تۇرعىن ءۇي قۇرىلىس جيناق بانكى جانىنداعى قوعامدىق كەڭەس استانا قالاسىنىڭ اكىمى ادىلبەك جاقسىبەكوۆ پەن دەپۋتات تۇرسىنبەك ومىرزاقوۆتى كوشپەلى وتىرىسقا شاقىردى

بۇل تۋرالى تۇرعىن ءۇي قۇرىلىس جيناق بانكى جانىنداعى قوعامدىق كەڭەستىڭ توراعاسى سەيىتقازى ماتاەۆ مالىمدەدى. شارا بيىلعى جىلدىڭ 15 قاڭتارىندا وتكىزىلەدى دەپ بەلگىلەندى. قوعامدىق كەڭەس مۇشەلەرىنىڭ وتىرىسىندا ساۋران جانە №24 كوشەلەرىندەگى ساقالدى قۇرىلىس تۋرالى ماسەلە قايتا قوزعالماق. بۇل ءۇي وڭىرلەردى دامىتۋ باعدارلاماسى اياسىندا سالىنىپ جاتىر. سەيىتقازى ماتاەۆتىڭ ايتۋىنشا، نىسان 2013 جىلدىڭ جەلتوقسان ايىندا پايدالانۋعا بەرىلۋى ءتيىس بولعان. الايدا، ءالى كۇنگە دەيىن جۇزدەگەن استانالىق تۇرعىن پاتەرلەرىنە قول جەتكىزە الماي ءجۇر.

- تۇرعىن ءۇي قۇرىلىس جيناق بانكىنىڭ سالىمشىلارى – ۇزىن-ىرعاسى 242 ادام جاڭا ۇيگە كىرە الماي وتىر. انە-مىنە دەگەنشە، قىلىشىن سۇيرەتىپ قىس كەلەدى. استانانىڭ ايازى ەرتە ۇليتىنى بارىمىزگە ايان. بۇل ادامدار كۇن سۋىتپاي پاتەرلەرىنە كىرۋدى قالايدى. بيىل استانادا ماۋسىم ايىندا كوشپەلى وتىرىس وتكىزگەن بولاتىنبىز. ول كەزدە ءبىز كوپ ۋادە ەستىگەن ەدىك. استانانىڭ قۇرىلىس باسقارماسى باستىعىنىڭ ورىنباسارى ەرجاس ايتۋعانوۆ كىناسىن دە مويىنداعان بولاتىن. ويتكەنى، قۇرىسقا تاپسىرما بەرۋشى – اكىمدىك. ول بانك سالىمشىلارىنىڭ الدىندا ءسوز الىپ، شىلدە ايىنىڭ اياعىنا دەيىن مەملەكەتتىك اكتىگە قول قويىلادى دەپ ءسوز بەرگەن ەدى. سوزىندە تۇرماسا، استانالىق شەنەۋنىك قىزمەتىنەن كەتەتىنىن دە ايتىپ، انت-سۋ ىشكەن. دەسە دە، قازىرگە دەيىن بۇل ماسەلە ءوز شەشىمىن تاپقان جوق. ادامداردىڭ ەڭسەسى تۇسكەن. قالا بيلىگىنەن ميتينگ وتكىزۋگە رۇقسات  سۇراپ وتىر. بىزگە دە  ارىزدانۋدا، – دەيدى قتقجب جانىنداعى قوعامدىق كەڭەس توراعاسى سەيىتقازى ماتاەۆ.

         بىلتىر ەلىمىزدە قتقجب جەلىسى بويىنشا جەتى تۇيتكىلدى نىسان بولدى. ماتاەۆتىڭ سوزىنە قاراعاندا، قوعامدىق كەڭەس مۇشەلەرى بارلىق ساقالدى قۇرىلىستاردى ارالاپ، كوزىمەن كورىپ شىعىپ، شەنەۋنىكتەرمەن جانە قۇرىلىس سالۋشىلارمەن بىرلەسە وتىرىپ، ماسەلەنى شەشۋگە ۇمتىلعان. سونىڭ ناتيجەسىندە مەملەكەتتىك باعدارلاما اياسىندا سالىنعان جەتى ساقالدى قۇرىلىستىڭ التاۋى پايدالانۋعا بەرىلدى. قالعانى – وسى استاناداعى تۇرعىن ءۇي كەشەنى.

     - ءبىز كەزەكتى وتىرىس وتكىزۋگە بايلام جاسادىق. وسى شاراعا قاتىسۋدى سۇراپ، استانا قالاسىنىڭ اكىمى ادىلبەك جاقسىبەكوۆكە حات جولدادىق. سونىمەن قاتار قوعامدىق كەڭەس مۇشەلەرى وتىرىسقا دەپۋتات تۇرسىنبەك ومىرزاقوۆتى دا شاقىرىپ وتىر. وعان دا حات جولداندى. بۇرىندارى ول تەك قانا پارلامەنت مىنبەرىنەن، گازەت بەتتەرىندە عانا  تۇرعىن ءۇي قۇرىلىس جيناق جۇيەسىنىڭ جۇمىسىنا الاڭداۋشىلىق ءبىلدىرىپ كەلگەن ەدى. ەندى ءبىز وعان بانك سالىمشىلارىنا ءىس جۇزىندە قامقورلىق بىلدىرۋگە ۇسىنىس جاسادىق، – دەپ قورىتىندىلادى س. ماتاەۆ.

اباي-اقپارات