وسىناۋ وتە نازىك تاقىرىپقا كەلگەندە دارىگەرلەر جەكە ادامدارعا تەك وزىنە عانا قۇپيا جاۋاپ بەرۋگە تىرىسادى. ويتكەنى بۇل شىنىندا زاڭ جۇزىندە قورعالاتىن ادامنىڭ جەكە باسىنا عانا قاتىستى ماسەلە. دەسە دە، وسى تاقىرىپتىڭ اياسىندا جانجال ءجيى شىعادى. «قىز ەمەس» ەكەن دەگەن ار-نامىسقا تيەتىن اڭگىمە تالاي وتباسىن شايقالتىپ، تالاي ايەلدىڭ كوز جاسىن كولدەتتى. جاعدايدىڭ ءمانىسىن شىنايى ءبىلۋ ءۇشىن دارىگەرگە بارىپ جاتپايدى، ەسەسىنە وتباسىلىق جانجالدان باس ارىلتا الماۋى عاجاپ ەمەس.

سونىمەن «قىزدىق» دەگەنىمىز نە؟ قىز بالاسىنىڭ ەڭ العاش جىنىستىق قاتىناسقا بارۋىنا دەيىن ساقتالاتىن وتە جىڭىشكە، نازىك تامىرلارمەن جالعاسقان ءتىن. قىز بالانىڭ جاسى 18-20 عا كەلگەندە بۇل ءتىن وتە يىلگىش كەلەدى. ال جىلدار وتكەن سايىن 30-35 كە جاقىنداعاندا يىلگىشتىگىن مۇلدە جوعالتادى. قىزدىق پەردە جىنىستىق قاتىناسقا دايىندىقپەن كەلگەندە، اعزانىڭ قاتتى قوزۋى كەزىندە يىلگىشتىگىنەن وزدىگىنەن اشىلادى، ياعني قانامايدى. سۇيگەن جىگىتىمەن العاشقى توسەك قاتىناسىنا بارىپ، ءوز قىزدىعىنىڭ قايدا كەتكەنىنە جاۋاپ تاپپاعان قىزدار كوپ. بۇندايدان كەيىن يىلگىش قىزدىق پەردە اعزا قالىپتى كۇيگە تۇسكەن كەزدە ول دا قالپىنا كەلەدى. ال تۇراقتى تۇردە قاتىناس بولعان جاعدايدا يىلگىش پەردە قىناپ تىنىنە جابىسىپ قالىپ قويادى. بۇل دەگەنىمىز قىزدىق پەردە جارىلعان جوق. كەي ايەل ادامنىڭ قىزدىق پەردەسى يىلگىش بولمايدى دەسەدى سەكسوپاتولوگ دارىگەرلەر، مۇندايدا جاسىرىن زورلىق جاساۋدىڭ قاجەتى جوق، ويتكەنى پەردەنى كۇشپەن جارۋ سالدارىنان قىناپ جاراقاتتانىپ، سوڭى قايعىلى بولۋى دا مۇمكىن.

ەرتە كەزدەرى قىز بالاسى 16-عا تولماي جاتىپ اق كۇيەۋگە تيگەن جانە كوپشىلىگىنىڭ ىقتيارسىز بولعانىنا، اعزاسى قوزىپ توسەكتەس بولماعانىنا زامان كۋا. بۇنداي جاعدايدا قىزدىق پەردە زورلىقپەن جارىلادى جانە اجەپتەۋىر قان اعادى. سونداي-اق قىزدىق پەردە سىرتقى فيزيكالىق سوققى العاندا دا، فيزيكالىق جاتتىعۋلاردى ابايسىز جاساعاندا دا جارىلۋى مۇمكىن.

بۇگىندە توسەك قاتىناسىنا قاتىستى ساۋاتى از ادامدار «ايەلدەردىڭ ءبارى بۇزىلىپ كەتكەن» دەپ شالا ءبۇلىنۋى دە وسى تۇسىنبەۋشىلىكتىڭ سالدارى شىعار. قۇقىق قورعاۋشىلاردىڭ ايتۋىنشا جاس وتباسىلار اراسىندا وسى تاقىرىپتا بولاتىن داۋ-جانجال جىل سايىن كوبەيىپ كەلەدى.

ايەلدىڭ بۇزىلۋى دەپ تالعامسىز، كەزدەسكەن ەر اداممەن توسەكتەس بولا بەرەتىنىن مەڭزەيدى. الايدا بۇل جولدى تاڭداعانداردى «جەزوكشەلەر» دەپ تانيمىز جانە كوپتەگەن الەۋمەتتىك زەرتتەۋلەر جەزوكشەلىك جولعا قىزداردىڭ كوپشىلىگى ءوز ەرىكتەرىمەن بارماعانىن كورسەتۋدە. جەزوكشەلەردى بەلگىلى ءبىر قىلمىستىق توپتار باسقارادى. ءبىر توبى قىزداردى الداپ تورعا تۇسىرسە، ەكىنشىسى تۇتىنۋشى جەتكىزىپ بەرەدى، تاعى ءبىرى ء«تىرى تاۋاردىڭ» ءبۇلىنىپ قالماۋىن قاداعالايدى. ال، ول شەڭبەردەن شىعىپ كەتۋگە قىزداردىڭ باتىلى جەتۋى نەعايبىل. باقىلاۋشى قىلمىستىق توپ ونى ءولىمشى ەتىپ جازالاۋى ابدەن مۇمكىن. وسى تاقىرىپتا جۋرناليستتىك زەرتتەۋلەر، دەرەكتى فيلمدەر مەن ماتەريالدار جەتكىلىكتى. جەزوكشەلىك - پسيحولوگيالىق اۋىرلىعىمەن قاتار، فيزيكالىق توزە الماۋشىلىقپەن دە جالعاساتىن وتە قيىن جول. بۇل كاسىپتەن كەتۋ ءۇشىن ادامعا وتە ۇلكەن كۇش پەن بولاشاققا سەنىم كەرەك. وكىنىشتىسى سول، كوپشىلىگى قوعام ومىرىنە يكەمدەلە الماي، قىرشىننان قيىلىپ جاتادى.

ءبۇتىن وتباسى - مەملەكەتتىڭ ءبىر بايلىعى. «قىزدىق» ماسەلەسىنە اركىمنىڭ ساۋاتتى قاراۋى وتباسىنىڭ بەيبىت كەلىسىمدە ءومىر سۇرۋىنە ىقپال ەتەدى. لايىم جاس شاڭىراقتار قۇلاماسىن دەپ تىلەيمىن.

گۇلجان ءىزتاي،

جۋرناليست، جازۋشى.

Abai.kz