى جۇلدىز»... وسىلاي كەتە بەرەدى.

الدىمەن «جۇلدىز» ءسوزىنىڭ ماعىناسىنا ءۇڭىلىپ الايىقشى! نەگىزى «جۇلدىز» ءسوزىنىڭ ماعىناسى (لات. stella نەمەسە لات. astrum; استرونومياداعى بەلگىسى) - سالماعى ەرەكشە اۋىر، اسپان دەنەسى. ال، اعىلشىنشاسى “star”. بۇل دا اسپان دەنەلەرىنە قاتىستى اتاۋ. سوندا اسپانداعى جۇلدىزدار جەردە قايدان ءجۇر؟ الدىمەن باتىستىڭ «star» اتاۋىن انشىلەر جايىنداعى باعدارلامالارعا قولدانا باستادىق. سوسىن وعان قاناعاتتانباي بولسىن، بولماسىن انشىلەردىڭ وزدەرىن جۇلدىزعا تەڭەۋ ءۇردىسى بەلەڭ الدى. قالىڭ كورەرمەن اراسىندا وتە تانىمال توپتارعا قولدانىلدى. كەيىن كەزەك باعدارلامالاردىڭ اتاۋىنا كەلدى. بۇدان شىعاتىن قورىتىندى- «جۇلدىز» اتاۋىن قولدانعان دا، ودان ءارى تاراتىپ جاتقان دا جۋرناليستەردىڭ وزدەرى. بەلگىلى جۋرناليست گۇلميرا ابىقايدىڭ پىكىرىنشە: « جۇلدىز بەن ءانشىنىڭ اراسى جەر مەن كوكتەي. قازىرگى كەزدە بولمايتىن جاڭادان شىققان ءانشىنىنىڭ ءوزىن «جۇلدىز» دەپ، ءوزىمىز دايىندايمىز. ولار كوتەرىلەدى، وسەدى، جارقىرايدى، كەيىن وشەدى، سونەدى. ال، ناعىز ءانشىنى حالىق قانشا بۋىن وتسەدە تىڭداي بەرۋى كەرەك.

قازىرگى كەزدە قاراپايىم ءانشى قالمادى! ءبارى «جۇلدىز»! يا، جۋرناليست اعايىننىڭ «ارقاسىندا» «جۇلدىز» ءسوزىن سوڭعى ءتورت-بەس جىلدا ءجيى ەستيتىن بولدىق. «جارىق جۇلدىز»، «حالىقتىڭ ماڭدايىنا بىتكەن جۇلدىزى»، «جۇلدىزدى تۋىسقاندار» سىندى تىركەستەر ءتىپتى شارشاتىپ جىبەرگەندەي. مەنىڭ ويىمشا، حالىق اراسىندا ورىندى-ورىنسىز قولدانىلىپ جۇرگەن بۇل ءسوزدىڭ كەڭ ەتەك جايعانى «ەكى جۇلدىز» باعدارلاماسىنان كەيىن بولۋ كەرەك. قازاقستان ارناسىنان 2011 جىلدان باستاپ كورسەتىلگەن وسى ءبىر تەلە شوۋ «Stars On The Stage» دەگەن امەريكاندىق باعدارلامانىڭ «جيەنى» دەسەك تە بولادى.. رەسەيلىكتەر ونى «دۆە زۆەزدى» دەپ «جيەندىك جاساسا، بىزدىكىلەر كوپ قينالماي، دالمە-ءدال اۋدارا سالدى. وسىدان سوڭ-اق، قازاق دالاسىنىڭ اسپانى تۇگىلى، جەرىنىڭ ءۇستى دە «جۇلدىزدار» مەكەنىنە اينالىپ شىعا كەلدى.

ەندى بۇكىل اقپارات قۇرالدارىن، تەلەارنالاردى جاۋلاعان «جۇلدىز» اتاۋىنان قۇتىلۋعا بولا ما؟» دەگەن ساۋال تۋىندايدى. سول باق-تاردا كوزى قاراقتى، ءسوز قادىرىن تۇسىنەتىن قازاق جۋرناليستەرى جەتەرلىك. جانە دە كوپشىلىگى باسشىلىق قىزمەتتە. بىلدەي باق-تىڭ تىزگىنىن ۇستاپ وتىرعان، قازاق جۋرناليستكاسىنا جانىاشىر قاينار ولجاي، نۇرتورە ءجۇسىپ، بيبىگۇل جەكسەنباي، باعدات قوجاحمەتوۆ سىندى اعا-اپالارىمىزدىڭ وسىنداي كەسەلمەن كۇرەسۋگە قاۋقارلارى جەتەدى عوي.

قازاقستانداعى تەلەارنالاردا ونەر يەلەرىنە قاتىستى «جۇلدىز» ءسوزىن قولدانباساق ەشتەڭە دە ءبۇلىنىپ كەتپەس دەپ ويلايمىن. وسى ماسەلەنى «باس رەداكتورلار كلۋبى» قاراپ، ءبىر-اق ساتتە «جۇلدىز» ءسوزىن قولدانباۋعا شەشىم قابىلدانسا قالاي بولار ەدى؟

نازەركە شاراپاددين

ستۋدەنت

Abai.kz