كىشكەنتاي كۇنىمىزدە اجەلەرىمىزدىڭ بەيباستاقتىق جاساپ، ەلىرىپ، ەسەرسوقتانىپ، سوزگە توقتاماي كەتەتىن بالالارعا قاراپ، «توپالاڭ تيگىر وڭكەي» دەپ ۇرسىپ وتىراتىنىن ءجيى ەستيتىنبىز.

كورگەنسىزدەر قاي زاماندا دا بار. اسىرەسە، بۇگىنگى زاماننىڭ كوگەرمەگىرلەرى ءدال ۇلتىمىزدىڭ رۋحاني كوسەمى احمەت بايتۇرسىنۇلى اتىنداعى قوستاناي مەملەكەتتىك ۋنيۆەرسيتەتىنەن شىعادى دەپ كىم ويلاعان؟

عالامتورداعى youtube.com ۆيدەوحوستينگ سەرۆيسىندە «ستۋدەنتتەر قمۋ» (https://www.youtube.com/watch?t=3&v=iyVtZYRp_2U) اتاۋىمەن ۆيدەو جازبانى كورگەننەن كەيىن جاعامىزدى ۇستادىق. بەينە جازبادا ءبىر توپ جاستاردىڭ ساحنا ۇستىندە اناۋ-مىناۋ ەمەس… ءىش كيىممەن بيلەپ جۇرگەن ءساتى جازىلىپ قالعان. قايدا دەيسىزدەر عوي؟ احاڭ اتىنداعى ءبىلىم ورداسىنىڭ ساحناسىندا!

ۇيات بولسا دا ايتايىق، بۇتتارىندا ءىش كيىمنەن باسقا لىپا جوق ءبىر توپ تىريعان ەر بالا بوكسەلەرىن قيقاڭداتىپ اسىر سالىپ ءجۇر. مىنا كورگەنسىزدەردىڭ دەنى ءوزىمىزدىڭ قاراكوزدەرىمىز. ەڭ سوراقىسى، ءبارى قاۋمالاپ، ورتالارىنا ءبىر قىز بالانى (ول دا قاراكوز) الىپ، سونى اينالسوقتاپ، ەربەڭ-ەربەڭ، بۇراڭ-بۇراڭ ەتىپ جۇرگەنىن سوزبەن قالاي جەتكىزسەم ەكەن؟ «سيىر كوزىن سۇزبەسە…» دەسەك قالاي؟ ال تەپسە تەمىر ۇزەتىن جاستاعى ەركەك اتاۋلىنىڭ «جىبەكتەي ەسىلىپ» جۇرگەنىن كورگەندە، ء«بىرتۇرلى» ويلايدى ەكەنسىڭ. راس، جەرگە كىرە جازدادىم. مىناۋ ارسىز كورىنىس ستۋدەنت قاتارىنا قابىلداۋ كونتسەرتى ءوتىپ جاتقاندا قويىلىپتى. ءوزى 11 سەكۋندتىق تاسپادا نەبىر تايراڭنىڭ ءبارى بار. «مەن احاڭ اتىنداعى كيەلى ءبىلىم ورداسىندا ءجۇرمىن-اۋ» دەگەن وي جوق بىرەۋىندە. تىرتىڭ-تىرتىڭ، ىرجىڭ-ىرجىڭ جۇرگەندەرىنە ءماز ءبارى.

مىنە، وسى جۇگەنسىزدىكتىڭ جاي-جاپسارى جايىندا اتالعان وقۋ ورنىنىڭ ءبىرىنشى پرورەكتورى ورىنباي تاعاەۆقا بارعانىمدا، ول كىسى استاناعا شارۋامەن كەتىپ قالىپتى. (ايتا كەتەيىك، ا.بايتۇرسىنۇلى اتىنداعى قوستاناي مەملەكەتتىك ۋنيۆەرسيتەتى رەكتورى باسقا قىزمەتكە كەتكەندىكتەن، قازىر ورنى بوس تۇر). اپارعان حاتىمدى تاعى ءبىر پرورەكتور ا.ابسادىققا قالدىرعانىمدا، ول كىسى وقيعانىڭ بولعانىن قىسقاشا بايانداپ بەردى: «ۋنيۆەرسيتەتىمىزدە ستۋدەنت قاتارىنا قابىلداۋ شاراسى ءوتىپ جاتتى. جيۋري قۇرامى قورىتىندى جاساۋ ءۇشىن سىرتقا كەتكەن كەتكەن كەز. سول مەزەتتە كورەرمەندەرگە ءۇزىلىس بولىپ قالماس ءۇشىن جوعارى كۋرس ستۋدەنتتەرى مىنا ادەپسىز قويىلىمدى كورسەتىپ شىققان. بىراق كوپ ۋاقىت وتپەي، ۇيىمداستىرۋشىلار ولاردى توقتاتىپ ۇلگەردى».

بۇل پرورەكتوردىڭ اۋىزشا ايتقان اڭگىمەسى. ارتىنشا مەنىڭ حاتىما جاۋاپ كەلدى. رەكتوردىڭ مىندەتىن اتقارىپ وتىرعان الماس ابسادىقتىڭ اتىنان. بۇل جەردە وقيعا باسقاشا ءوربىپ سالا بەرگەن. وندا «فاكۋلتەت ىشىندە جىل سايىن وتەتىن «ستۋدەنتتەر قاتارىنا قابىلداۋ» ءىس-شاراسىنىڭ دايىندىعى كەزىندە ينجەنەرلىك-تەحنيكالىق فاكۋلتەتىنىڭ 1-كۋرس ستۋدەنتتەرى ادەپسىز بيلەگەنى انىقتالدى… ساحناداعى بۇل جاعداي، فاكۋلتەت ىشىلىك دايىندىق كەزەڭىندە بولعاندىقتان، ونىڭ وتۋىنە جاۋاپتى تاربيە جۇمىسى جونىندەگى دەكان ورىنباسارى جۇمىستان بوساتىلدى…» دەلىنگەن.

«وتىرىكتىڭ قۇيرىعى ءبىر-اق تۇتام» دەگەننەن اۋلاقپىز، ارينە. راسىمەن دە ابسادىق مىرزاعا قاراماعىنداعىلارى وقيعانى بىرەسە ولاي، بىرەسە بىلاي جەتكىزۋى مۇمكىن. ايتپەسە، ۋنيۆەرسيتەتتەگى ستۋدەنت قاتارىنا قابىلداۋ شاراسىنا قاتىسقان شاكىرتتەر الەۋمەتتىك جەلىدە («ۆكونتاكتە») ونداعى سۋرەتتى جاريالاعانىن كوزىمىز كوردى. سۋرەت استىنا شارانىڭ جوعارى دەڭگەيدە وتكەنى تۋرالى پىكىرلەر دە جوق ەمەس.

راسىمەن دە ۋنيۆەرسيتەتتە بولاتىن شارالار وسىنداي «دەڭگەيدە» وتە مە، الدە ستۋدەنتتەردىڭ «دەڭگەيى» سوعان ساي بولىپ كەتكەن بە، تۇسىنە المادىق. ال شاكىرت قاۋىمى 1-كۋرسقا كەلمەي جاتىپ ادەتتەرىن ادەپسىز بيدەن باستاپ جاتىر ەكەن. ەرتەڭگى كۇن الگى بەيباق ۇلدار ديپلوم الاردا ءبىر-بىرىمەن ء«بىرتۇرلى» قول ۇستاسىپ، ءتىپتى، تىرداي جالاڭاش كەلىپ تۇرسا دا، تاڭ قالمايتىن شىعارمىز.

قىدىربەك قيىسحانۇلى، قوستاناي

"قازاقستان ZAMAN" گازەتى

ءتۇپ-نۇسقاداعى تاقىرىپ: "اتىڭ شىقپاسا - جالاڭاش بيلە"