بالا كەزىمىزدە اۋىلىمىزدىڭ سىيلى قارتتارىنىڭ الدىنان شىعىپ سالەم بەرسەك، قۇمانمەن سۋ قۇيىپ، قولدارىنا سۇلگى ۇستاتساق، جارىقتىقتار: «مۇعالىم بول، اينالايىن»، - دەپ ريزاشىلىقتارىن ءبىلدىرۋشى ەدى.  «مۇعالىم بول!»  بالا كەزىمىزدە ۇلكەندەر تاراپىنان ەستىپ وسكەن تىلەك، باتامىزدىڭ باستىسى وسى ەدى.

مۇعالىم دەگەن قارتتار ءۇشىن: سوت تا، پروكۋرور دا، اگرونوم دا، ديرەكتور دە، ينجەنەر دە  – قىسقاسى ءبارى دە  ەدى. ءبارىنىڭ باستاۋى مۇعالىم ەدى. راسىندا سولاي عوي.  سان سالالى كاسىپ ءتۇرىن مەڭگەرىپ، مامان اتانعان  جانداردىڭ قاي-قايسىسى بولماسىن مۇعالىمنىڭ الدىن كوردى. وقىدى، ءتالىم الدى. مۇعالىمدى قادىرلەگەن ەلدە ءبىلىم قادىرلى. وزىق ەل وقىتۋشىسىن قۇرمەتتەيدى. ء بىلىمسىز، ءبىلىمدى قۇرمەتتەمەيتىن، بىلگىسى كەلمەيتىن، نادان، پاسىق قوعامدا عانا وقۋدىڭ، ىزدەنۋدىڭ، عىلىمنىڭ ورنى تومەن. ءبىزدىڭ، ءبىزدىڭ اعالارىمىزدىڭ زامانىنداعى مۇعالىمدەر قانداي ەدى، شىركىن! ولاردىڭ ءجۇرىس-تۇرىسى، سويلەگەن ءسوزى، كيىم كيىسى، ادامعا قارىم-قاتىناسى تۇگەلىمەن مادەنيەتتىڭ وزىق ۇلگىسىندەي كورىنەتىن.  مەكتەپكە  جاس  مۇعالىم كەلسە، جاعالارى جايلاۋعا كەتىپ، ىرجالاقتاپ جۇرەتىن اۋىل جىگىتتەرى كەنەتتەن ەس جيىپ، اياقتارىن ساندەپ باسا قالاتىن. ءجا، بۇل اڭگىمەنىڭ جالعاسىن پروزاشىلار ايتسىن. ءبىز تاقىرىبىمىزعا ورالايىق.

ەل-ءىشى، جالپى قوعام وقۋ-بىلىمگە قۇلاش ۇرىپ، قۇشتارلىق تانىتقان جىلدارى قالانى قويا تۇرىڭىز، قاراپايىم اۋىلداردىڭ وزىنەن قانشاما تالانتتى جاس تۇلەپ ۇشتى. جوعارى وقۋ ورىندارىن ءبىتىرىپ لايىقتى مامان يەسى اتاندى؟.. ارينە، قازىر دە ءبىلىمنىڭ ورنى الا بوتەن. اسا مارتەبەلى ءبىلىمنىڭ بەتىنە ەشكىم تۋرا كەلە المايدى. بىراق، ءبىلىمنىڭ بەدەلىن تۇسىرۋگە ۇمتىلعان توعىشارلىق، ساسىق بايلىق، مەنمەندىك بەلەڭ الىپ بارا جاتىر. سوندىقتان دا بۇگىنگى زاماننىڭ مۇعالىمى اسا اۋىر سىناقتاردى باستان كەشۋدە. ءبىلىم سالاسىنداعى ۇشى-قيىرى جوق، تاۋسىلىپ بىتپەيتىن ەكسپەريمەنتتەر مەكتەپ ۇجىمدارىن تيتىقتاتىپ ءبىتتى. مۇعالىم دەگەنىمىز وسى كۇنى ەسەپشىنىڭ، ءستاتيستتىڭ، قۇقىق قورعاۋ قىزمەتكەرىنىڭ، سايلاۋلاردا شاپقىلايتىن بارىپ كەل، شاۋىپ كەلدىڭ، ت.ب. جۇمىسىنا جەگىلگەن مايلىق-سۋلىقتىڭ ماڭىنا جولامايتىن مالايعا اينالدى. بىراق، سويتە ءجۇرىپ بالا وقىتۋدا، ۇرپاققا ءتالىم تاربيە بەرۋدە. سوندىقتان وسى ءبىر جانكەشتى قاۋىمنان كەشىرىم سۇراۋعا تۋرا كەلىپ تۇر. بەلگىلى ساياساتكەر، قوعام قايراتكەرى ءامىرجان قوسانوۆ الەۋمەتتىك جەلىدەگى (FB) پاراقشاسىندا بىلاي دەپ جازىپتى:

شەكسپيرشەلەپ ايتسام، ءومىر - ۇستاز، ءبارىمىز ولە-ولگەنشە ونىڭ شاكىرتىمىز.

كاسىبي مەرەكەلەرىڭىزبەن، ۇستازدار قاۋىمى!

جىلىنا ءبىر رەت قانا جىلى ءسوز ايتىپ، گۇل سىيلاعانىمىز ءۇشىن كەشىرىڭىزدەر جامان شاكىرتتەرىڭىزدى!

ماردىمسىز جالاقى بەرىپ، رەتسىز قوعامدىق-ساياسي ءومىر دەگەن پالەگە جەگىپ قوياتىن بىلىكسىز دە تاربيەسىز بيلىك ءۇشىن دە كەشىرىڭىزدەر بىزدەردى!

Abai.kz