قازاقتار ءوز جەرىنە يەلىگىن ساقتاپ قالۋ ءۇشىن ەڭبەككە جۇمىلۋ كەرەك. اۋىلدارداعى شارۋا قوجالىقتارىنان بىرلەسكەن شارۋالار وداقتارىن قۇرسا جاقسى بولادى. ۇساق شارۋالار وداقتاسپاسا قۋاتتى تەحنيكالارعا، جەڭىلدەتىلگەن قارجىلىق كومەكتەرگە قول جەتكىزە المايدى. ورتالارىنان ىسكەر، ادال ازامات شىعىپ قۋاتتى تەحنيكالار ساتىپ الىپ، متس ۇيىمداستىرسا. ماسەلەن ءبىر جىگىت ون شاقتى شارۋامەن ەڭبەك شارتىنا وتىرىپ، سونىڭ نەگىزىندە بيزنەس جوبا جاسايدى. بانكتەر وعان سول بيزنەس-جوباعا سايكەس جەڭىلدەتىلگەن نەسيە بەرىپ، تەحنيكا الۋعا كومەكتەسەدى. متس ءوز كەزەگىندە جىل سايىن كوكتەمگى ەگىستە، جازعى جەر وڭدەۋدە جانە كۇزگى وراقتا جەر يەلەرىنە ەڭبەك شارتى بويىنشا قىزمەت كورسەتەدى. جەر يەلەرى قىزمەت كورسەتۋشىمەن ەسەپ ايىرىسقاننان سوڭ تۇقىمدىعىن ساقتاۋعا وتكىزگەننەن كەيىنگى تازا پايدانى يەلەنەدى. ءوستىپ جەر يەسى ءوز جەرىن ەنشىسىندە ۇستايدى. وعان وتانىم دەپ قارايدى.
ال سوڭعى جىلداردا اۋىلعا بارعان سايىن باقايتىنىم، ەرىنشەكتىك، نەمكەتتىلىك، بويكۇيەزدىك بەلەڭ الىپ بارادى. مۇنىڭ ءبارى سەنىمنىڭ جوعالۋىنان تۋىنداعان دەرت. جۇرتتىڭ بارىندە ليدەرلىك قابىلەت جوق. ولاردى ۇيىمداستىرا ءبىلۋ كەرەك. ايتپەسە، ايتا بەرگەن ەرتەگىدەن دە ادامنىڭ جالىعاتىن كەزى بولادى.

باياعىدا جەر جەتپەي سوۆحوزدار داۋلاسىپ جاتاتىن. جۇمىسشى جەتپەيتىن. ميللياردتتاپ العان استىقتى جينايتىن كەزدە بەيساۋات ماشينا جۇرمەيتىن. جۇرتتىڭ ءبارى ەگىن وراعىنا جۇمىلدىرىلاتىن. مەكەمە قىزمەتكەرلەرى گالستۋگىن شەشىپ تاستاپ، كومباين شتۋرۆالىنا وتىراتىن. بۇگىن ءبىر كەزدەگى مىڭعىراتىپ تابىن-تابىن مال باققان ەلدەن اتقا مىنەر باقتاشى تاپپاي قالدىق. ءبارى تەلەسەريالداعى بايلار سەكىلدى ءومىر سۇرگىسى كەلەدى، بىراق وعان قالاي جەتۋدى بىلمەيدى. ميلليونداپ، ميللياردتتاپ اقشا ۇرلاپ اشكەرەلەنىپ جاتقانداردى ەستىپ ىشتەرى اشيدى.
بۇگىن قىتاي باسىپ كەتەدى دەگەن ۇرەي پايدا بولدى. قىتايعا كەرەگى تاماق شىعار. سول تاماقتى ءوزىمىز ءوندىرىپ نەگە قىتايلىقتارعا ساتپايمىز؟.. ولاردى ۇيگە كىرگىزبەي-اق تەرەزەدەن كەرەگىن ساتىپ بەرۋ ساياساتىن نەگە ۇستانبايمىز؟
باۋىرلارىم، ەڭبەككە بۇرىلايىق! ۇكىمەتتەن ەڭبەككە جاعداي تۋعىزۋدى سۇرايىق. تالاپ ەتەيىك. ال ساۋساقتى قيمىلداتپاي "قابانباي!", "بوگەنباي!" دەپ ۇرانداي بەرگەننەن ەشتەڭە شىقپايدى. ون سەگىزىنشى عاسىرداعى باتىرلاردىڭ مازاسىن العانشا، ءوزىمىزدى ءوزىمىز قامشىلايىق.
وسىعان كىم نە ايتادى؟ كىمدە قانداي ۇسىنىس بار؟

قۇدايبەرلى مىرزابەك

FB پاراقشاسىنان الىندى