سيريادا الەپپودان 15 شاقىرىم قاشىقتىقتا ورنالاسقان اين-جارا قالاسىنداعى مەكتەپتە بولعان اۋە سوققىدان 12 بالا قازا تاپتى.

بۇل جونىندە ادام قۇقىقتارىن قورعايتىن سيريالىق مونيتورينگ جاساۋ ورتالىعىنا سىلتەمە جاساپ Reuters اگەنتتىگى حابارلادى. قۇقىق قورعاۋشىلار مەكتەپكە شابۋىل جاساعان رەسەي جويقىن ۇشاعى بولۋى مۇمكىن دەيدى.

دۇيسەنبى كۇنى رەسەيدىڭ باسشتابىندا 2016 جىلدىڭ العاشقى 11 كۇنىندە رەسەيلىك جويقىن ۇشاقتار سيريا ايماعىنداعى مىڭداعان نىسانعا (ونىڭ ىشىندە الەپپو پروۆينتسياسى دا بار) بومبا لاقتىرعانى حابارلاندى.

باسشتابتىڭ شۇعىل باسقارماسىندا اۋە سوققى تەك عانا «يسلام مەملەكەتى» كوتەرىلىسشىلەرىنە قارسى جاسالعانى، تەرروريستەر تەحنيكاسى مەن اسكەر سانىنان ايىرىلىپ جاتقانى ايتىلدى.

جەلتوقسان ايىندا Amnesty International حالىقارالىق قۇقىق قورعاۋ ۇيىمى بايانداماسىندا سيريادا 2015 جىلدىڭ كۇزىندە رەسەيلىك اۋە سوققىدان 200-گە جۋىق بەيبىت تۇرعىننىڭ قايتىس بولعانىن جاريالاعان ەدى. مۇنان بولەك تۇرعىن ۇيلەر، مەشىت، بازار، جانە اۋرۋحانالار جويىلعان. قۇقىق قورعاۋشىلار بۇل سوققىلار حالىقارالىق گۋمانيتارلىق قۇقىقتارعا قايشى كەلەتىنىن مالىمدەدى. رەسەيگە قارسى وسىنداي ايىپپەن Human Rights Watch ۇيىمى دا مالىمدەدى.

ال رەسەيدىڭ قورعانىس مينيسترلىگى قۇقىق قورعاۋشىلاردىڭ اقپاراتىن «جالعان» دەپ وتىر.

اباي-اقپارات