سانكت-پەتەربۋرگتە كوشەگە شىققان "ۆەسنا" جاستار قوزعالىسىنىڭ بەلسەندىلەرى "وفشور داۋىنا" بايلانىستى پرەزيدەنت ۆلاديمير ءپۋتيننىڭ ورنىنان كەتۋىن تالاپ ەتۋدە.

قوزعالىس وكىلدەرى قولدارىنا اق قاعاز ۇستاعان كۇيى ءۇنسىز تۇردى. نارازىلىق شاراسىنا شىققانداردىڭ ءبىر بولىگى ولاردى پاناما سەكىلدى بۇكتەپ الدى. پوليتسيا جينالعاندارعا پيكەتتەر مەن ميتينگتەر تۋرالى زاڭدى بۇزعاندارىن قايتالاپ ەستەرىنە سالعانىمەن، ەشكىمدى ۇستامادى. "ۇلت-ازاتتىق قوزعالىس" وكىلدەرىنىڭ جيىنعا كەدەرگى كەلتىرمەك بولعان ارەكەتتەرى ىسكە اسپادى. ولاردىڭ تاراپىنان جاسالعان ارانداتۋشىلىق كەزىندە "ۆەسنا" قوزعالىسىنىڭ جەتەكشىسى نيكولاي ارتەمەنكونىڭ ۇستىنە بەلگىسىز سۇيىقتىق شاشىلدى. "ۇاق" ارانداتۋشىسى سەرگەي كولياكيندى پوليتسيا ۇستاپ اكەتتى.

پرەزيدەنت ۆلاديمير پۋتين بەيسەنبى كۇنى پەتەربۋرگتە جۋرناليستىك زەرتتەۋلەردىڭ حالىقارالىق كونسورتسيۋمى جاريالاعان قۇجاتتاردا ءوزىنىڭ وفشورلىق ەسەپشوتتارى بار ەكەنى تۋرالى ناقتى دالەلدەردىڭ جوقتىعىن ايتتى. پرەزيدەنت "پاناما قۇجاتتارىنان" جەمقورلىقتىڭ ءىزىن كورمەگەنىن قوسىپ قويدى. پۋتين زەرتتەۋ جاريا بولعان كەزدە "ىرگەنى ىشتەن شايقالتۋعا" تىرىسقانداردىڭ پايدا بولعانىن مالىمدەدى جانە مۇنىڭ ەڭ وڭاي جولى – "بيلىككە سەنىمسىزدىك تۋدىرۋ" ەكەنىن ەسكەرتتى.

رەسەي پرەزيدەنتى مۋزىكانت سەرگەي رولدۋگينمەن دوس بولعانىنا ماقتاناتىنىن دا ايتتى. پۋتين "ونىڭ تاپقان بار اقشاسىنا شەتەلدەن مۋزىكالىق اسپاپتار ساتىپ الىپ، رەسەيگە الىپ كەلگەنىن" جەتكىزدى. رولدۋگيننىڭ "ميللياردتاعان دوللار" اقشا تاباتىنى تۋرالى مالىمەتتى پرەزيدەنت "ساندىراق" دەپ اتادى.

3 ساۋىردە جۋرناليستك زەرتتەۋلەردىڭ حالىقارالىق كونسورتسيۋمى (ICIJ) بىرقاتار ەلدەگى جوعارى بيلىك باسىنداعىلاردىڭ جەمقورلىقتارىن اشكەرەلەگەن قۇجاتتاردى جاريالادى. ونىڭ "رەسەيلىك بولىگىنىڭ" نەگىزگى تاراۋى رەسەي پرەزيدەنتىنىڭ دوسى، پەتەربۋرگتىك ۆيولونچەلدە ورىنداۋشى سەرگەي رولدۋگين مەن "پۋتينمەن بايلانىسى بار" "وفشورلار جەلىسىنە" ارنالعان. قۇجاتتا ۆلاديمير پۋتينگە جاقىن ادامداردىڭ "روسسيا" بانكى مەن پانامالىق وفشورلىق كومپانيالاردىڭ كومەگىمەن 2 ميللياردتان استام اقشانى زاڭسىز يەلەنگەنى تۋرالى كورسەتىلگەن.

Abai.kz