جۇما, 28 اقپان 2020
قاۋىپ ەتكەننەن ايتامىن 28398 13 پىكىر 30 ناۋرىز, 2016 ساعات 10:27

كىم مىقتى: قازاق پا، وزبەك پە؟

ءوز باسىم قازاق ەلىنە  ىرگەلەس جاتقان  وزبەكستاننىڭ  قازىرگى الىشەر ناۆوي وبلىسىنا قاراستى،  تامدىبۇلاق  اۋدانىندا  تۋىپ وسكەن  جانمىن. جالپى، وزبەك پەن قازاق سان عاسىرلار اۋىلى ارالاس، قويى  قورالاس بىرگە  ءومىر  ءسۇرىپ  كەلە  جاتقان  تۋىس حالىقتار. تاۋەلسىزدىك  العان جىلدارى ەكى باۋىرلاس  ەلدىڭ، اسىرەسە، ادەبي-مادەني  قارىم-قاتىناسى  قارىشتى دامي  باستاعانداي بولىپ كورىنگەن، بىراق، كەيىننەن، ۋاقىت  وتە كەلە وسى  تۋىستاردىڭ  اراسىنداعى ساياسي، مادەني، تىلدىك، ءدىني، بايلانىستار  الشاقتاپ بارا  جاتقانداي  كورىنەدى، ماعان.

ويتكەنى، اتىڭ وشكىر جاھاندانۋ  دەگەن جالماۋىز  قازاققا  ءتان اسىل  قاسيەتتەردىڭ  ءبارىن  بىرىنەن سوڭ  ءبىرىن  كەمىرىپ  قۇرتىپ بارادى. ءسوزىم  دالەلدى بولۋ ءۇشىن، وزبەكستان مەن قازاقستاندى  وزىمشە سالىستىرىپ  كورەيىن. 

1991 جىلدىڭ  31 تامىز  وزبەكستان  رەسپۋبليكاسى  ءوز تاۋەلسىزدىگىن  جاريالادى. وزبەكستاننىڭ  استاناسى تاشكەنت  قالاسى  بىلاي تۇرسىن، شالعايداعى  ءبىزدىڭ  اۋىلدىڭ  وزىندە، ەرتەسىنەن 1 قىركۇيەك كۇنى  9 سىنىپقا  بارا  جاتقانبىز، اكىمشىلىكتىڭ ادامدارى  ۆ.ي. لەنين، كارل ماركس، فريدريح ەنگەلس دەگەن كوشەلەردى  اۋىستىرىپ  جاتتى. ءبىزدىڭ مەكتەپتىڭ اتى  ۆ.ي.لەنين ەدى، رۋوۆ  بولىپ  وزگەردى.

كەشكە بارلىق  تەلەارنالاردان  يسلام كاريموۆ  تىكەلەي ەفيردەن بىلاي دەدى: «بۇدان  بىلاي ءبىز ۇلتتىق  مەملەكەت  قۇرامىز، سوندىقتان كىمدە-كىم  وزبەك تىلىندە سويلەپ، وزبەك  ۇلتىن جاقسى  كورەتىن  بولسا، وتانىمىزدىڭ  دامۋىنا ءوز  ۇلەسىن  قوسقىسى  كەلسە  مارحابات، ال ەگەردە ونداي  ويى  جوق  بولسا، ازىرگە  شەكارامىز  اشىق، قالاعان  جاقتارىڭىزعا  كەتۋگە  بولادى. بىراق، كەيىنىرەك  شەكارا  جابىلادى  كەتۋ  قيىنعا  سوعادى»  دەدى. راسىندا دا، ورىستىلدىلەرگە  ۇيلەرىن ساتقىزبادى، ولار  باس اۋعان  جاققا كەتەتىنى – كەتتى، قالاتىنى – قالدى، كەيبىرەۋلەرى  شىمكەنت، تاراز  جانە الماتى سەكىلدى اۋا-رايى ۇقساس قالالارعا  كوشىپ الدى، ءبىر-ەكى جىلدىڭ  ىشىندە  وزبەكستانداعى  200-دەن استام  ورىس مەكتەپتەرى  وزبەك  مەكتەپتەرىنە  اينالدى. 1993 جىلى لاتىن ارپىنە  كوشىرىلدى.

مەملەكەتتە – وزبەكتەندىرۋ  ماشيناسى  جەدەل تۇردە  بارلىق سالادا قارقىندى  جۇمىس ىستەي باستادى. ءىس  قاعازدار  لاتىن  ارپىمەن  باسىلا  باستاپ ەدى، العاشقىدا  ءبىر-ەكى رەت  قارسى شىققاندار بولدى، ارتىنشا  جۇمعان اۋزىن اشتىرپادى. قازاقستاندا  بار  ۇلتتار  وزبەكستاندا  دا  بار. بىراق، ولار ەشقاشان  ء«بىز  كوپۇلتتى  مەملەكەتپىز» دەپ  ايتپايدى. مەملەكەتتى قۇرۋشى ۇلت – وزبەك  ەكەنىن  وزگە  ۇلتتىڭ  وكىلدەرى سانالى  تۇردە تۇسىنەدى. سوندىقتان دا وزبەكستاندا  ءومىر  سۇرگەن سوڭ ونىڭ ءتىلىن، سالت-ءداستۇرىن، تاريحىن تۇبەگەيلى  بىلۋگە  تىرىسادى، وزبەكشە بىلمەيتىن ادامدى  كوشەدە  كەزدەستىرۋدىڭ ءوزى – فانتاستيكا. «ورىس، اعىلشىن، قىتاي تىلدەرىن  ۇيرەنىڭدەر»  دەپ  ۇگىتتەپ  جاتقان  ءبىر  ادامدى  كورمەيسىڭ.

ءبارى، كەرىسىنشە پرەزيدەنت يسلام كاريموۆتان  باستاپ،  ەتىكشىگە دەيىن  تەك  وزبەكشە  سويلەيدى. ءتىپتى، افريكادان كەلگەن وقۋشىلار ءبىر-ەكى جىلدا وزبەكشە  سايراپ كەتەدى. قازاقستانداعىداي ولارعا «تىلدەرىڭدى دامىت، سالت-داستۇرلەرىڭدى ۇمىتپاڭدار» دەپ جەكە-جەكە عيمارات سالىپ  بەرىپ  جاتقان  ءبىر وزبەكتى كورە المايسىڭ. «اسسامبلەيا نارودوۆ  وزبەكستانا» دەگەن ساندىراق  ءسوزدىڭ  ءوزى ەرسى ەستىلەدى.

وزبەكستاندا  مەملەكەت  قازىناسىنان  تىشقاق  لاق  ساتىپ الاتىنداي قارجىنى  جىمقىرعان  ادامنىڭ  تەگىن  سۇراماي-اق  اتىپ  تاستايدى. شەتەلگە  قاشسا ينتەرپولدىڭ كومەگىمەن جىلدار بويى ىزدەپ ءجۇرىپ ەلگە اكەلىپ وزبەكستان زاڭىمەن سوتتايدى. قازاقستاندا  مەملەكەت بيۋدجەتىن ميللاردتاپ ۇرلاپ، ءۇي  قاماۋىندا وتىرۋ قالىپتى جاعداي، اقشاسىن تولەسە سوتتالماسا دا بولادى. تولەرانت – كوسموپوليت بولۋدان  قازاقتار  الەم  چەمپيونى. جاعىمپازدىق پەن  ساۋداگەرلىكتەن وزبەكتەر  مەن  ۇيعىرلار  جولدا  قالدى. اراق  ءىشۋ مەن تەمەكى  تارتۋدان  ورىستاردان  وزىپ   كەتتى. كورىنگەن  كوك  اتتىعا  بايعا شىعۋ مەن كىم  كورىنگەننىڭ  قىزىن  ۇيگە  الىپ  كەلۋدەن  الدىنا  جان  سالمادى.

ال وزبەكستاندا  تۋعان  حالقىن  الدايتىن  قارجى  سالاسىنا  جاتاتىن   كرەديت،  يپوتەكا، ۆاليۋتا  ايىرباستاۋ، لومبارد  دەگەندەر مۇلدەم  جوق.

 ادامدى ازدىراتىن  (ابورت) جاساندى   تۇسىك  جاسايتىن  ەمحانالار  اتىمەن  جوق. تۇنگى كلۋبتاردا  گەيلەر مەن قىزتەكەلەر  ستريپتيز كورسەتۋ، جىنىسىن  وزگەرتۋ، ءبىر جىنىستىلار  ۇيلەنۋ  نەمەسە  بالا  اسىراپ الۋ، شەتەلگە بالا  ساتۋ، اتا-اناسىن  قارتتار ۇيىنە  اپارىپ تاستاۋ، كامەلەت جاسقا تولماعان بالالاردى زورلاۋ، جۇمىس ىستەتىپ  لاقتىرىپ كەتۋ، ادام ساۋداسى، بايعا  شىقپاي  جاتىپ،  مەكتەپ قابىرعاسىندا  وقىپ  ءجۇرىپ  بالا  تابۋ  دەگەن كەلەڭسىزدىكتەر  وزبەكتەردىڭ  ءۇش  ۇيىقتاسا  تۇسىنە  كىرمەگەن.

اتا-اناسىن  قارتتار ۇيىنە  اپارىپ  تاستاۋ،  وزبەكتەر  ءۇشىن  ولىممەن  تەڭ. بالالار  ۇيلەرىنە  بالالارىن  ولسە دە  اپارمايدى. شەتەلگە  بالا  ساتۋ  كەرەك  دەسەڭ، وزبەك قاتىندار  بەتىڭدى  تىرناپ الادى. تەك تاشكەنتتە  عانا  وزگە  ۇلت  وكىلدەرىنىڭ  بالالارىن  مەملەكەت  ءوز  قامقورلىعىنا  الىپ، بارلىعىنا  وزبەك  ەسىمدەرىن  بەرىپ، وزبەك  ءتىلىن  ۇيرەتىپ، وسكەننەن سوڭ، اسكەري وقۋلارعا ەمتيحانسىز  قابىلداپ، ادام  بولىپ  كەتۋىنە  جول  اشىلعان.

ءدىني كوزقاراسى  اتا-بابالارى ۇستانعان  حانافي ماسحابتى  ءپىر  تۇتادى. وزبەكستان بويىنشا 700-دەن استام مەشىت  بولسا، استاناسى تاشكەنتتە  عانا كرەستياندارعا ارنالعان  بىراق شىركەۋى بار. قازاقستاندا كىم كورىنگەنگە  شىركەۋ سالىپ بەرە بەرەدى جانە قازاقتان باسقانىڭ  ءبارىن  قورعايتىن  زاڭدار  بار دا ال، قازاقتى  قورعايتىن  زاڭ جوق. ءدىن جولىن ۇستانۋدان قازاققا  قاراعاندا، اراب  مۇسىلمان  بولماي قالدى. 

وزبەكستاندا  ءبىر  جىلدا  ءۇش  مەرەكە  عانا  بار. 

31 تامىز – مۋستاكيلليك، ياعني  تاۋەلسىزدىك  مەرەكەسىنە  تەلەارنالاردا  دەرەكتى  فيلمدەر كورسەتىلەدى، بەدەلدى  قوعام  قايراتكەرلەرىنىڭ  قۇتتىقتاۋ  سوزدەرى ايتىلادى، ەڭبەكتەگەن سابيدەن ەڭكەيگەن قارياعا دەيىن شاتتانىپ قۋانادى، تەك تاشكەنت قالاسىندا وت شاشۋ  بولادى.

21 ناۋرىز – سامارقاندتىڭ كوك تاسى ەرىگەن، كۇن مەن ءتۇننىڭ تەڭەسىپ، جەر-دۇنيە جاڭا تۇسكەن كەلىنشەكتەي قۇلپىرىپ، تابيعات-انا قىستان  قۇتىلىپ، كوكوراي شالعىن كوك  مايسا ءشوپتىڭ ءيىسى اڭقىپ، جان-جانۋار  قايتا  تۇلەپ، ءىرى  قارا مال شوپكە تويىپ، قۇستار قايتا  ورالىپ، تۋعان-تۋىس ءبىرىن-ءبىرى  ناۋرىز كوجەگە شاقىرىپ، (سۇمالاك)  قايناتىپ، مارە-سارە بولىپ ءتوس قاعىستىرىپ، رەنىش-نازى بولسا  كەشىرىم  سۇراسىپ،  اعاش وتىرعىزىپ  دۇركىرەتىپ تويلايدى.

ءۇشىنشى  مەرەكە  قۇربان  ايت – ءار جىلى  وزگەرىپ  تۇرعاندىقتان، ءۇش كۇن ارنايى دەمالىس  جاريالانادى. ارنايى بەكىتىلگەن  جەرلەردە عانا، قۇربان شالىپ، قوناققا  شاقىرىپ، ءوتىپ  كەتكەن  اتا-بابالارىنا  قۇران باعىشتايدى.

2005 جىلى  28 جاسىمدا تاشكەنت قالاسىنان استاناعا قونىس  اۋداردىم. سودان بەرى قازاقستانداعى  نەشە  ءتۇرلى  ادام ايتسا  نانعىسىز  قىلمىستار مەن  توي-مەرەكەلەردىڭ  كۋاسى  بولىپ  ءجۇرمىن. ەڭ الدىمەن قارجى ماسەلەسىن اتاپ كەتۋدى ءجون كوردىم. 2004-2009 جىلدارى ۇلتتىق بانكتىڭ توراعاسى بولعان ءانۋار سايدەنوۆ، ودان كەيىن گريگوري مارچەنكو، قايرات كەلىمبەتوۆ سياقتىلار جالعان جاڭالىق ايتۋدان جاعى تالماي، ۋادەنى ءۇيىپ-توگىپ بەرە سالاتىن ەشقانداي  جاۋاپكەرشىلىكتەن جۇرداي، ولاردىڭ قاتەلىكتەرى قاراپايىم حالىق ءۇشىن ۇلكەن قايعى-قاسىرەت بولدى.

بىرىنشىدەن، ۇكىمەتتىڭ كەپىلدىگىمەن شەتتەن قارىز الىپ، مەملەكەتىمىزدى وزگەلەرگە تاۋەلدى ەتتى.

ەكىنشىدەن، ۇستىنەن كولەمدى ۇستەمە پايىز قوسىپ حالىقتى قانادى. ەندى سول نەسيەلەرى مەن ۇستەمە پايىزدى تولەي الماي زار يلەگەندەر قانشاما.

ۇشىنشىدەن، نەسيەنى العان ادامداردىڭ ونى قايتارا المايتىنىن بىلە تۇرا، بەي-بەرەكەت ۇلەستىردى.

تورتىنشىدەن، نەسيە اقشاسىنىڭ باسىن باعامى ءاربىر ساعات سايىن اۋناپ تۇراتىن دوللارعا بايلاپ قويدى.

وسىنىڭ بارىنە كوز جۇما قاراۋعا بولا ما؟ ءوز پايداسى ءۇشىن  ءبىزدىڭ بانكتەر  تۋعان حالقىنىڭ  باسىن  قاتەرگە  تىكتى. بانكتەرىمىزدىڭ  ارانى اشىلىپ، تابەتتەرىنە تيىم بولماي قالدى. ناتيجەسىندە، كوپتەگەن  تۇرعىندارىمىز   باسپاناسىز  قالدى. ولاردىڭ  باسىم بولىگى  وسى كۇنگە  دەيىن  ەرەۋىلدەتىپ ءجۇر. ءتىپتى  كەيبىر  قارىزىن  مەملەكەتتىك قازىنا  ەسەبىنەن  جابۋعا  تۋرا  كەلدى. ەندى   كەيبىرەۋلەرى  بۇل  سوققىنى  كوتەرە الماي وزدەرىنە  قول  جۇمساپ،  ەڭ  قىمبات  ومىرلەرىمەن  قوشتاستى. وزىق  دەگەن شەتەلدىك  وقۋ  ورىندارىن  ءبىتىرىپ كەلگەن  ماقتاۋلى  ماماندارىمىزدىڭ  بىلىكتىلىگى وسى ما؟

قىستىڭ  كوزى قىراۋدا، سارىارقانىڭ  سارى  ايازى مەن قاقاعان قارلى بورانىندا  ءتۇبىمىز   تۇرىك   بولعانىنا  قاراماستان، تۇرىكتەكتەس  مەملەكەتتەردەن  الابوتەن، مۇلدەم  باسقا سارىندا  اۋەندەتۋگە  قۇشتار 31 جەلتوقساندى  ەلدەن ەرەكشە 1 قاراشادان باستاپ استانا ۆوكزالىنىڭ الدىنا  شىرشا وتىرعىزىپ،  جالت-جۇلت  ەتكىزىپ كۇندىز-ءتۇنى  اشەكەيلەپ قويادى، سول اياز اتا مەن اقشاقار 1 اقپانعا دەيىن  ءۇش اي بويى  تاپجىلماستان تۇرادى. استانا بويىنشا ونداي  شىرشا ءاربىر مەكەمەنىڭ الدىندا تۇرعىزىلادى. ودان تىس  كوشەدەگى  «س نوۆىم گودوم»، «جاڭا جىلىڭىزبەن» دەگەن جازۋلار جاڭبىردان كەيىنگى  بايشەشەكتەي  قاپتاپ  كەتەدى. كوشەدە اتىلعان قىتايدىڭ  وت  شاشۋلارى مەن قىرشىنان قىيىلعان شىرشالار شاشىلىپ جاتادى. وت شاشۋدىڭ  كەسىرىنەن  ۇيلەرى ورتەنىپ، كوزى شىعىپ، باسى جارىلىپ  جاتقان  تۇرعىندار تىركەلگەن.

مۇنىمەن قويماي، اراق  ءىشىپ كولىككە وتىرۋ، ءارتۇرلى  جول اپاتتارىنىڭ  ورىن الۋى، ادام توناۋ، ۇرىس-كەرىستىڭ  اياعى  تالاي وتباسىنىڭ  شاڭىراعىنىڭ  شايقالۋىنا  اكەلىپ سوعادى. ءتۇرلى تاماقتار مەن اششى سۋعا  كەتكەن  شىعىن  ءوز الدىنا. دۇكەننەن قارىزعا  العان  ازىق-تۇلىك  تە  شاش-ەتەكتەن. وسىلاي  ءبىر  كۇنگە  بولا داڭعازا  داڭعىرتپەن ەسى  كەتىپ  ەلەرىپ، اۋزىنا  كەلگەنىن  لەپىرىپ،  ولگەن  اتا-باباسى ءتىرىلىپ كەلگەندەي  قۋانىپ، وت  اتىپ  تۋلانىپ، كوك  قاتىنداي  دولدانىپ جۇرگەن  الەمدە  قازاقتان  باسقا  بىردە-ءبىر  حالىق  جوق  شىعار، ءسىرا.

قازاقستان  تەلەارنالارىن  كورىپ  وتىرعان ادام بىرەسە  ورىسشا، بىرەسە قازاقشا،  بىرەسە  اعىلشىنشا، قىتايشا، فرانتسۋزشا  ءان تىڭداپ سوڭىندا ەسەڭگىرەپ قالادى، ويتكەنى  قاي  ەلدىڭ  تەلەارناسى ەكەنىن  تۇسىنە  الماي  دال  بولاسىڭ... تاڭنىڭ  اتىسىنان  قارا  كەشكە  دەيىن  ءان  سالادى دا  جاتادى.

نە  بولماسا  بەت اۋزى تىرجالاڭداعان  تۇرسىنبەك قاباتوۆ، جانار ايجانوۆا، ايگۇل يمانباەۆا   مەن ەرداۋلەت پەن سالتاناتتىڭ  اۋزىنا  قاراپ  وتىرعانى. ءانشى، كۇيشى، بيشىلەردەن باسقا  ادام  جوق  سەكىلدى. ۇيىندەگى يت مىسىقتارىنا  دەيىن، نە  ءىشىپ، نە  كيەتىنىن  كورسەتىپ  جاتادى.

ەندى قازاقستانداعى  توي-مەرەكەلەردى  ءتىزىپ  كورەيىك.

1 قاڭتار – جاڭا جىل دەپ تويلايدى.

7-13 قاڭتار – تاعى سول كورىنىس.

25 قاڭتار كۇنى  «كرەستياندارمەن  بىرگە سۇپ-سۋىق سۋعا  شومىلىپ  كۇنادان  ارىلاسىڭ « دەگەن  جالعان سوزگە  قۇدايداي  سەنىپ،  جاتقان  قاراكوزدەردى  كورىپ  جىلاعىم كەلەدى. قانداي  بەيشارالىق دەسەڭشى.

14 اقپان قايداعى ۆالەنتين كۇنى دەپ ساندىراقتايدى، جاستار جاعى  ءبىر-ءبىرىن  پاتەرگە  سۇيرەپ،  زينا جاساۋعا اسىعادى. قىزدىڭ اياعى اۋىر بولىپ قالسا، الدىرتىپ  تاستاۋعا  تىرىسادى نەمەسە  سابيلەر ۇيىنە  تاپسىرىپ قۇتىلادى. كەيىن ءسۇيىپ قوسىلعان  كۇيەۋىنەن بالا  كوتەرە الماي  ەكى  تىزەسىن قۇشاقتاپ  بارماق  تىستەپ  جۇرگەن  قازاق قىزدار  قانشاما.

بيىلدان باستاپ ەلباسى «1 ناۋرىز – العىس  ايتۋ كۇنى»  دەپ جاريالاپتى-مىس. كىمگە  كىم  العىس  ايتۋ  كەرەك ەكەنىن  وزدەرى  تۇسىنبەيدى.

3 ناۋرىز – كەشىرۋ  كۇنى.

8 ناۋرىز – حالىقارالىق  ايەل  قىزدار كۇنى. پرەزيدەنت  اقورداعا بەلسەندى  قىز-كەلىنشەكتەردى  شاقىرىپ ولاردى ءبىر  كۇلدىرىپ، ءبىر  جىلاتادى.

13-14 ناۋرىز  – ەلىمىزدىڭ باتىس ءوڭىرى «امال  كورىسۋ كۇنىن» اتاپ  وتەدى.

21-22-23 – ناۋرىز  ۇلىستىڭ ۇلى كۇنى.

1 مامىر – حالىقتار  دوستىعى كۇنى.

7 مامىر – قازاقستان  رەسپۋبليكاسىنىڭ وتان قورعاۋشىلار كۇنى. نەگىزى داريعا نازارباەۆانىڭ تۋعان كۇنى.

9 مامىر – جەڭىس  كۇنى.

25 مامىر – سوڭعى  قوڭىراۋ كۇنى.

31 مامىر – قۋعىن-cۇرگىندى ەسكە الۋ  كۇنى.

1 ماۋسىم – بالالار  كۇنى.

6 شىلدە – استانانىڭ  ءھام ەلباسىمىزدىڭ تۋعان  كۇنى، 1-10 شىلدە  ارالىعىندا  استانادا  ءار ءتۇرلى  ءىس-شارالار  بولىپ  وتەدى.

30 تامىز – كونستيتۋتسيا  كۇنى.

1 كىركۇيەك – ءبىلىم  كۇنى.

22 كىركۇيەك – تىلدەردى  دامىتۋ  كۇنى.

1 قازان – ۇستازدار  كۇنى.

1 جەلتوقسان – تۇڭعىش  پرەزيدەنت  كۇنى.

ودان قالا  بەردى قۇربان ايت، ورىستاردىڭ  پوستحاسى، قازاق حاندىعىنىڭ  550 جىلدىعى، قىسقى جانە جازعى وليمپيادالار، ءار جىلى وتەتىن استانا  ەكونوميكالىق فورۋمى، ەۋرازيالىق  مەديا فورۋمى، دۇنيە ءجۇزىنىڭ  دىندەرىنىڭ  ءسامميتى، كەدەندىك وداق جيىنى، ەۋرازيا ەكونوميكالىق وداق جينالىسى، ءار ءتۇرلى ەلدەردىڭ  باسشىلارىمەن  كەزدەسۋلەر مەن كەلىسسوزدەر، پىكىرتالاستار مەن دوڭگەلەك ۇستەلدە  باس  قوسۋلار، ءار ءتۇرلى  ەلدەردىڭ  تاۋەلسىزدىك  العان  كۇندەرىن  اتاپ  ءوتۋ، ەلشىلىكتەردەن  كەلگەن  قوناقتارعا  كەشكى  اس  بەرۋ، EXPO-2017, ت.س.س...

قىپ-قىزىل  شىعىن، تاۋسىلمايتىن، بىتپەيتىن  توي—دۋمان... ابايدىڭ  ايتقان «مال شاشپاعى» بولىپ شىعا  كەلمەي  مە؟ وسىلاردان  قارابايىر  حالىققا  كەلىپ-كەتەر  كوك تيىن پايداسى جوق.

«احاۋ  كەرىم – بۇراڭ  بەلىڭ،

كۇندە  دۋمان، كۇندە توي 

جۇرگەن  جەرىڭ» دەپ اندەتپەۋشى  مە ەدى؟.

ءارتۇرلى  دەڭگەيدەگى  شەنەۋنىكتەردىڭ  شەتەلدە  ساقتايتىن  ەسەپشوتتارى مەن تەندەرلەردەن  ءتۇسىپ  جاتقان  قىرۋار  قارجىدا  ەسەپ  جوق. كوشەدە  قاپتاپ  تۇرعان  پوليتسيا  قىزمەتكەرلەرىنىڭ  كولىگىنىڭ جانارمايى مەن كيىمى،  جالاقىسى  ءوز  الدىنا... ءبىز  بەن  ءسىزدىڭ  سالىعىمىزدان  جينالعان  قايران  اقشالار-اي. بارلىعى دا مەملەكەت بيۋدجەتىن  تاسالاۋمەن  عانا  اينالىساتىن  سەكىلدى  كورىنەدى  ماعان. ايتەۋىر  قۇدايدىڭ  قۇتتى  كۇنى  استانادا  دۋمان  توي. ەلباسىنىڭ  «ەكونوميتە  بيۋدجەت» دەگەن  ءسوزىن  قۇلاق  اسىپ جاتقان  جۇمىرباستى پەندە  جوق.

ونىڭ  ورنىنا، رەسەيدەن ۋاقىتى  ءوتىپ  كەتكەن  قالعان-قۇتقان ازىق-تۇلىكتەرىن  توننالاپ  الىپ  كەلىپ جاتقانىنا  ء«اي  دەيتىن  اجە، قوي دەيتىن قوجا» جوق. سول رەسەيدىڭ  جەتى  پوليگونى مەن بايقوڭىردان  كۇندە  ۇشىپ  جاتقان  پروتونى  مەن  گيپتەلدىڭ  زاردابى  شاش-ەتەكتەن، قىناداي  قىرىلىپ  جاتقان  اقبوكەندەردىڭ  وبالى  كىمگە؟ قازاقتىڭ  دالاسى  ولىك  ساسىدى...                                                               

دوللاردىڭ  تۇراقسىزدىعى، جاپپاي  جۇمىسسىزدىق، 25 جىلدا  دەنى  ساۋ ءبىر  زاۆود نەمەسە ءبىر  فابريكا  جۇمىس  ىستەمەيدى، تەك شيكىزاتقا  تاۋەلدى  ەلگە  اينالعانىمىزدى  بىلمەي دە  قالدىق، قىتايدان  كەلىپ جاتقان  ۋلى  ازىق-تۇلىك پەن  زياندى  ءدارى-دارمەكتەرگە  كىم  توسقاۋىل  بولادى؟ تورتكۇل  دۇنيەنى  شۋلاتقان  لاڭكەستىك  ارەكەتتەر، الەمدىك  گەوساياسي  احۋال، ۇلتتىق  مۇددە، «سونىڭ  ىشىندە  قازاق  قاشان  ۇلتتىق  ەل  بولادى؟» دەگەن  سۇراقتارعا  مەملەكەتتى  باسقارىپ  وتىرعان  اعا-كوكەلەرىمىز  باس  قاتىرمايتىن  سياقتى.  

جۇمامۇرات  ءشامشى، تاريح  عىلىمدارىنىڭ  كانديداتى

Abai.kz

13 پىكىر