جاڭا جىل قارساڭىندا قازاقستان رەسپۋبليكاسى ىشكى ىستەر ءمينيسترى گەنەرال-پولكوۆنيك قۇلمۇحانبەت قاسىموۆتىڭ بۇيرىعىمەن قازاقستان رەسپۋبليكاسى ۇلتتىق ۇلانىنىڭ ماقتانىشى، ءارى باتىرى سەرجانت جاندوس بايانباەۆقا العاشقى «لەيتەنانت» وفيتسەرلىك اسكەري اتاعى بەرىلدى.  لەيتەناننتىق پوگونداردى وعان ۇلتتىق ۇلان «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور الىبەك سەراليەۆ جەكە ءوزى تابىس ەتتى دەپ حابارلايدى «وڭتۇستىك» وڭىرلىك قولباسشىلىعىنىڭ ءباسپاسوز قىزمەتى.

ايتا كەتەيىك، 2014-جىلعى 5-جەلتوقساندا «الماتى-سەمەي» باعىتىندا سوتتالعانداردى تەمىر جول قاراۋىلىمەن تاسىمالداۋ بارىسىندا قاراۋىلشىلار جاندوس بايانباەۆ پەن ساقشى ەفرەيتور نۇراسىل مۇباراكوۆ اسا اۋىر قىلمىستار جاساپ سوتتالعان ازاماتتىڭ قارۋلى شابۋىلىن تويتاردى. قاراۋىل باستىعىنىڭ كومەكشىسى سەرجانت جاندوس بايانباەۆ پەن ساقشى ەفرەيتور نۇراسىل مۇباراكوۆ وتتى قارۋدان جاراقات العاندارىنا، ومىرلەرىنە تونگەن ناقتى قاۋىپكە قاراماستان جاۋىنگەرلىك قىزمەتىن جانقيارلىقپەن ورىنداپ، ارام پيعىلدى قىلمىسكەردىڭ قاشىپ كەتۋىنە جول بەرمەدى.

كورسەتكەن ەرەن ەرلىكتەرى ءۇشىن قازاقستان رەسپۋبليكاسىنىڭ پرەزيدەنتى – قارۋلى كۇشتەردىڭ جوعارعى باس قولباسشىسى نۇرسۇلتان نازارباەۆ ءوز جارلىعىمەن 7552 اسكەري ءبولىمى قاراۋىل باستىعىنىڭ كومەكشىسى سەرجانت جاندوس بايانباەۆتى 3-دارەجەلى «ايبىن» وردەنىمەن، ال ساقشى ەفرەيتور نۇراسىل مۇباراكوۆتى «جاۋىنگەرلىك ەرلىگى ءۇشىن» مەدالىمەن ناگرادتاعان بولاتىن.

اباي-اقپارات