رەسەيلىك شەنەۋنىكپەن مۋللو مانسۋردىڭ كەزدەسۋى مۇمكىن ەكەندىگى ايتىلعانىمەن، دەرەككوزگە رەسەيلىك تاراپتان قاتىسقان ادامنىڭ كىم ەكەندىگى بەلگىسىز.

بريتاندىق «The Sunday Times» باسىلىمى جەلتوقساننىڭ 27-دە تالىپتەردىڭ كومانديرلەرىنىڭ بىرىنە سۇيەنە وتىرىپ، رەسەي پرەزيدەنتى ۆلاديمير ءپۋتيننىڭ «تاليبان» قوزعالىسىنىڭ قازىرگى باسشىسى مۋللو احتار مانسۋرمەن كەزدەسكەنىن جازعان ەدى. باسىلىمنىڭ اقپارات كوزىنىڭ دەرەگىنشە، پۋتين مەن مانسۋر رەسەيلىكتەردىڭ كوتەرىلىسشىلەرگە قولداۋ كورسەتۋ ماسەلەسىن تالقىلاعان. بۇل كەزدەسۋدىڭ قىركۇيەك ايىندا تاجىكستان اۋماعىنداعى رەسەيلىك اسكەري بازانىڭ اۋماعىندا وتكەنى حابارلاندى.

كرەمل مەن «تاليبان»  رەسمي تۇردە بۇل اقاپارتتى جوققا شىعارادى. پۋتين قىركۇيەكتىڭ 15-16-دا تاجىكستاندا جۇمىس ساپارىمەن بولدى.

رەسەيدىڭ تاجىكستانداعى ەلشىسى يگور لياكين-فرولوۆ جەلتوقساننىڭ 28-دە، تالىپتەر اراسىندا رەسەيمەن كەلىسسوز جۇرگىزۋگە قۇلىقتى توپتىڭ بار ەكەنىن ايتقان بولاتىن. بۇعان دەيىن تالىپتەر رف پرەزيدەنتىنىڭ اۋعانستانداعى ارنايى وكىلى زامير كابۋلوۆتىڭ رەسەيدىڭ تالىپتەرمەن بايلانىسقانى تۋرالى مالىمدەمەسىن جوققا شىعارعان ەدى.