اقش تاۋلى قاراباقتاعى اسكەري قيمىلداردى ايىپتاپ، ونى ودان ءارى ۋشىقتىرماۋعا شاقىردى. بۇل تۋرالى مەملەكەتتىك حاتشى دجون كەرريدىڭ مالىمدەمەسىندە جاريالاندى.

دجون كەرريدىڭ مالىمدەمەسىندە: «قۇراما شتاتتار تاۋلى قاراباق سىزىعىنداعى وق اتۋعا سالىنعان تىيىمنىڭ كەڭ كولەمدە بۇزىلعانىن، سونىڭ ناتيجەسىندە بەيبىت تۇرعىنداردىڭ قازا تاپقانىن ايىپتايدى. ءبىز تاراپتاردى بايسالدىلىققا، جاعدايدى ودان ءارى شيەلەنىستىرمەۋگە جانە وق اتۋدى توقتاتۋ تۋرالى كەلىسىمدى قاتاڭ ساقتاۋعا شاقىرامىز.»، - دەلىنگەن.

كەرري تۇراقسىز احۋالعا بايلانىستى ءازىربايجان مەن ارميان تارابىنا ەقىۇ مينسك توبىنىڭ تەڭ توراعالارىنىڭ (رەسەي، فرانتسيا جانە اقش) جەتەكشىلىگىمەن كەلىسسوزدەردى باستاۋدى ۇسىندى.

بۇۇ باس حاتشىسى پان گي مۋن دا جاۋلاسقان تاراپتاردى قارۋلى قاقتىعىستى توقتاتۋعا جانە جاعدايدى تەزىرەك تىنىشتاندىرۋعا شاقىردى. تۇركيا پرەمەر-ءمينيسترى احمەت داۋىتوعلى ءازىربايجان پرەزيدەنتى يلحام اليەۆكە قوڭىراۋ شالىپ، انكارانىڭ قولداۋىن بىلدىرگەن. يران باكۋ مەن ەرەۆاندى سابىرعا شاقىردى. گرۋزيا ارمەنيا مەن ازىربايجانعا ارااعايىن بولۋعا دايىن ەكەنىن مالىمدەدى. قازاقستان جاعدايعا الاڭداۋشىلىق ءبىلدىردى.

2 ساۋىرگە قاراعان ءتۇنى قاراباق-ءازىربايجان شەبىندە كەسكىلەسكەن قاقتىعىس تۋدى. ەكى جاقتان دا اسكەري جانە بەيبىت تۇرعىندار اراسىندا قازا بولعاندار بار. تاراپتار ءبىتىم تۋرالى كەلىسىمدى بۇزعانى ءۇشىن ءبىر-ءبىرىن ايىپتايدى..

تاۋلى قاراباق پەن ءازىربايجان اراسىنداعى جاعداي شيەلەنىسكەن قالپىندا تۇر. باكۋ قارۋلى قاقتىعىس كەزىندە 12 ءازىربايجان اسكەري قىزمەتشىسىنىڭ قازا تاپقانىن حابارلادى. ەرەۆان ارميان قارۋلى كۇشتەرىنىڭ 18 ساربازىنان ايىرىلعانىن مالىمدەدى.

Abai.kz