ء ومىردىڭ ءبىر قاسقاعىم مەزگىلىن ساتىمەن تۇسىرگەن فوتو ەرتەڭگى كۇننىڭ اينىماس شەجىرەسىنە اينالۋى ابدەن مۇمكىن. مۇنداي قۇندى فوتولار كەي كەزدەرى كولەمدى زەرتتەۋ ەڭبەكتىڭ دە جۇگىن ارقالاپ تۇراتىنىن كوبىمىز بايقاي بەرمەيمىز. وتكەن عاسىرلاردان بىزگە جەتكەن ءبىرلى-جارىم تاريحي فوتولار ۇلتقا قاتىستى قانشاما اقپارات پەن دەرەكتى ارقالاي كەلەتىنىن مويىنداۋىمىز ابزال. ول ەڭبەكتەردىڭ قۇنى ۋاقىت العا جىلجىعان سايىن ارتا تۇسپەك.

قازاقستان رەسپۋبليكاسىنىڭ ۇلتتىق مۋزەيى فوتوسۋرەتتەردىڭ وسىنداي قۇندى دا باعالى قىرلارىن اشا ءتۇسۋ ماقساتىندا «تاريحى فوتوسۋرەتتەر» دەگەن اتاۋمەن رەسپۋبليكالىق فوتو بايقاۋ جاريالاپ وتىر. بايقاۋ قازاق حاندىعىنىڭ 550 جىلدىعى، جەڭىستىڭ 70 جىلدىعى، قر كونستيتۋتسياسى مەن قازاقستان حالقى اسسامبلەياسىنىڭ 20 جىلدىعى تاقىرىبىنا ارنالادى. فوتو كونكۋرسقا كەز-كەلگەن جاس مولشەرىندەگى كاسىبي دە، اۋەسقوي دا فوتوگرافتار قاتىسا الادى.

فوتولار ءتۇرلى ءتۇستى نەمەسە اق، قارا رەڭدى بولسا دا جاراي بەرەدى. فوتو بايقاۋ 2015 جىلدىڭ اقپان ايىندا جاريالانعان بولاتىن. الداعى قازان ايىنىڭ سوڭىنا دەيىن فوتولاردى قابىلداۋ جالعاسا بەرمەك. وسى ۋاقىتقا دەيىن كوپتەگەن فوتو اۋەسقويلار مەن فوتوگرافتار قابارلاسىپ، كونكۋرسقا قاتىساتىندىعىن ەسكەرتۋدە.

ءبىراز سۋرەتتەر مەن فوتولار قازىردىڭ وزىندە كەلىپ تۇسۋدە. فوتو بايقاۋدىڭ قارجىلاي جۇلدەلى ورىندارى بار. ءبىرىنشى ورىندى يەلەنگەن فوتوگرافقا قارجىلاي جۇلدەنىڭ سىرتىندا ۇلتتىق مۋزەي جەكە كورمە ۇيىمداستىرۋعا مۇمكىندىك بەرمەك. قازىر تەحنيكا مەن تەحنولوگيانىڭ جەتىلگەن داۋىرىندە كەز-كەلگەن ادام ءومىردىڭ ءبىر قاسقاعىم ءساتىن شەجىرەگە اينالدىرۋعا مۇمكىندىگى بار. قىمباتتى وقىرمان بايقاۋعا قاتىسىپ سىزدە باعىڭىز بەن فوتو شەبەرلىگىڭىزدى بايقاپ كورىڭىز.

اباي-اقپارات