وتاندىق كاسىپكەرلەردى تەحنيكالىق رەتتەۋ، مەترولوگيا جانە اككرەديتاتسيا سالاسىنداعى پروبلەمالار الاڭداتىپ وتىر. تاۋارلاردى سەرتيفيكاتتاۋدىڭ ءتيىستى جۇيەسىنىڭ بولماۋى  ۇلتتىق قاۋىپسىزدىككە نۇقسان كەلتىرۋى مۇمكىن.

وسى سالاداعى پروبلەمالار الماتىداعى كاسىپكەرلەر پالاتاسىندا وتكەن جۇمىس كەزدەسۋىندە تالقىلانىپ، ولاردى شەشۋ جونىندە ۇسىنىستار ايتىلدى.  جيىنعا سايكەستىكتى تەكسەرۋ جونىندەگى ورگانداردىڭ وكىلدەرى، جەكەمەنشىك سىناۋ، مولشەرلەۋ جانە سالىستىرۋ-تەكسەرۋ زەرتحانالارىنىڭ باسشىلارى مەن ساراپشىلارى قاتىستى.

جيىندا سالا وكىلدەرى ناقتى پروبلەمالاردى اشىق ايتتى. ايتالىق، «UniTestNew» جشس ساراپشىسى ليۋدميلا كاليشەۆيچ: ء«بىزدىڭ كومپانيانىڭ نارىققا شىققانىنا كوپ بولدى. ءبىز سالىستىرۋ-تەكسەرۋ زەرتحاناسى رەتىندە بايلانىس وپەراتورلارىنا قىزمەت كورسەتەمىز، دەرەكتەردى جىبەرۋ جۇيەسىن، ينتەرنەت تەكسەرىسىن جۇزەگە اسىرامىز، – دەيدى. – ءبىزدىڭ قىزمەتكە مەملەكەتتىك ستاندارتتىڭ ءوزى كەلىپ جۇگىنەدى، سەبەبى ولاردا مۇنداي جابدىق جوق. كەز كەلگەن كاسىپكەر ونىمگە سەرتيفيكات الۋ ءۇشىن، مەملەكەتتىك ستاندارتقا بارادى، ال ولار ونى بىزگە جىبەرەدى. ال كورسەتىلگەن قىزمەت ءۇشىن كاسىپكەر بىزگە دە، مەملەكەتتىك ستاندارتقا دا اقى تولەيدى. ياعني، شىن مانىندە مەملەكەتتىك ستاندارت ءمور مەن قول قويعانى ءۇشىن عانا اقى الىپ وتىر. بارلىق سىناقتاردى، ءونىمدى تەستىلەۋدى ءبىز جۇرگىزەمىز. مەن قر تەحنيكالىق رەتتەۋ جانە مەترولوگيا كوميتەتىنە ۆەدومستۆومەن اككرەديتتەلگەن سىناۋ ورتالىقتارىن اشۋ ارقىلى بۇل رەسىمدى جەڭىلدەتۋدى سۇراپ بىرنەشە مارتە بارعانمىن. مۇنداي تاجىريبەنى رەسەيلىكتەر قولعا العان بولاتىن، ال قازىر بۇل رف مەملەكەتتىك ستاندارتى ءۇشىن دە، كاسىپكەرلەر ءۇشىن دە ىڭعايلى. بىراق ءبىزدىڭ وتىنىشكە اتالعان شارا زاڭنامادا قاراستىرىلماعان دەگەن جالتارما جاۋاپ بەرىلدى».

كەلەسى كەزەكتە ءسوز العان Leica Geosystems Kazakhstan LLP جشس ساراپشىسى ولەگ دەلدەنكوۆ: «كومپانيا ونىمدەرىنىڭ قاتارىندا GNSS/GPS جۇيەلەرى، 3D لازەرلىك سكانەرلەرى، قۇرىلىسقا، اۋىل شارۋاشىلىعىنا ارنالعان قاشىقتىق ولشەۋىشتەرى جانە ت.ب. ەڭ زاماناۋي جابدىقتار بار. سەرتيفيكات الۋ ءۇشىن «قازاقستاندىق مەترولوگيا ينستيتۋتى» رمك-عا جۇگىندىك.

بىرىنشىدەن، قىزمەت مەرزىمى كوڭىلدەن شىقپايدى ء(وتىنىمدى قاراۋ جانە قۇجاتتى بەرۋ 20 جۇمىس كۇنىنەن سوڭ عانا ورىندالادى), ال ەكىنشىدەن، قىزمەتتىڭ قۇنى وتە جوعارى. رەەسترگە ەنگىزگەنى ءۇشىن عانا ءبىز 700 مىڭ تەڭگە تولەدىك، تاعى 300 مىڭ تەڭگەنى قۇجاتتىڭ مەملەكەتتىك تىلدەگى اۋدارماسى ءۇشىن تالاپ ەتتى. بىراق ماسەلە وندا ەمەس. ءبىزدىڭ جاعدايدا بارلىق پروتسەسكە 5 اي كەتتى.  بۇل كومپانيا يميدجىنە نۇقسان كەلتىردى. ورتالىق ازياداعى بارلىق وكىلدىكتەر كومپانيانىڭ جاڭا ونىمدەرى تانىستىرىلىمىن جاساپ ساتۋدا. ال ءبىز بولساق ءوز كليەنتتەرىمىزگە جارتى جىل بۇرىنعى ونىمدەرىمىزدى دە ۇسىنا المايمىز، سەبەبى ولار قازاقستاندا سەرتيفيكاتتالماعان. ءبىز ساراپشىلاردىڭ قاراۋ مەرزىمىن قىسقارتۋ جانە تاۋارلار مەن تۇتاس قىزمەتتەردى سەرتيفيكاتتاۋ مەن ستاندارتتاۋ ءراسىمىن جەتىلدىرۋ كەرەك دەپ ەسەپتەيمىز»، – دەگەن پىكىر ءبىلدىردى.

ء«بىزدىڭ نارىقتا جەكەمەنشىك رەسەي زەرتحانالارىنىڭ مۇددەسى ءۇشىن قىزمەت جاسايتىن بروكەرلىك جانە كونسالتينگتىك دەلدالداردىڭ بولۋى جاعدايدى كۇردەلەندىرىپ وتىر. ولار كەز كەلگەن ءونىمدى 2 كۇن ىشىندە تومەن باعامەن سەرتيفيكاتتاپ بەرەدى.  ال قازاقستاندىق كاسىپكەرلەردىڭ كوپ بولىگى ءدال سولاردىڭ قىزمەتىنە جۇگىنىپ وتىرعانى زاڭدى. تەحنيكالىق رەتتەۋ كوميتەتىنىڭ تابالدىرىعىن ايلاپ توزدىرعانشا، بۇل قاعازدى ارزان ءارى تەز ساتىپ الا سالۋ وڭاي. ولاردىڭ سەرتيفيكاتتارى قانشالىقتى زاڭدى؟ ماسەلە وسىندا. ء ونىمدى تەستىلەۋدەن وتكىزۋ پروتسەسى بەينەتى كوپ جانە بىرنەشە تاۋلىكتە بىتە قويمايتىن شارۋا ەكەنى بارىنە بەلگىلى.  بۇل جالعان قاعازدار بارلىق اككرەديتتەلگەن زەرتحانالاردىڭ، ونىڭ ىشىندە  كوميتەتتىڭ جابىلۋىنا الىپ كەلمەي مە؟ بۇدان كەيىن ولارعا كىم جۇگىنەتىن بولادى؟

ءبىز قازىر كەدەندىك وداق اياسىندا جۇمىس جاساعاندىقتان، رەسەيلىك كومپانيالاردىڭ قازاقستان اۋماعىندا قىزمەت جاساۋىنا كەدەرگى بولۋعا قۇقىعىمىز جوق، ولاردىڭ قىزمەتىنە تەكسەرىس جۇرگىزۋگە دە قۇقىلى بولماي وتىرمىز.  بۇل بىزدەگى تاعى ءبىر پروبلەما»، – دەدى سەرتيفيكاتتاۋ جونىندەگى ورگاندار قاۋىمداستىعى توراعاسىنىڭ ورىنباسارى رينات باۋتوۆ.

پىكىرلەردى تىڭداعان الماتى قالاسى كاسىپكەرلەر پالاتاسى ديرەكتورىنىڭ ورىنباسارى، كەزدەسۋدىڭ مودەراتورى قايرات قۇدايبەرگەن جاعدايدى ءوز باقىلاۋىنا الۋعا ۋادە بەردى.

«وسىندا وتىرعان بارلىق كاسىپكەرلەر مەن ساراپشىلارعا الماتى ق. وكپ-نا ناقتى ۇسىنىستار ايتىلعان حات جولداۋدى ۇسىنامىن. ءبىز، ءوز كەزەگىمىزدە، ايتىلعان پروبلەمالاردى «اتامەكەن» قر ۇكپ-نىڭ ورتالىق اپپاراتىندا تالقىعا سالاتىن بولامىز. وعان قوسا، ۇكپ جانىندا جۇمىس جاسايتىن «قازاقستاننىڭ سىرتقى ساۋدا پالاتاسى» دا رەسەيلىك سەرتيفيكاتتاۋ ورگاندارىنا بايلانىستى حالىقارالىق پروبلەمانى شەشۋگە اتسالىساتىن بولادى.  تاۋارلاردى سەرتيفيكاتتاۋدىڭ ءتيىستى جۇيەسىنىڭ بولماۋى  ەل نارىعىنىڭ كونترافاكتىلىك تاۋارلارمەن تولۋ قاۋپىن تۋدىرادى، ال بۇل ۇلتتىق قاۋىپسىزدىككە نۇقسان كەلتىرۋى مۇمكىن»، – دەدى قايرات قۇدايبەرگەن.

Abai.kz