سەنبى, 29 اقپان 2020
جاڭالىقتار 2377 0 پىكىر 31 ناۋرىز, 2016 ساعات 10:37

سامارقاندىقتار گاز قۇبىرلارىن زاڭسىز كەسۋگە قارسىلىق كورسەتۋدە

سامارقاند وبلىسى بۋلۋنگۋر اۋدانى بۋلۋنگۋر ارىق اۋىلىنىڭ 150-دەن استام تۇرعىنى گاز قۇبىرلارىن زاڭسىز كەسۋگە نارازىلىق تانىتىپ كءوشەگە شىقتى.

جەرگىلىكتى تۇرعىندار ءوز اقشالارىنا ورناتىلعان گاز قۇبىرلارىن كەسۋگە جول بەرمەيتىنىن ايتىپ، جەرگىلىكتى بيلىكتەن گازبەن جابدىقتاۋ كاسىپورنى قىزمەتكەرلەرىنىڭ اۋداننان كەتۋىن تالاپ ەتتى.

اۋىل تۇرعىنىنىڭ ءبىرى بىرنەشە جىلدان بەرى پايدالانىپ كەلە جاتقان گازدىڭ كەنەتتەن جوعالىپ كەتكەنىن ايتادى.

«بىراق حالىق جاعدايدىڭ وڭالارىنا، مىنا قۇبىرلار ارقىلى اۋىلىمىزعا قايتا گاز كەلەتىنىنە ۇمىتتەنەدى. ال جەرگىلىكتى بيلىك حالىقتىڭ اقشاسىنا ورناتىلعان ەكى شاقىرىمدىق گاز قۇبىرىن ساتىپ، اقشانى قالتاسىنا باسپاق»، – دەيدى ول.

بۋلۋنگۋر اۋداندىق گازبەن جابدىقتاۋ كاسىپورنىنىڭ باستىعى تاحير بۋلۋنگۋر ارىق اۋىلىنىڭ تۇرعىندارى جۇمىسشىلارىنا گاز قۇبىرىن كەسۋگە جول بەرمەي قويعانىن راستادى.

“بىزگە اۋدان اكىمى گاز كەلمەيتىن جەرلەردەگى گاز قۇبىرىن كەسىپ الىپ، ولاردى گاز جەتكىزىلگەن اۋدانداردا پايدالانۋدى بۇيىرعان. بۇل قۇبىرلار گازبەن قامتۋ كاسىپورنىنىڭ مەنشىگىندە تۇر. الايدا اۋىل تۇرعىندارى ءبىزدىڭ جۇمىسىمىزعا كەدەرگى كەلتىرگەندىكتەن، جۇمىسىمىزدى توقتاتتىق»، - دەدى سۋلايمانوۆ.

سوڭعى كەزدەرى وزبەكستان تۇرعىندارىنىڭ اراسىندا ەلەكتر قۋاتى مەن گاز تاپشىلىعىنا بايلانىستى نارازىلىقتار ءجيى تۋا باستادى.

Abai.kz

 

0 پىكىر