قازاقستان قاشاعان جانە تەڭىز مۇناي كەن ورىندارىنا قاتىستى اقش-تىڭ ExxonMobil كورپوراتسياسىمەن كەلىسسوزدەر جۇرگىزىپ جاتىر، دەپ حابارلايدى Ulysmedia.

Bloomberg باسىلىمىنىڭ جازۋىنشا، قازاقستان بيلىگى Exxon Mobil توپ-مەنەدجەرلەرىمەن قاشاعاندى كەڭەيتۋگە بايلانىستى كەلىسسوزدەر جۇرگىزىپ جاتىر. تاراپتار ازىرگە قانداي دا ءبىر كەلىسىمگە كەلمەگەن. بىراق قازاقستان بيلىگى مۇناي ءوندىرىسىن ۇلعايتۋدى قولداپ وتىر.

بۇعان قوسا، تاراپتار Exxon Mobil كومپانياسىنىڭ تەڭىز كەن ورنىن يگەرۋگە قاتىستى ليتسەنزيا مەرزىمىن سوزۋ ماسەلەسىن دە تالقىلاپ جاتىر.

2000 جىلى اشىلعان قاشاعان ەڭ ءىرى مۇناي كەن ورىندارىنىڭ ءبىرى. جوبانىڭ سول كەزدەگى وپەراتورى – يتاليالىق Eni كومپانياسى ۋاقىت وتە كەلە مۇندا تاۋلىگىنە 1,5 ملن باررەل مۇناي وندىرۋگە بولادى دەپ بولجاعان. الايدا قازىر ءوندىرىس كولەمى شامامەن 450 مىڭ باررەل عانا.

«قازمۇنايگاز» مالىمەتىنشە، قاشاعان وپەراتورى ءوندىرىستى 2026 جىلعا قاراي 500 مىڭعا، ال 2031 جىلعا تامان 700 مىڭ باررەلگە جەتكىزۋدى كوزدەيدى. سول كەزدە قوسىمشا گاز وڭدەۋ زاۋىتى ىسكە قوسىلۋى ءتيىس.

جوبانى Exxon Mobil عانا ەمەس، Eni SpA, Shell Plc, TotalEnergies جانە «قازمۇنايگاز» بىرگە يگەرىپ جاتىر. باس كەڭسەسى تەحاستا ورنالاسقان كورپوراتسيانىڭ تەڭىز كەن ورنىندا دا مينوريتارلىق ۇلەسى بار. تەڭىزدىڭ باس وپەراتورى – Chevron.

Bloomberg دەرەككوزدەرىنىڭ ايتۋىنشا، قاشاعاندى ودان ءارى دامىتۋ جوسپارى قازاقستانداعى باسقا دا مۇناي جوبالارىمەن تىعىز بايلانىستى. ماسەلەن، امەريكالىق كومپانيانىڭ تەڭىزدى يگەرۋ ليتسەنزياسىنىڭ مەرزىمى 2033 جىلى اياقتالادى. وسى جوباداعى ۇلەسىن ۇلعايتقىسى كەلەتىن قازاقستان ونى ليتسەنزيا مەرزىمىن سوزۋمەن الماستىرعىسى كەلەدى.

PSA مالىمەتىنشە، قاشاعاندا 4,5 ملرد توننا مۇناي قورى بار. جوبا وپەراتورى NCOC دەرەگىنشە، قازىرگى ءوندىرىس كۇشىمەن 1-2 ملرد تونناعا دەيىن مۇناي وندىرۋگە بولادى.

Abai.kz