ءبىر ەمەس، ەكى ەمەس، قۇدايدىڭ قۇتتى كۇنى ءوز-وزىنە قول جۇمساۋعا اسىعىپ، ومىردەن باز كەشكەندەر كوبەيىپ بارادى. بۇگىن الماتىدا رايىمبەك جانە ءسۇيىنباي داڭعىلدارىنىڭ قيىلىسىنداعى "مەرەي" ويىن-ساۋىق جانە ساۋدا ورتالىعىنىڭ عيماراتىنان 49 جاستاعى ەگىز ايەل سەكىرىپ كەتتى. نەگە؟ "نۇر-وتاننىڭ" عيماراتىنىڭ الدىندا وتقا ورانعان ەرلان بەكتىباەۆتىڭ مۇڭىن، نارازىلىعىن جەتە تۇسىنبەگەن قازاق ەگىز ايەلدىڭ "نە ايتپاق" بولعانىن بىلە الا ما؟  

ءىىد ءباسپاسوز حاتشىسى سالتانات ازىربەكتىڭ مالىمەتىنشە، بۇل وقيعا بۇگىن تاڭ اتا بولعان. ەكى ايەل  اۋىر جاراقاتتان قازا تاپتى. "1966 جىلى دۇنيەگە كەلگەن ەكى ايەل عيماراتتان سەكىرىپ كەتتى. بۇل دەرەك جەتىسۋ اۋداندىق ىشكى ىستەر باسقارماسىنىڭ سوتقا دەيىنگى بىرىڭعاي رەەسترىندە تىركەلدى. قاجەتتى ساراپتامالار تاعايىندالدى. وقيعانىڭ ءمان-جايىن سوتقا دەيىنگى تەرگەۋ انىقتايدى. الدىن-الا بولجام بويىنشا، بۇل - سۋيتسيد", - دەپ حابارلادى ول. سونىمەن قاتار، ەكى ايەلدىڭ جۇمىسسىز ەكەنى انىقتالدى.

Kaz.tengrinews.kz cايتىنىڭ جازۋىنشا، قازان ايىنىڭ سوڭىندا شىمكەنتتەگى Mega ورتالىعىندا اتىراۋلىق ەر ادامنىڭ سۋيتسيد جاساعانى حابارلانعان بولاتىن. كۋاگەرلەردىڭ ايتۋىنا قاراعاندا، ەر ادام قورشاۋدان سەكىرىپ، مۇز ايدىنىنا قۇلاعان.ء ىىد ءباسپاسوز قىزمەتىنىڭ باسشىسى سالتانات قاراگوزوۆانىڭ ايتۋىنشا، اتىراۋدىڭ 1973 جىلى دۇنيەگە كەلگەن تۇرعىنى مۇزعا قۇلادى. "بۇل دەرەككە قاتىستى سوتقا دەيىنگى تەرگەۋ باستالدى. ەر ادام قالالىق اۋرۋحانانىڭ جانساقتاۋ بولىمىندە جان تاپسىردى", - دەدى قاراگوزوۆا.

كەشە الماتىدا كوپىردەن سەكىرمەك بولعان قىز قۇتقارىلدى. بۇل تۋرالى «قامشى» پورتالى Zakon.kz-كە سىلتەمە جاساپ حابارلاعان ەدى.

وقيعا 8 قاراشا كۇنى الماتىداعى ساين مەن جۇبانوۆ كوشەلەرىنىڭ قيىلىسىنداعى كوپىر ۇستىندە بولعان. وقيعا كۋاگەرلەرى بولعان جاعدايدى ۆيدەوعا ءتۇسىرىپ العان.

بەينەجازبادا كوپىر ۇستىندە جاقتاۋدىڭ سىرتىندا تۇرعان قىز انىق كورىنەدى. پوليتسيا قىزمەتكەرى وعان قولىن سوزىپ، جاقىنداعاندا قىز كەرى شەگىنىپ قاشادى. قولايلى ءسات تۋعاندا پوليتسەي قىزدى دەرەۋ ۇستاپ الىپ، قاۋىپسىز جەرگە الىپ شىقتى.

ءتۇيىن

سوڭعى كەزدە سۋيتسيد جاساۋشىلار نەگە كوبەيىپ كەتتى؟ ءبىز وسى ەكونوميكالىق قانا ەمەس، رۋحاني داعدارىسقا ۇشىراعان جوقپىز با؟ ءسۋيتسيدتىڭ الدىن الۋ ءۇشىن نە ىستەۋ كەرەك؟ بۇل قوعامعا نارازىلىقتىڭ بەلگىسى ەمەس پە؟ ولار نەگە كوپشىلىك جينالاتىن، قوعامدىق ورىنداردا جان تاپسىرۋعا "قۇمار"? شۇبەرەككە ءتۇيۋلى شىبىن جانىن شىرىلداتىپ، ۇشىرىپ جىبەرگەندەر "نەنى دالەلدەمەك؟", ءسىز بەن بىزگە نە ايتپاق؟..

ءشارىپحان قايسار

Abai.kz